Mahabharata · Chapter 1.250

sa tu nairāśyamāpannaḥ sadā glānisamanvitaḥ /
pitāmahamupāgacchatsankruddho havyavāhanaḥ //

tacca sarvaṃ yathānyāyaṃ brahmaṇe sannyavedayat /
uvāca caivanaṃ bhagavānmuhūrtaṃ sa vicintya tu //

upāyaḥ paridṛṣṭo me yathā tvaṃ dhakṣyase'nagha /
kālaṃ ca kañcitkṣamatāṃ tatastaddhakṣyate bhavān //

bhaviṣyataḥ sahāyau te naranārāyaṇau tadā /
tābhyāṃ tvaṃ sahito dāvaṃ dhakṣyase havyavāhana //

evamastviti taṃ vahnirbrahmāṇaṃ pratyabhāṣata /
sambhūtau tau viditvā tu naranārāyaṇāvṛṣī //

kālasya mahato rājaṃstasya vākyaṃ svayambhuvaḥ /
anusmṛtya jagāmātha punareva pitāmaham //

abravīcca tadā brahmā yathā tvaṃ dhakṣyase'nala /
khāṇḍavaṃ dāvamadyaiva miṣato'sya śacīpateḥ //

naranārāyaṇau yau tau pūrvadevau vibhāvaso /
samprāptau mānuṣe loke kāryārthaṃ hi divaukasām //

arjunaṃ vāsudevaṃ ca yau tau loko'bhimanyate /
tāvetau sahitāvehi khāṇḍavasya samīpataḥ //

tau tvaṃ yācasva sāhāyye dāhārthaṃ khāṇḍavasya ca /
tato dhakṣyasi taṃ dāvaṃ rakṣitaṃ tridaśairapi //

tau tu satvāni sarvāṇi yatnato vārayiṣyataḥ /
devarājaṃ ca sahitau tatra me nāsti saṃśayaḥ //

etacchrutvā tu vacanaṃ tvarito havyavāhanaḥ /
kṛṣṇapārthāvupāgamya yamarthaṃ tvabhyabhāṣata //

taṃ te kathitavānasmi pūrvameva nṛpottama /
tacchrutvā vacanaṃ tvagnerbībhatsurjātavedasam //

abravīnnṛpaśārdūla tatkālasadṛśaṃ vacaḥ /
didhakṣuṃ khāṇḍavaṃ dāvamakāmasya śatakratoḥ //
arjuna uvāca /

uttamāstrāṇi me santi divyāni ca bahūni ca /
yairahaṃ śaknuyāṃ yoddhumapi vajradharānbahūn //

dhanurme nāsti bhagavanbāhuvīryeṇa sammitam /
kurvataḥ samare yatnaṃ vegaṃ yadviṣahenmama //

śaraiśca me'rtho bahubhirakṣayaiḥ kṣipramasyataḥ /
na hi voḍhuṃ rathaḥ śaktaḥ śarānmama yathepsitān //

aśvāṃśca divyāniccheyaṃ pāṇḍurānvātaraṃhasaḥ /
rathaṃ ca meghanirghoṣaṃ sūryapratimatejasam //

tathā kṛṣṇasya vīryeṇa nāyudhaṃ vidyate samam /
yena nāgānpiśācāṃśca nihanyānmādhavo raṇe //

upāyaṃ karmasiddhau ca bhaghavanvaktumarhasi /
nivārayeyaṃ yenendraṃ varṣamāṇaṃ mahāvane //

pauruṣeṇa tu yatkāryaṃ tatkartā'haṃ sma pāvaka /
karaṇāni samarthāni bhagavandātumarhasi //