Mahabharata · Chapter 1.243

vṛṣmyandhakapurāttasmādapayātuṃ dhanañjayaḥ /
viniścitya tayā sārdhaṃ subhadrāmidamabravīt //

dvijānāṃ guṇamukhyānāṃ yathārhaṃ pratipādaya /
bhojyairbhakṣyaiśca kāmaiśca svapurīṃ pratiyāsyatām //

ātmanaśca samuddiśya mahāvratasamāpanam /
gaccha bhadre svayaṃ tūrṇaṃ mahārājaniveśanam //

tejobalajavopetaiḥ śuklairhayavarottamaiḥ /
vājibhiḥ śaivyasugrīvameghapuṣpabalāhakaiḥ //

yuktaṃ rathavaraṃ tūrṇamihānaya susatkṛtam /
vratārthamiti bhāṣitvā sakhībhiḥ subhage saha //

kṣipramādāya paryehi saha sarvāyudhena ca /
anukarṣāntapatākāśca tūṇīrāṃśca dhanūṃṣi ca //

sarvānrathavare sthāpya sotsedhāśca mahāgadāḥ //
vaiśampāyana uvāca /

arjunenaivamuktā sā subhadrā bhadrabhāṣiṇī /
jagāma nṛpaterveśma sakhībhiḥ sahitā tadā //

vratārthamiti tatrasthānrakṣiṇo vākyamabravīt /
rathenānena yāsyāmi mahāvratasamāpanam //

śaibyasugrīvayuktena sāyudhenaiva śārṅgiṇaḥ /
rathena ramaṇīyena prayāsyāmi vratārthinī //

subhadhrayaivamukte tu janāḥ prāñjalayo'bhavan /
yojayitvā rathavaraṃ kalyāṇairabhibhāṣya tām //

yathoktaṃ sarvamāropya āyudhāni ca bhāminī /
kṣipramādāya kalyāṇī subhadrā'rjunamabravīt //

ratho'yaṃ rathināṃ śreṣṭha ānītastava śāsanāt /
sa tvaṃ yāhi yathākāmaṃ kurūnkauravanandana //
vaiśampāyana uvāca /

nivedya tu rathaṃ bhartuḥ subhadrā bhadrasammatā /
brāhmaṇānāṃ tadā hṛṣṭā dadau sā vividhaṃ vasu //

snehavanti ca bhojyāni pradadāvīpsitāni ca /
yathākāmaṃ yathāśraddhaṃ vastrāṇi vividhāni ca //

tarpitā vividhairbhojyaistānyavāpya vasūni ca /
brāhmaṇāḥ svagṛhaṃ jagmuḥ prayujya paramāśiṣaḥ //

subhadrayā tu vijñaptaḥ pūrvameva dhanañjayaḥ /
abhīśugrahaṇe pārtha na me'sti sadṛśo bhuvi //

tasmātsā pūrvamāruhya raśmīñjagrāha mādhavī /
sodarā vāsudevasya kṛtasvastyayanā hayān //

vyatyayitvā tu talliṅgaṃ yativeṣaṃ dhanañjayaḥ /
āmucya kavacaṃ vīraḥ samucchritamahaddhanuḥ //

āruroha rathaśreṣṭhaṃ śuklavāsā dhanañjayaḥ /
mahendradattaṃ mukuṭaṃ tathaivābharaṇāni ca //

alaṅkṛtya tu kaunteyaḥ prayātumupacakrame /
tataḥ kanyāpure ghoṣastumulaḥ samapadyata //

dṛṣṭvā navavaraṃ pārthaṃ bāṇakhaḍgadhanurdharam /
abhīśuhastāṃ suśroṇīmarjunena rathe sthitām //

ūcuḥ kanyāstadā yāntīṃ vāsudevasahodarām /
sarvakāmasamṛddhā tvaṃ subhadre bhadrabhāṣiṇi //

vāsudevapriyaṃ labdhvā bhartāraṃ vīramarjunam /
sarvasīmantinīnāṃ tvāṃ śreṣṭhāṃ kṛṣṇasahodarīm //

manyāmahe mahābhāge subhadre bhadrabhāṣiṇi /
yasmātsarvamanuṣyāṇāṃ śreṣṭho bhartā tavārjunaḥ //

upapannastvayā vīraḥ sarvalokamahārathaḥ /
he prayāhi gṛhānbhadre suhṛdbhiḥ sangamo'stu te //
vaiśampāyana uvāca /

evamuktā prahṛṣṭābhiḥ sakhībhiḥ pratinanditā /
bhadrā bhadrajavopetānaśvānpunaracodayat //

pārśve cāmarahastā sā sakhī tasyāṅganā'bhavat /
tataḥ kanyāpuradvārātsaghoṣādabhiniḥsṛtam //

dadṛśustaṃ rathaśreṣṭhaṃ janā jīmūtanisvanam /
subhadrāsaṅgṛhītasya rathasya mahataḥ svanam //

meghasvanamivākāśe śuśruvuḥ puravāsinaḥ /
subhadrayā tu sampanne tiṣṭhanrathavare'rjunaḥ //

prababhau ca tayopetaḥ kailāsa iva gaṅgayā /
pārthaḥ subhadrāsahito virarāja mahārathaḥ //

virājate yathā śakro rājañśacyā samanvitaḥ /
subhadrāṃ prekṣya pārthena hriyamāṇāṃ yaśasvinīm //

cakruḥ kilakilāśabdānāsādya bahavo janāḥ /
dāśārhāṇāṃ kulasya śrīḥ subhadrā madrabhāṣiṇī //

abhikāmā sakāmena pārthena saha gacchati /
athāpare tu sankruddhā gṛhṇīta ghnata māciram //

iti saṃvārya śastrāṇi vavarṣurabhito diśam /
iti sambhāṣamāṇānāṃ sa nādaḥ sumahānabhūt //

sa tena janaghoṣeṇa vīro gaja ivārditaḥ /
vavarṣa śaravarṣāṇi na tu kañcana roṣayat //

mumoca niśitānbāṇāndīpyamānānsvatejasā /
prāsādavarasaṅgheṣu harmyeṣu bhavaneṣu ca //

kṣobhayitvā puraśreṣṭhaṃ garutmāniva sāgaram /
prekṣanraivakatadvāraṃ niryayau bharatarṣabhaḥ //