Mahabharata · Chapter 1.35

bhujaṅgamānāṃ śāpasya mātrā caiva sutena ca /
vinatāyāstvayā proktaṃ kāraṇaṃ sūtanandana //

varapradānaṃ bhartrā ca kadrūvinatayostathā /
nāmanī caiva te prokte pakṣiṇorvainateyayoḥ //

pannagānāṃ tu nāmāni na kītaryasi sūtaja /
prādhānyenāpi nāmāni śrotumicchāmahe vayam //
sautiruvāca /

bahutvānnāmadheyāni pannagānāṃ tapodhana /
na kīrtayiṣye sarveṣāṃ prādhānyena tu me śṛṇu //

śeṣaḥ prathamato jāto vāsukistadanantaram /
airāvatastakṣakaśca karkoṭakadhanañjayau //

kāliyo maṇināgaśca nāgaścāpūraṇastathā /
nāgastathā piñjaraka elāpatro'tha vāmanaḥ //

nīlānīlau tathā nāgau kalmāṣaśabalau tathā /
āryakaścograkaścaiva nāgaḥ kalaśapotakaḥ //

sumanākhyo dadhimukhastathā vimalapiṇḍakaḥ /
āptaḥ koṭarakaścaiva śaṅkho vāliśikhastathā //

niṣṭānako hemaguho nahuṣaḥ piṅgalastathā /
bāhyakarṇo hastipadastathā mudgarapiṇḍakaḥ //

kambalāśvatarau cāpi nāgaḥ kālīyakastathā /
vṛttasaṃvartakau nāgau dvau ca padmāviti śrutau //

nāgaḥ śaṅkhamukhaścaiva tathā kūṣmāṇḍako'paraḥ /
kṣemakaśca tathā nāgo nāgaḥ piṇḍārakastathā //

karavīraḥ puṣpadaṃṣṭro bilvako bilvapāṇḍuraḥ /
mūṣakādaḥ śaṅkhaśirāḥ pūrṇabhadro haridrakaḥ //

aparājito jyotikaśca pannagaḥ śrīvahastathā /
kauravyo dhṛtarāṣṭraśca śaṅkhapiṇḍaśca vīryavān //

virajāśca subāhuśca śālipiṇḍaśca vīryavān /
hastipiṇḍaḥ piṭharakaḥ sumukhaḥ kauṇapāśanaḥ //

kuṭhaṟaḥ kuñjaraścaiva tathā nāgaḥ prabhākaraḥ /
kumudaḥ kumudākṣaśca tittirirhalikastathā //

kardamaśca mahānāgo nāgaśca bahumūlakaḥ /
karkarākarkarau nāgau kuṇḍodaramahodarau //

ete prādhānyato nāgāḥ kīrtitā dvijasattama /
bahutvānnāmadheyānāmitare nānukīrtitāḥ //

eteṣāṃ prasavo yaśca prasavasya ca santatiḥ /
asaṅkhyeyeti mattvā tānna bravīmi tapodhana //

bahūnīha sahasrāṇi prayutānyarbudāni ca /
aśakyānyeva saṅkhyātuṃ pannagānāṃ tapodhana //