Mahabharata · Chapter 1.36

ākhyātā bhujagāstāta vīryavanto durāsadāḥ /
śāpaṃ taṃ te'bhivijñāya kṛtavantaḥ kimuttaram //
sautiruvāca /

teṣāṃ tu bhagavāñcheṣaḥ kadrūṃ tyaktvā mahāyaśāḥ /
ugraṃ tapaḥ samātasthe vāyubhakṣo yatavrataḥ //

gandhamādanamāsādya badaryāṃ ca taporataḥ /
gokarṇe puṣkarāraṇye tathā himavatastaṭe //

teṣu teṣu ca puṇyeṣu tīrtheṣvāyataneṣu ca /
ekāntaśīlo niyataḥ satataṃ vijitendriyaḥ //

tapyamānaṃ tapo ghoraṃ taṃ dadarśa pitāmahaḥ /
saṃśuṣkamāṃsatvaksnāyuṃ jaṭācīradharaṃ munim //

tamabravītsatyadhṛtiṃ tapyamānaṃ pitāmahaḥ /
kimidaṃ kuruṣe śeṣa prajānāṃ svasti vai kuru //

tvaṃ hi tīvreṇa tapasā prajāstāpayase'nagha /
brūhi kāmaṃ ca me śeṣa yaste hṛdi vyavasthitaḥ //
śeṣa uvāca /

sodaryā mama sarve hi bhrātaro mandacetasaḥ /
saha tairnotsahe vastuṃ tadbhavānanumanyatām //

abhyasūyanti satataṃ parasparamamitravat /
tato'haṃ tapa ātiṣṭhe naitanpaśyeyamityuta //

na marṣayanti sasutāṃ satataṃ vinatāṃ ca te /
asmākaṃ cāparo bhrātā vainateyo'ntarikṣagaḥ //

taṃ ca dviṣanti satataṃ sa cāpi balavattaraḥ /
varapradānātsa pituḥ kaśyapasya mahātmanaḥ //

so'haṃ tapaḥ samāsthāya mokṣyāmīdaṃ kalevaram /
kathaṃ me pretyabhāve'pi na taiḥ syātsaha saṅgamaḥ //

tamevaṃ vādinaṃ śeṣaṃ pitāmaha uvāca ha /
jānāmi śeṣa sarveṣāṃ bhrātṝṇāṃ te viceṣṭitam //

mātuścāpyaparādhādvai bhrātṝṇāṃ te mahadbhayam /
kṛto'tra parihāraśca pūrvameva bhujaṅgama //

bhrātṝṇāṃ tava sarveṣāṃ na śokaṃ kartumarhasi /
vṛṇīṣva ca varaṃ mattaḥ śeṣa yatte'bhikāṅkṣitam //

dāsyāmi hi varaṃ te'dya prītirme paramā tvayi / diṣṭyā buddhiśca te dharme niviṣṭā pannagottama /
bhūyo bhūyaśca te buddhirdharme bhavatu susthirā //
śeṣa uvāca /

eṣa eva varo deva kāṅkṣito me pitāmaha /
dharme me ramatāṃ buddhiḥ śame tapasi ceśvara //
brahmovāca /

prīto'smyanena te śeṣa damena ca śamena ca /
tvayā tvidaṃ vacaḥ kāryaṃ manniyogātprajāhitam //

imāṃ mahīṃ śailavanopapannāṃ sasāgaragrāmavihārapattanām
tvaṃ śeṣa samyak calitāṃ yathāva- tsangṛhya tiṣṭhasva yathā'calā syāt //
śeṣa uvāca /

yathā'ha devo varadaḥ prajāpati- rmahīpatirbhūtapatirjagatpatiḥ /
tathā mahīṃ dhārayitā'smi niścalāṃ prayacchatāṃ me vivaraṃ prajāpate //
brahmovāca /

adho mahīṃ gaccha bhujaṅgamottama svayaṃ tavaiṣā vivaraṃ pradāsyati /
imāṃ dharāṃ dhārayatā tvayā hi me mahatpriyaṃ śeṣa kṛtaṃ bhaviṣyati //
sautiruvāca /

tathaiva kṛtvā vivaraṃ praviśya sa prabhurbhuvo bhujagavarāgrajaḥ sthitaḥ /
bibharti devīṃ śirasā mahīmimāṃ samudranemiṃ parigṛhya sarvataḥ //
brahmovāca /

śeṣo'si nāgottama dharmadevo mahīmimāṃ dhārayase yadekaḥ /
anantabhogaiḥ parigṛhya sarvāṃ yathāhamevaṃ balabhidyathā vā //
sautiruvāca /

adho bhūmau vasatyevaṃ nāgo'nantaḥ pratāpavān /
dhāsyanvasudhāmekaḥ śāsanādbrahmaṇo vibhoḥ //

suparṇaṃ ca sahāyaṃ vai bhagavānamarottamaḥ /
prādādanantāya tadā vainateyaṃ pitāmahaḥ //

anante'bhiprayāte tu vāsukiḥ sa mahābalaḥ / abhyaṣicyata nāgaistu daivatairiva vāsavaḥ //