મહાભારત · અધ્યાય 1.26

એવં સ્તુતસ્તદા કદ્ર્વા ભગવાન્હરિવાહનઃ ।
નીલજીમૂતસન્ઘાતૈઃ સર્વમમ્બરમાવૃણોત્ ॥

મેઘાનાજ્ઞાપયામાસ વર્ષધ્વમમૃતં શુભમ્ ।
તે મેઘા મુમુચુસ્તોયં પ્રભૂતં વિદ્યુદુજ્જ્વલાઃ ॥

પરસ્પરમિવાત્યર્થં ગર્જન્તઃ સતતં દિવિ ।
સંવર્તિતમિવાકાશં જલદૈઃ સુમહાદ્ભુતૈઃ ॥

સૃજદ્ભિરતુલં તોયમજસ્રં સુમહારવૈઃ ।
સમ્પ્રનૃત્તમિવાકાશં ધારોર્મિભિરનેકશઃ ॥

મેઘસ્તનિતનિર્ઘોષૌર્વિદ્યુત્પવનકમ્પિતૈઃ ।
તૈર્મેઘૈઃ સતતાસારં વર્ષદ્ભિરનિશં તદા ॥

નષ્ટચન્દ્રાર્કકિરણમમ્બરં સમપદ્યત ।
નાગાનામુત્તમો હર્ષસ્તથા વર્ષતિ વાસવે ॥

આપૂર્યત મહી ચાપિ સલિલેન સમન્તતઃ । રસાતલમનુપ્રાપ્તં શીતલં વિમલં જલમ્ ।

તદા ભૂરભવચ્છન્ના જલોર્મિભિરનેકશઃ ।
રામણીયકમાગચ્છન્માત્રા સહ ભુજન્ગમાઃ ॥