Mahabharata · Chapter 1.48

gatamātraṃ tu bhartāraṃ jaratkāruravedayat /
bhrātuḥ sakāśamāgatya yathātathyaṃ tapodhana //

tataḥ sa bhujagaśreṣṭhaḥ śrutvā sumahadapriyam /
uvāca bhaginīṃ dīnāṃ tadā dīnataraḥ svayam //
vāsukiruvāca /

jānāsi bhadre yatkāryaṃ pradāne kāraṇaṃ ca yat /
pannagānāṃ hitārthāya putraste syāttato yadi //

sa sarpasatrātkila no mokṣayiṣyati vīryavān /
evaṃ pitāmahaḥ pūrvamuktavāṃstu suraiḥ saha //

apyasti garbhaḥ subhage tasmātte munisattamāt /
na cecchāmyaphalaṃ tasya dārakarma manīṣiṇaḥ //

kāmaṃ ca mama na nyāyyaṃ praṣṭuṃ tvāṃ kāryamīdṛśam /
kintu kāryagarīyastvāttatastvā'hamacūcudam //

durvāryatāṃ viditvā ca bhartuste'titapasvinaḥ /
nainamanvāgamiṣyāmi kadāciddhi śapetsa mām //

ācakṣva bhadre bhartuḥ svaṃ sarvameva viceṣṭitam /
uddharasva ca śalyaṃ me ghoraṃ hṛdi cirasthitam //

jaratkārustato vākyamityuktā pratyabhāṣata /
āśvāsayantī santaptaṃ vāsukiṃ pannageśvaram //
jaratkāruruvāca /

pṛṣṭo mayā'patyahetoḥ sa mahātmā mahātapāḥ /
astītyuttaramuddiśya mamedaṃ gatavāṃśca saḥ //

svaireṣvapi na tenāhaṃ smarāmi vitathaṃ vacaḥ /
uktapūrvaṃ kuto rājansāmparāye sa vakṣyati //

na santāpastvayā kāryaḥ kāryaṃ prati bhujangame /
utpatsyati ca te putro jvalanārkasamaprabhaḥ //

ityuktvā sa hi māṃ bhrātargato bhartā tapodhanaḥ /
tasmādvyetu paraṃ duḥkhaṃ tavedaṃ manasi sthitam //
sautiruvāca /

etacchrutvā sa nāgendro vāsukiḥ parayā mudā /
evamastviti tadvākyaṃ bhaginyāḥ pratyagṛhṇata //

sāntvamānārthadānaiśca pūjayā cārurūpayā /
sodaryāṃ pūjayāmāsa svasāraṃ pannagottamaḥ //

tataḥ pravavṛdhe garbho mahātejā mahāprabhaḥ /
yathā momo dvijaśreṣṭha śuklapakṣodito divi //

atha kāle tu sā brahmanprajajñe bhujagasvasā /
kumāraṃ devagarbhābhaṃ pitṛmātṛbhayāpaham //

vavṛdhe sa tu tatraiva nāgarājaniveśane /
vedāṃścādhijage sāṅgānbhārgavacyavanātmajāt //

cīrṇavrato bāla eva buddhisattvaguṇānvitaḥ /
nāma cāsyābhavatkhyātaṃ lokeṣvāstīka ityuta //

astītyuktvā gato yasmātpitā garbhasthameva tam /
vanaṃ tasmādidaṃ tasya nāmāstīketi viśrutam //

sa bāla eva tatrasthaścarannamitabuddhimān /
gṛhe pannagarājasya prayatnātparirakṣitaḥ //

bhagavāniva deveśaḥ śūlapāṇirhiraṇmayaḥ /
vivardhamānaḥ sarvāṃstānpannagānabhyaharṣayat //