Mahabharata · Chapter 1.25

tataḥ kāmagamaḥ pakṣī mahāvīryo mahābalaḥ /
māturantikamāgacchatparaṃ pāraṃ mahodadheḥ //

yatra sā vinatā tasminpaṇitena parājitā /
atīva duḥkhasantaptā dāsībhāvamupāgatā //

tataḥ kadācidvinatāṃ praṇatāṃ putrasannidhau /
kāle cāhūya vacanaṃ kadrūridamabhāṣata //

nāgānāmālayaṃ bhadre suramyaṃ cārudarśanam /
samudrakukṣāvekānte tatra māṃ vinate naya //
sautiruvāca /

tataḥ suparṇamātā tāmavahatsarpamātaram /
pannagāngaruḍaścāpi māturvacanacoditaḥ //

sa sūryamabhito yāti vainateyo vihangamaḥ /
sūryaraśmiprataptāśca mūrcchitāḥ pannagā'bhavan //

tadavasthānsutāndṛṣṭvā kadrūḥ śakramathāstuvat /
namaste sarvadeveśa namaste balasūdana //

namucighna namaste'stu sahasrākṣa śacīpate /
sarpāṇāṃ sūryataptānāṃ vāriṇā tvaṃ plavo bhava //

tvameva paramaṃ trāṇamasmākamamarottama /
īśo asi pavaḥ sraṣṭuṃ tvamanalpaṃ purandara //

tvameva meghastvaṃ vāyustvamagnirvidyuto'mbare /
tvamabhragaṇavikṣeptā tvāmevāhurmahāghanam //

tvaṃ vajramatulaṃ ghoraṃ ghoṣavāṃstvaṃ balāhakaḥ /
sraṣṭā tvameva lokānāṃ saṃhartā cāparājitaḥ //

tvaṃ jyotiḥ sarvabhūtānāṃ tvamādityo vibhāvasuḥ /
tvaṃ mahadbhūtamāścaryaṃ tvaṃ rājā tvaṃ surottamaḥ //

tvaṃ viṣṇustvaṃ sahasrākṣastvaṃ devastvaṃ parāyaṇam /
tvaṃ sarvamamṛtaṃ deva tvaṃ somaḥ paramārcitaḥ //

tvaṃ muhūrtastithistvaṃ ca tvaṃ lavastvaṃ punaḥ kṣaṇaḥ / śuklastvaṃ bahulastvaṃ ca kalā kāṣṭhā truṭistathā /
saṃvatsarartavo māsā rajanyaśca dināni ca //

tvamuttamā sagirivanā vasundharā sabhāskaraṃ vitimiramambaraṃ tathā /
madodadhiḥ satimitimiṅgilastathā mahormimānbahumakaro jhaṣākulaḥ //

mahāyaśāstvamiti sadā'bhipūjyase manīṣibhirmuditamanā maharṣibhiḥ /
abhiṣṭutaḥ pibasi ca somamadhvare kaṣaṭkṛtānyapi ca havīṃṣi bhūtaye //

tvaṃ vipraiḥ satatamihejyase phalārthaṃ vedāṅgeṣvatulabalaugha gīyase ca /
tvaddhetoryajanaparāyaṇā dvijendrā vedāṅgānyabhigamayanti sarvayatnaiḥ //