Mahabharata · Chapter 1.33

jāmbūnadamayo bhūtvā marīcinikarojjvalaḥ /
praviveśa balātpakṣī vārivega ivārṇavam //

sa cakraṃ kṣuraparyantamapaśyadamṛtāntike /
paribhramantamaniśaṃ tīkṣṇadhāramayasmayam //

jvalanārkaprabhaṃ ghoraṃ chedanaṃ somahāriṇām /
ghorarūpaṃ tadatyarthaṃ yantraṃ devaiḥ sunirmitam //

tasyāntaraṃ sa dṛṣṭvai paryavartata khecaraḥ /
arāntareṇābhyapatatsankṣipyāṅgaṃ kṣaṇena ha //

adhaścakrasya caivātra dīptānalasamadvyutī /
vidyujjihvau mahāvīryau dīptāsyau dīptalocanau //

cakṣurviṣau mahāghorau nityaṃ kruddhau tarasvinau /
amṛtasyaiva rakṣārthaṃ dadarśa bhujagottamau //

sadā saṃrabdhanayanau sadā cānimiṣekṣaṇau /
tayoreko'pi yaṃ paśyetsa tūrṇaṃ bhasmasādbhavet //

tau dṛṣṭvā sahasā khedaṃ jagāma vinatātmajaḥ /
kathametau mahāvīryau jetavyau haribhojinau //

iti sañcintya garuḍastayostūrṇaṃ nirākaraḥ / tayoścakṣūṃṣi rajasā suparṇaḥ sahasā'vṛṇot /
tābhyāmadṛṣṭarūpo'sau sarvataḥ samatāḍayat //

tayoraṅge samākramya vainateyo'ntarikṣagaḥ /
ācchinattarasā madhye somamabhyadravattataḥ //

samutpāṭyāmṛtaṃ tatra vainateyastato balī /
utpapāta javenaiva yantramunmathya vīryavān //

apītvaivāmṛtaṃ pakṣī parigṛhyāśu niḥsṛtaḥ /
āgacchadapariśrānta āvāryārkaprabhāṃ tataḥ //

viṣṇunā ca tadākāśe vainateyaḥ sameyivān /
tasya nārāyaṇastuṣṭastenālaulyena karmaṇā //

tamuvācāvyayo devo varado'smīti khecaram /
sa vavre tava tiṣṭheyamuparītyantarikṣagaḥ //

uvāca cainaṃ bhūyo'pi nārāyaṇamidaṃ vacaḥ /
ajaraścāmaraśca syāmamṛtena vinā'pyaham //
sautiruvāca /

evamastviti taṃ viṣṇuruvāca vinatāsutam /
pratigṛhya vanau tau ca garuḍo viṣṇumabravīt //

bhavatepi varaṃ dadyāṃ vṛṇotu bhagavānapi /
taṃ vavre vāhanaṃ viṣṇurnarutmantaṃ mahābalam //

dhvajaṃ ca cakre bhagavānupari sthāsyasīti tam /
evamastviti taṃ devamuktvā nārāyaṇaṃ khagaḥ //

vavrāja tarasā vegādvāyuṃ spardhanmahājavaḥ /
taṃ vrajantaṃ khagaśreṣṭhaṃ vajreṇendro'bhyatāḍayat //

harantamamṛtaṃ roṣādgaruḍaṃ pakṣiṇāṃ varam /
tamuvācendramākrande garuḍaḥ patatāṃ varaḥ //

prahasañślakṣṇayā vācā tathā vajrasamāhataḥ /
ṛṣermānaṃ kariṣyāmi vajraṃ yasyāsthisambhavam //

vajrasya ca kariṣyāmi tavaiva ca śatakrato /
etatpatraṃ tyajāmyekaṃ yasyāntaṃ nopalapsyase //

na ca vajranipātena rujā me'stīha kācana /
evamuktvā tataḥ putramutsasarja sa pakṣirāṭ //

tadutsṛṣṭamabhiprekṣya tasya parṇamanuttamam /
hṛṣṭāni sardhabhūtāni nāma cakrurgarutmataḥ //

surūpaṃ patramālakṣya suparṇo'yaṃ bhavatviti / taddṛṣṭvā mahadāścaryaṃ sahasrākṣaḥ purandaraḥ /
khago mahadidaṃ bhūtamiti matvā'bhyabhāṣata //

balaṃ vijñātumicchāmi yatte paramanuttamam /
sakhyaṃ cānantamicchāmi tvayā saha khagottama //