Mahabharata · Chapter 1.254

tathā śailanipātena bhīṣitāḥ khāṇḍavālayāḥ /
dānavā rākṣasā nāgāstarakṣvṛkṣavanaukasaḥ //

dvipāḥ prabhinnāḥ śārdūlāḥ siṃhāḥ kesariṇastathā /
mṛgāśca mahiṣāścaiva śataśaḥ pakṣiṇastathā //

samudvignā visasṛpustathānyā bhūtajātayaḥ /
taṃ dāvaṃ samudaikṣanta kṛṣṇau cābhyudyatāyudhau //

utpātanādaśabdena trāsitā iva cābhavan /
te vanaṃ prasamīkṣyātha dahyamānamanekadhā //

kṛṣṇamabhyudyatāstraṃ ca nādaṃ mumucurulbaṇam /
tena nādena raudreṇa nādena ca vibhāvasoḥ //

rarāsa gaganaṃ kṛtsnamutpātajaladairiva /
tataḥ kṛṣṇo mahābāhuḥ svatejobhāsvaraṃ mahat //

cakraṃ vyasṛjadatyugraṃ teṣāṃ nāśāya keśavaḥ /
tenārtā jātayaḥ kṣudrāḥ sadānavaniśācarāḥ //

nikṛttāḥ śataśaḥ sarvā nipeturanalaṃ kṣaṇāt /
tatrādṛśyanta te daityāḥ kṛṣṇacakravidāritāḥ //

vasārudhirasampṛktāḥ sandhyāyāmiva toyadāḥ /
piśācānpakṣiṇo nāgānpaśūṃścaiva sahasraśaḥ //

nighnaṃścarati vārṣṇeyaḥ kālavattatra bhārata /
kṣiptaṃ kṣiptaṃ punaścakraṃ kṛṣṇasyāmitraghātinaḥ //

chittvānekāni satvāni pāṇimeti punaḥ punaḥ /
tathā tu nighnatastasya piśācoragarākṣasān //

babhūva rūpamatyugraṃ sarvabhūtātmanastadā /
sametānāṃ ca sarveṣāṃ dānavānāṃ ca sarvaśaḥ //

vijetā nābhavatkaścitkṛṣṇapāṇḍavayormṛdhe /
tayorbalātparitrātuṃ taṃ ca dāvaṃ yadā surāḥ //

nāśaknuvañśamayituṃ tadā'bhūvanparāṅmukhāḥ /
śatakratustu samprekṣya vimukhānamarāṃstathā //

babhūva mudito rājanpraśaṃsankeśavārjunau /
nivṛtteṣvatha deveṣu vāguvācāśarīriṇī //

śatakratuṃ samābhāṣya mahāgambhīraniḥsvanā /
na te sakhā sannihitastakṣako bhujagottamaḥ //

dāhakāle khāṇḍavasya kurukṣetraṃ gato hyasau /
na ca śakyau yudhā jetuṃ kathañcidapi vāsava //

vāsudevārjunāvetau nibodha vacanānmama /
naranārāyaṇāvetau pūrvadevau divi śrutau //

bhavānapyabhijānāti yadvīryau yatparākramau /
naitau śakyau durādharṣau vijetumajitau yudhi //

api sarveṣu lokeṣu purāṇāvṛṣisattamau /
pūjanīyatamāvetāvapi sarvaiḥ surāsuraiḥ //

yakṣarākṣasagandharvanarakinnarapannagaiḥ /
tasmāditaḥ suraiḥ sārdhaṃ gantumarhasi vāsava //

diṣṭaṃ cāpyanupaśyaitatkhāṇḍavasya vināśanam /
iti vākyamupaśrutya tathyamityamareśvaraḥ //

krodhāmarṣau samutsṛjya sampratasthe divaṃ tadā /
taṃ prasthitaṃ mahātmānaṃ samavekṣya divaukasaḥ //

