Mahabharata · Chapter 1.240

cairāḥ sañcārite tasminnanujñāte yudhiṣṭhire /
vāsudevābhyanujñātaḥ kathayitvetikṛtyatām //

kṛṣṇasya matamāsthāya prayayau bharatarṣabhaḥ /
dvārakāyā upavane tasthau vai kāryasādhanaḥ //

nivṛtte hyutsave tasmingirau raivatake tadā /
vṛṣṇayo'pyagamansarve purīṃ dvāravatīmanu //

cintayānastato bhadrāmupaviṣṭaḥ śilātale /
ramaṇīye vanoddeśe bahupādapasaṃvṛte //

sālatālāśvakarṇaiśca bakulairarjunaistathā /
campakāśokapunnāgaiḥ ketakaiḥ pāṭalaistathā //

karṇikārairaśokaiśca aṅkolairatimuktakaiḥ /
evamādibhiranyaiśca saṃvṛte sa śilātale //

punaḥpunaścintayānaḥ subhadrāṃ bhadrabhāṣiṇīm /
yadṛcchayā copapannānvṛṣṇivīrāndadarśa saḥ //

baladevaṃ ca hārdikyaṃ sāmbaṃ sāraṇameva ca /
pradyumnaṃ ca gadaṃ caiva cārudeṣṇaṃ vidūratham //

bhānuṃ ca haritaṃ caiva vipṛthuṃ pṛthumeva ca /
tathānyāṃśca bahūnpaśyanhṛdi śokamadhārayat //

tataste sahitāḥ sarve yatiṃ dṛṣṭvā samutsukāḥ /
vṛṣṇayo vinayopetāḥ parivāryopatasthire //

tato'rjunaḥ prītamanāḥ svāgataṃ vyājahāra saḥ /
āsyatāmāsyatāṃ sarvai ramaṇīye śilātale //

ityevamuktā yatinā prītāste yādavarṣabhāḥ /
upopaviviśuḥ sarve te svāgatamiti bruvan //

paritaḥ sanniviṣṭeṣu vṛṣṇivīreṣu pāṇḍavaḥ /
ākāraṃ gūhamānastu kuśalapraśnamabravīt //

sarvatra kuśalaṃ coktvā baladevo'bravīdidam /
prasādaṃ kuru me vipra kutastvaṃ cāgato hyasi //

tvayā dṛṣṭāni puṇyāni vada tvaṃ vadatāṃvara /
parvatāṃścaiva tīrthāni vanānyāyatanāni ca //
vaiśampāyana uvāca /

tīrthānāṃ darśanaṃ caiva parvatānāṃ ca bhārata /
āpagānāṃ vanānāṃ ca kathayāmāsa tāḥ kathāḥ //

śrutvā dharmakathāḥ puṇyā vṛṣṇivīrā mudānvitāḥ /
apūjayaṃstadā bhikṣuṃ kathānte janamejaya //

tatastu yādavāḥ sarve mantrayanti sma bhārata /
ayaṃ deśātithiḥ śrīmānyatiliṅgadharo dvijaḥ //

āvāsaṃ kamupāśritya vaseta nirupadravaḥ /
ityevaṃ prabruvantastu rauhiṇeyaṃ ca yādavāḥ //

dadṛśuḥ kṛṣṇamāyāntaṃ sarve yādavanandanam /
ehi keśava tāteti rauhiṇeyo vaco'bravīt //

yatiliṅgadharo vidvāndeśātithirayaṃ dvijaḥ / varṣamāsanivāsārthamāgato naḥ puraṃ prati /
sthāne yasminnivasatu tanme brūhi janārdana //
śrīkṛṣṇa uvāca /

tvayi sthite mahābhāga paravānasmi dharmataḥ /
svayaṃ tu rucire sthāne vāsayeryadunandana //

prītaḥ sa tena vākyena pariṣvajya janārdanam /
baladevo'bravīdvākyaṃ cintayitvā mahābalaḥ //

ārāme tu vaseddhīmāṃścaturo varṣamāsakān /
kanyāgṛhe subhadrāyā bhuktvā bhojanamicchayā //

latāgṛheṣu vasatāmiti me dhīyate matiḥ /
labdhānujñāstvayā tāta manyante sarvayādavāḥ //
śrīkṛṣṇa uvāca /

balavāndarśanīyaśca vāgmī śrīmānbahuśrutaḥ /
kanyāpurasamīpe tu na yuktamiti me matiḥ //

guruḥ śāstā ca netā ca śāstrajño dharmavittamaḥ /
tvayoktaṃ na virudhyehaṃ kariṣyāmi vacastava //

śubhāśubhasya vijñātā nānyo'smi bhuvi kaścana //
baladeva uvāca /

ayaṃ deśātithiḥ śrīmānsarvadharmabhṛtāṃ varaḥ /
dhṛtimānvinayopetaḥ satyabādī jitendriyaḥ //

yatiliṅgadharo hyeṣa ko vijānāti mānasam /
tvamimaṃ puṇḍarīkākṣa nītvā kanyāpuraṃ śubham //

nivedaya subhadrāyai madvākyaparicoditaḥ /
bhakṣyairbhojyaiśca pānaiśca annairiṣṭaiśca pūjaya //