Mahabharata · Chapter 1.256

tataḥ prajvalite vahnau śārṅgakāste suduḥkhitāḥ /
vyathitāḥ paramodvignā nādhijagmuḥ parāyaṇam //

niśāmya putrakānbālānmātā teṣāṃ tapasvinī /
jaritā śokaduḥkhārtā vilalāpa suduḥkhitā //
jaritovāca /

ayamagnirdahankakṣamita āyāti bhīṣaṇaḥ /
jagatsandīpayanbhīmo mama duḥkhavivardhanaḥ //

ime ca māṃ karṣayanti śiśavo mandacetasaḥ /
abarhāścaraṇairhīnāḥ pūrveṣāṃ naḥ parāyaṇāḥ //

trāsayaṃścāyamāyāti lelihāno mahīruhān /
ajātapakṣāśca sutā na śaktāḥ saraṇe mama //

ādāya ca na śaknomi putrāṃstaritumātmanā /
na ca tyaktumahaṃ śaktā hṛdayaṃ dūyatīva me //

kaṃ tu jahyāmahaṃ putraṃ kamādāya vrajāmyaham /
kinnu me syātkṛtaṃ kṛtvā manyadhvaṃ putrakāḥ katham //

cintayānā vimokṣaṃ vo nādhigacchāmi kiñcana /
chādayiṣyāmi vo gātraiḥ kariṣye maraṇaṃ saha //

jaritārau kulaṃ hyetajjyeṣṭhatvena pratiṣṭhitam /
sārisṛkkaḥ prajāyeta pitṝṇāṃ kulavardhanaḥ //

stambamitrastapaḥ kuryāddroṇo brahmavidāṃ varaḥ /
ityevamuktvā prayayau pitā vo nirghṛṇaḥ purā //

kamupādāya śakyeyaṃ gantuṃ kaṣṭā'paduttamā / kiṃ nu kṛtvā kṛtaṃ kāryaṃ bhavediti ca vihvalā /
nāpaśyatsvadhiyā mokṣaṃ svasutānāṃ tadānalāt //
vaiśampāyana uvāca /

evaṃ bruvāṇāṃ śārṅgāste pratyūcuratha mātaram /
snehamutsṛjya mātastvaṃ pata yatra na havyavāṭ //

asmāsviha vinaṣṭeṣu bhavitāraḥ sutāstava /
tvayi mātarvinaṣṭāyāṃ na naḥ syātkulasantatiḥ //

anvavekṣyaitadubhayaṃ kṣemaṃ syādyatkulasya naḥ /
tadvai kartuṃ paraḥ kālo mātareṣa bhavettava //

mā tvaṃ sarvavināśāya snehaṃ kārṣīḥ suteṣu naḥ /
na hīdaṃ karma moghaṃ syāllokakāmasya naḥ pituḥ //
jaritovāca /

idamākhorbilaṃ bhūmau vṛkṣasyāsya samīpataḥ /
tadāviśadhvaṃ tvaritā vahneratra na vo bhayam //

tato'haṃ pāṃsunā chidramapidhāsyāmi putrakāḥ /
evaṃ pratikṛtaṃ manye jvalataḥ kṛṣṇavartmanaḥ //

tata eṣyāmyatīte'gnau vihantuṃ pāṃsuśañcayam /
rocatāmeṣa vo vādo mokṣārthaṃ ca hutāśanāt //
śārṅgakā ūcuḥ /

abarhānmāṃsabhūtānnaḥ kravyādākhurvināśayet /
paśyamānā bhayamidaṃ praveṣṭuṃ nātra śaknumaḥ //

kathamagnirna no dhakṣyetkathamākhurna nāśayet /
kathaṃ na syātpitā moghaḥ kathaṃ mātā dhriyeta naḥ //

bila ākhorvināśaḥ syādagnerākāśacāriṇām /
anvavekṣyaitadubhayaṃ śreyāndāho na bhakṣaṇam //

garhitaṃ maraṇaṃ naḥ syādākhunā bhakṣite bile /
śiṣṭādiṣṭaḥ parityāgaḥ śarīrasya hutāśanāt //

agnidāhe tu niyataṃ brahmaloke dhruvā gatiḥ //