Mahabharata · Chapter 1.26
evaṃ stutastadā kadrvā bhagavānharivāhanaḥ /
nīlajīmūtasanghātaiḥ sarvamambaramāvṛṇot //
meghānājñāpayāmāsa varṣadhvamamṛtaṃ śubham /
te meghā mumucustoyaṃ prabhūtaṃ vidyudujjvalāḥ //
parasparamivātyarthaṃ garjantaḥ satataṃ divi /
saṃvartitamivākāśaṃ jaladaiḥ sumahādbhutaiḥ //
sṛjadbhiratulaṃ toyamajasraṃ sumahāravaiḥ /
sampranṛttamivākāśaṃ dhārormibhiranekaśaḥ //
meghastanitanirghoṣaurvidyutpavanakampitaiḥ /
tairmeghaiḥ satatāsāraṃ varṣadbhiraniśaṃ tadā //
naṣṭacandrārkakiraṇamambaraṃ samapadyata /
nāgānāmuttamo harṣastathā varṣati vāsave //
āpūryata mahī cāpi salilena samantataḥ / rasātalamanuprāptaṃ śītalaṃ vimalaṃ jalam /
tadā bhūrabhavacchannā jalormibhiranekaśaḥ /
rāmaṇīyakamāgacchanmātrā saha bhujangamāḥ //
Original text: Mahābhārata (southern recension) · Edition: Śrīman Mahābhāratam, ed. T. R. Krishnacharya and T. R. Vyasacharya, Nirnaya Sagar Press, Bombay 1906–1910; e-text by SARIT (Shrinivasa Varakhedi and others) · SARIT: Search and Retrieval of Indic Texts · SARIT (e-text) via Internet Archive · CC BY-SA 3.0