Mahabharata · Chapter 1.24

sa śrutvā'thātmano dehaṃ suparṇaḥ prekṣya ca svayam /
śarīrapratisaṃhāramātmanaḥ sampracakrame //
suparṇa uvāca /

na me sarvāṇi bhūtāni vibhiyurdehadarśanāt /
bhīmarūpātsamudvigrāstasmāttejastu saṃhare //
sautiruvāca /

tataḥ kāmagamaḥ pakṣī kāmavīryo vihangamaḥ /
aruṇaṃ cātmanaḥ pṛṣṭhamāropya sa piturgṛhāt //

māturantikamāgacchatparaṃ tīraṃ mahodadheḥ /
tatrāruṇaśca nikṣipto purodeśe mahādyuteḥ //

sūryastejobhiratyugrairlokāndagdhumanā yadā /
rururuvāca /
kimarthaṃ bhagavānsūryo lokāndagdhumanāstadā //

kimastāpahṛtaṃ devairyenamaṃ manyurāviśat /
pramatiruvāca /
candrārkābhyāṃ yadā rāhurākhyāto hyamṛtaṃ piban //

vairānubandhaṃ kṛtavāṃścandrādityau tadā'nagha /
bādhyamānaṃ graheṇātha hyādityaṃ manyurāviśat //

surārthāya samutpanno roṣo rāhostu māṃ prati /
bahvanarthakaraṃ pāpameko'haṃ samavāpnuyām //

sahāya eva kāryeṣu na ca kṛcchreṣu dṛśyate /
paśyanti grasyamānaṃ māṃ sahante vai divaukasaḥ //

tasmāllokavināśārthaṃ hyavatiṣṭhe na saṃśayaḥ /
evaṃ kṛtamatiḥ sūryo hyastamabhyagamadgirim //

tasmāllokavināśāya santāpayata bhāskaraḥ /
tato devānupāgamya procurevaṃ maharṣayaḥ //

ādyārdharātrasamaye sarvalokabhayāvahaḥ /
utpatsyate mahāndāhastrailokyasya vināśanaḥ //

tato devāḥ sarṣigaṇā upagamya pitāmaham /
abruvankimivehādya mahaddāhakṛtaṃ bhayam //

na tāvaddṛśyate sūryaḥ kṣayo'yaṃ pratibhāti ca /
udite bhagavanbhānau kathanetadbhaviṣyati //
pitāmaha uvāca /

eṣa lokavināśāya ravirudyantumudyataḥ /
dṛśyanneva hi lokānsa bhasmarāśīkariṣyati //

tasya pratividhānaṃ ca vihitaṃ pūrvameva hi /
kaśyapasya suto dhīmānaruṇetyabhiviśrutaḥ //

mahākāyo mahātejāḥ sa sthāsyati puro raveḥ /
kariṣyati ca sārathyaṃ tejaścāsya hariṣyati //

lokānāṃ svasti caivaṃ syādṛṣīṇāṃ ca divaukasām /
pramatiruvāca /
tataḥ pitāmahājñātaḥ sarvaṃ cakre tadā'ruṇaḥ //

uditaścaiva savitā hyaruṇena samāvṛtaḥ /
etatte sarvamākhyātaṃ yatsūryaṃ manyurāviśat //

aruṇaśca yathaivāsya sārathyamakarotprabhuḥ /
bhūya evāparaṃ praśnaṃ śṛṇu pūrvamudāhṛtam //