Mahabharata · Chapter 1.49

yadapṛcchattadā rājā mantriṇo janamejayaḥ /
pituḥ svargagatiṃ tanme vistareṇa punarvada //
sautiruvāca /

śṛṇu brahmanyathā'pṛcchanmantriṇo nṛpatistadā /
yathā cākhyātavantaste nidhanaṃ tatparikṣitaḥ //
janamejaya uvāca /

jānanti sma bhavantastadyathāvṛttaṃ piturmama /
āsīdyathā sa nidhanaṃ gataḥ kāle mahāyaśāḥ //

śrutvā bhavatsakāśāddhi piturvṛttamaśeṣataḥ /
kalyāṇaṃ pratipatsyāmi viparītaṃ na jātucit //
sautiruvāca /

mantriṇo'thābruvanvākyaṃ pṛṣṭāstena mahātmanā /
sarve dharmavidaḥ prājñā rājānaṃ janamejayam //
mantriṇa ūcuḥ /

śṛṇu pārthiva yadbrūṣe pitustava mahātmanaḥ /
caritaṃ pārthivendrasya yathā niṣṭhāṃ gataśca saḥ //

dharmātmā ca mahātmā ca prajāpālaḥ pitā tava /
āsīdihāyathā vṛttaḥ sa mahātmā śṛṇuṣva tat //

cāturvarṇyaṃ svadharmasthaṃ sa kṛtvā paryarakṣata /
dharmato dharmavidrājā dharmo vigrahavāniva //

rarakṣa pṛthivīṃ devīṃ śrīmānatulavikramaḥ /
dveṣṭārastasya naivāsansa ca dveṣṭi na kañcana //

samaḥ sarveṣu bhūteṣu prajāpatirivābhavat /
brāhmaṇāḥ kṣatriyā vaiśyāḥ śūdrāścaiva svakarmasu //

sthitaḥ sumanaso rājaṃstena rājñā svadhiṣṭhitāḥ /
vidhavānāthavikalānkṛpaṇāṃśca babhāra saḥ //

sudarśaḥ sarvabhūtānāmāsītsoma ivāparaḥ /
tuṣṭapuṣṭajanaḥ śrīmānsatyavāgdṛḍhavikramaḥ //

dhanurvede tu śiṣyo'bhūnnṛpaḥ śāradvatasya saḥ /
govindasya priyaścāsītpitā te janamejaya //

lokasya caiva sarvasya priya āsīnmahāyaśāḥ /
parikṣīṇeṣu kuruṣu sottarāyāmajījanat //

parikṣidabhavattena saubhadrasyātmajo balī /
rājadharmārthakuśalo yuktaḥ sarvaguṇairvṛtaḥ //

jitendriyaścātmavāṃśca medhāvī dharmasevitā /
ṣaḍvargajinmahābuddhirnītiśāstraviduttamaḥ //

prajā imāstava pitā ṣaṣṭivarṣāṇyapālayat /
tato diṣṭāntamāpannaḥ sarveṣāṃ duḥkhamāvahan //

tatastvaṃ puruṣaśreṣṭha dharmeṇa pratipedivān / idaṃ varṣasahasrāṇi rājyaṃ kurukulāgatam /
bāla evābhiṣiktastvaṃ sarvabhūtānupālakaḥ //
janamejaya uvāca /

nāsminkule jātu babhūva rājā yo na prajānāṃ priyakṛtpriyaśca /
viśeṣataḥ prekṣya pitāmahānāṃ vṛttaṃ mahadvṛttaparāyaṇānām //

kathaṃ nidhanamāpannaḥ pitā mama tathāvidhaḥ /
ācakṣadhvaṃ yathāvanme śrotumicchāmi tattvataḥ //
sautiruvāca /

evaṃ sañcoditā rājñā mantriṇaste narādhipam /
ūcuḥ sarve yathāvṛttaṃ rājñaḥ priyahitaiṣiṇaḥ //
mantriṇa ūcuḥ /

sa rājā pṛthivīpālaḥ sarvaśastrabhṛtāṃ varaḥ /
babhūva mṛgayāśīlastava rājanpitā sadā //

yathā pāṇḍurmahābāhurdhanurdharavaro yudhi /
asmāsvāsajya sarvāṇi rājakāryāṇyaśeṣataḥ //

sa kadācidvanagato mṛgaṃ vivyādha patriṇā /
viddhvā cānvasarattūrṇaṃ taṃ mṛgaṃ gahane vane //

padātirbaddhanistriṃśastatāyudhakalāpavān /
na cāsasāda gahane mṛgaṃ naṣṭaṃ pitā tava //

pariśrānto vayasthaśca ṣaṣṭivarṣo jarānvitaḥ /
kṣudhitaḥ sa mahāraṇye dadarśa munisattamam //

sa taṃ papraccha rājendro muniṃ maunavrate sthitam /
na ca kiñciduvācedaṃ pṛṣṭo'pi samunistadā //

tato rājā kṣucchramārtastaṃ muniṃ sthāṇuvatsthitam /
maunavratadharaṃ śāntaṃ sadyo manyuvaśaṃ gataḥ //

na bubodha ca taṃ rājā maunavratadharaṃ munim /
sa taṃ krodhasamāviṣṭo dharṣayāmāsa te pitā //

mṛtaṃ sarpaṃ dhanuṣkoṭyā samutkṣipya dharātalāt /
tasya śuddhātmanaḥ prādātskandhe bharatasattama //

na covāca sa medhāvī tamatho sādhvasādhu vā /
tasthau tathaiva cākruddhaḥ sarpaṃ skandhena dhārayan //