Mahabharata · Chapter 1.34

ityevamukto garuḍaḥ pratyuvāca śacīpatim /
garuḍa uvāca /
sakhyaṃ me'stu tvayā deva yathecchasi purandara /
balaṃ tu mama jānīhi mahaccāsahyameva ca //

kāmaṃ naitatpraśaṃsanti santaḥ svabalasaṃstavam /
animittaṃ suraśreṣṭha sadyaḥ prāpnoti garhaṇām //

guṇasankīrtanaṃ cāpi pṛṣṭenānyena gopate / vaktavyaṃ na tu vaktavyaṃ svayameva śatakrato //

sakheti kṛtvā tu sakhe pṛṣṭo vakṣyāmyahaṃ tvayā /
na hyātmastavasaṃyuktaṃ vaktavyamanimittataḥ //

saparvatavanāmurvīṃ sasāgarajalāmimām /
vahe pakṣeṇa vai śakra tvāmapyatrāvalambinam //

sarvānsampiṇḍitānvāpi lokānsasthāṇujaṅgamān /
vaheyamapariśrānto viddhīdaṃ me mahadbalam //
sautiruvāca /

ityuktavacanaṃ vīraṃ kirīṭī śrīmatāṃ varaḥ /
āha śaunaka devendraḥ sarvalokahitaḥ prabhuḥ //

evameva yathāttha tvaṃ sarvaṃ sambhāvyate tvayi /
sangṛhyatāmidānīṃ me sakhyamatyantamuttamam //

na kāryaṃ yadi somena mama somaḥ pradīyatām /
asmāṃste hi prabādheyuryebhyo dadyādbhavānimam //
garuḍa uvāca /

kiñcitkāraṇamuddiśya somo'yaṃ nīyate mayā /
na dāsyāmi samāpātuṃ somaṃ kasmaicidapyaham //

yatremaṃ tu sahasrākṣa nikṣipeyamahaṃ svayam /
tvamādāya tatastṛrṇaṃ harethāstridiveśvara //
śakra uvāca /

vākyenānena tuṣṭo'haṃ yattvayoktamihāṇḍaja /
yamicchasi varaṃ mattastaṃ gṛhāṇa khagottama //
sautiruvāca /

ityuktaḥ pratyuvācedaṃ kadrūputrānanusmaran /
bhaveyurbhujagāḥ śakra mama bhakṣyā mahābalāḥ //
garuḍa uvāca /

īśo'hamapi sarvasya kariṣyāmi tu te'rthitām /
bhaveyurbhujagāḥ śakra mama bhakṣyā mahābalāḥ //
sautiruvāca /

tathetyuktvā'nvagacchattaṃ tato dānavasūdanaḥ /
devadevaṃ mahātmānaṃ yogināmīśvaraṃ harim //

sa cānvamodattaṃ cārthaṃ yathoktaṃ garuḍena vai /
idaṃ bhūyo vacaḥ prāha bhagavāṃstridaśeśvaraḥ //

hariṣyāmi vinikṣiptaṃ somamityanubhāṣya tam /
ājagāma tatastūrṇaṃ suparṇī māturantikam //

vinayāvanato bhūtvā vacanaṃ cedamabravīt /
idamānītamamṛtaṃ devānāṃ bhavanānmayā //

praśādhi kimito mātaḥ kariṣyāmi śubhavrate /
vinatovāca /
parituṣṭā'hametena karmaṇā tava putraka //

ajaraścābharaścaiva devānāṃ supriyo bhava /
sautiruvāca /
atha sarpānuvācedaṃ sarvānparamahṛṣṭavat /
garuḍa uvāca /
idamānītamamṛtaṃ nikṣepsyāmi kuśeṣu vaḥ //

snātā maṅgalasaṃyuktāstataḥ prāśnīta pannagāḥ /
bhavadbhiridamāsīnairyaduktaṃ tadvacastadā //

adāsī caiva māteyamadyaprabhṛti cāstu me /
yathoktaṃ bhavatāmetadvaco me pratipāditam //
sautiruvāca /

tataḥ snātuṃ gatāḥ sarpāḥ pratyuktvā taṃ tathetyuta /
śakro'pyamṛtamākṣipya jagāma tridivaṃ punaḥ //

athāgatāstamuddeśaṃ sarpāḥ somārthinastadā /
snātāśca kutajapyāśca prahṛṣṭāḥ kṛtamaṅgalāḥ //

parasparakṛtadveṣāḥ somaprāśanakarmaṇi / ahaṃ pūrvamahaṃ pūrvamityuktvā te samādravan //

yatraitadamṛtaṃ cāpi sthāpitaṃ kuśasaṃstare /
tadvijñāya hṛtaṃ sarpāḥ pratimāyākṛtaṃ ca tat //

somasthānamidaṃ ceti darbhāṃste lilihustadā /
tato dvidhā kṛtā jihvāḥ sarpāṇāṃ tena karmaṇā //

abhavaṃścāmṛtasparśāddarbhāste'tha pavitriṇaḥ / nāgāśca vañcitā bhūtvā visṛjya vinatāṃ tataḥ /
viṣādamagamaṃstīvraṃ garuḍasya balātprabho //

evaṃ tadamṛtaṃ tena hṛtamāhṛtameva ca /
dvijihvāśca kṛtāḥ sarpā garuḍena mahātmanā //

tataḥ suparṇaḥ paramapraharṣavā- nvihṛtya mātrā saha tatra kānane /
bhujangabhakṣaḥ paramārcitaḥ khagai- rahīnakīrtirvinatāmanandayat //

imāṃ kathāṃ yaḥ śṛṇuyānnaraḥ sadā paṭheta vā dvijagaṇamukhyasaṃsadi /
asaṃśayaṃ tridivamiyātsa puṇyabhā- ṅmahātmanaḥ patagapateḥ prakīrtanāt //