sahitāḥ senayā rājannanujagmuḥ purandaram /
devarājaṃ tadā yāntaṃ saha devairavekṣya tu //

vāsudevārjunau vīrau siṃhanādaṃ vinedatuḥ /
devarāje gate rājanprahṛṣṭau keśavārjunau //

nirviśaṅkaṃ vanaṃ vīrau dāhayāmāsatustadā /
sa māruta ivābhrāṇi nāśayitvā'rjunaḥ surān //

vyadhamaccharasaṅghātairdehinaḥ khāṇḍavālayān /
na ca sma kiñcicchaknoti bhūtaṃ niścarituṃ tataḥ //

sañchidyamānamiṣubhirasyatā savyasācinā /
nāśaknuvaṃśca bhūtāni mahāntyapi raṇe'rjunam //

nirīkṣitumamoghāstraṃ yoddhuṃ cāpi kuto raṇe /
śataṃ caikena vivyādha śatenaikaṃ patatriṇām //

vyasavaste'patannagnau sākṣātkālahatā iva /
na cālabhanta te śarma rodhaḥsu viṣameṣu ca //

pitṛdevanivāseṣu santāpaścāpyajāyata /
bhūtasaṅghāśca bahavo dīnāścakrurmahāsvanam //

rurudurvāraṇāścaiva tathā mṛgatarakṣavaḥ /
tena śabdena vitresurgaṅgodadhicarā jhaṣāḥ //

vidyādharagaṇāścaiva ye ca tatra vanaukasaḥ /
na tvarjunaṃ mahābāho nāpi kṛṣṇaṃ janārdanam //

nirīkṣituṃ vai śaknoti kaścidyoddhuṃ kutaḥ punaḥ /
ekāyanagatā ye'pi niṣpetustatra kecana //

rākṣasā dānavā nāgā jaghne cakreṇa tānhariḥ /
te tu bhinnaśirodehāścakravegādgatāsavaḥ //

peturanye mahākāyāḥ pradīpte vasuretasi /
samāṃsarudhiraudhaiśca vasābhiścāpi tarpitaḥ //

uparyākāśago bhūtvā vidhūmaḥ samapadyata /
dīptākṣo dīptajihvaśca sampradīptamahānanaḥ //

dīptordhvakeśaḥ piṅgākṣaḥ pibanprāṇabhṛtāṃ vasām /
tāṃ sa kṛṣṇārjunakṛtāṃ sudhāṃ prāpya hutāśanaḥ //

babhūva muditastṛptaḥ parāṃ nirvṛtimāgataḥ /
tathā'suraṃ mayaṃ nāma takṣakasya niveśanāt //

vipradravantaṃ sahasā dadarśa madhusūdanaḥ /
tamagniḥ prārthayāmāsa didhakṣurvātasārathiḥ //

śarīravāñjaṭī bhūtvā nadanniva balāhakaḥ /
vijñāya dānavendrāṇāṃ mayaṃ vai śilpināṃ varam //

jighāṃsurvāsudevastaṃ cakramudyamya dhiṣṭhitaḥ /
sa cakramudyataṃ dṛṣṭvā didhakṣantaṃ ca pāvakam //

abhidhāvārjunetyevaṃ mayastrāhīti cābravīt /
tasya bhītasvanaṃ śrutvā mā bhairiti dhanañjayaḥ //

pratyuvāca mayaṃ pārtho jīvayanniva bhārata /
taṃ na bhetavyamityāha mayaṃ pārtho dayāparaḥ //

taṃ pārthenābhaye datte namucerbhrātaraṃ mayam /
na hantumaicchaddāśārhaḥ pāvako na dadāha ca //

tadvanaṃ pāvako dhīmāndināni daśa pañca ca /
dadāha kṛṣṇapārthābhyāṃ rakṣitaḥ pākaśāsanāt //

tasminvane dahyamāne ṣaḍagnirna dadāha ca /
aśvasenaṃ mayaṃ caiva caturaḥ śārṅgakāṃstathā //