મહાભારત · અધ્યાય 1.240

ચૈરાઃ સઞ્ચારિતે તસ્મિન્નનુજ્ઞાતે યુધિષ્ઠિરે ।
વાસુદેવાભ્યનુજ્ઞાતઃ કથયિત્વેતિકૃત્યતામ્ ॥

કૃષ્ણસ્ય મતમાસ્થાય પ્રયયૌ ભરતર્ષભઃ ।
દ્વારકાયા ઉપવને તસ્થૌ વૈ કાર્યસાધનઃ ॥

નિવૃત્તે હ્યુત્સવે તસ્મિન્ગિરૌ રૈવતકે તદા ।
વૃષ્ણયોઽપ્યગમન્સર્વે પુરીં દ્વારવતીમનુ ॥

ચિન્તયાનસ્તતો ભદ્રામુપવિષ્ટઃ શિલાતલે ।
રમણીયે વનોદ્દેશે બહુપાદપસંવૃતે ॥

સાલતાલાશ્વકર્ણૈશ્ચ બકુલૈરર્જુનૈસ્તથા ।
ચમ્પકાશોકપુન્નાગૈઃ કેતકૈઃ પાટલૈસ્તથા ॥

કર્ણિકારૈરશોકૈશ્ચ અઙ્કોલૈરતિમુક્તકૈઃ ।
એવમાદિભિરન્યૈશ્ચ સંવૃતે સ શિલાતલે ॥

પુનઃપુનશ્ચિન્તયાનઃ સુભદ્રાં ભદ્રભાષિણીમ્ ।
યદૃચ્છયા ચોપપન્નાન્વૃષ્ણિવીરાન્દદર્શ સઃ ॥

બલદેવં ચ હાર્દિક્યં સામ્બં સારણમેવ ચ ।
પ્રદ્યુમ્નં ચ ગદં ચૈવ ચારુદેષ્ણં વિદૂરથમ્ ॥

ભાનું ચ હરિતં ચૈવ વિપૃથું પૃથુમેવ ચ ।
તથાન્યાંશ્ચ બહૂન્પશ્યન્હૃદિ શોકમધારયત્ ॥

તતસ્તે સહિતાઃ સર્વે યતિં દૃષ્ટ્વા સમુત્સુકાઃ ।
વૃષ્ણયો વિનયોપેતાઃ પરિવાર્યોપતસ્થિરે ॥

તતોઽર્જુનઃ પ્રીતમનાઃ સ્વાગતં વ્યાજહાર સઃ ।
આસ્યતામાસ્યતાં સર્વૈ રમણીયે શિલાતલે ॥

ઇત્યેવમુક્તા યતિના પ્રીતાસ્તે યાદવર્ષભાઃ ।
ઉપોપવિવિશુઃ સર્વે તે સ્વાગતમિતિ બ્રુવન્ ॥

પરિતઃ સન્નિવિષ્ટેષુ વૃષ્ણિવીરેષુ પાણ્ડવઃ ।
આકારં ગૂહમાનસ્તુ કુશલપ્રશ્નમબ્રવીત્ ॥

સર્વત્ર કુશલં ચોક્ત્વા બલદેવોઽબ્રવીદિદમ્ ।
પ્રસાદં કુરુ મે વિપ્ર કુતસ્ત્વં ચાગતો હ્યસિ ॥

ત્વયા દૃષ્ટાનિ પુણ્યાનિ વદ ત્વં વદતાંવર ।
પર્વતાંશ્ચૈવ તીર્થાનિ વનાન્યાયતનાનિ ચ ॥
વૈશમ્પાયન ઉવાચ ।

તીર્થાનાં દર્શનં ચૈવ પર્વતાનાં ચ ભારત ।
આપગાનાં વનાનાં ચ કથયામાસ તાઃ કથાઃ ॥

શ્રુત્વા ધર્મકથાઃ પુણ્યા વૃષ્ણિવીરા મુદાન્વિતાઃ ।
અપૂજયંસ્તદા ભિક્ષું કથાન્તે જનમેજય ॥

તતસ્તુ યાદવાઃ સર્વે મન્ત્રયન્તિ સ્મ ભારત ।
અયં દેશાતિથિઃ શ્રીમાન્યતિલિઙ્ગધરો દ્વિજઃ ॥

આવાસં કમુપાશ્રિત્ય વસેત નિરુપદ્રવઃ ।
ઇત્યેવં પ્રબ્રુવન્તસ્તુ રૌહિણેયં ચ યાદવાઃ ॥

દદૃશુઃ કૃષ્ણમાયાન્તં સર્વે યાદવનન્દનમ્ ।
એહિ કેશવ તાતેતિ રૌહિણેયો વચોઽબ્રવીત્ ॥

યતિલિઙ્ગધરો વિદ્વાન્દેશાતિથિરયં દ્વિજઃ । વર્ષમાસનિવાસાર્થમાગતો નઃ પુરં પ્રતિ ।
સ્થાને યસ્મિન્નિવસતુ તન્મે બ્રૂહિ જનાર્દન ॥
શ્રીકૃષ્ણ ઉવાચ ।

ત્વયિ સ્થિતે મહાભાગ પરવાનસ્મિ ધર્મતઃ ।
સ્વયં તુ રુચિરે સ્થાને વાસયેર્યદુનન્દન ॥

પ્રીતઃ સ તેન વાક્યેન પરિષ્વજ્ય જનાર્દનમ્ ।
બલદેવોઽબ્રવીદ્વાક્યં ચિન્તયિત્વા મહાબલઃ ॥

આરામે તુ વસેદ્ધીમાંશ્ચતુરો વર્ષમાસકાન્ ।
કન્યાગૃહે સુભદ્રાયા ભુક્ત્વા ભોજનમિચ્છયા ॥

લતાગૃહેષુ વસતામિતિ મે ધીયતે મતિઃ ।
લબ્ધાનુજ્ઞાસ્ત્વયા તાત મન્યન્તે સર્વયાદવાઃ ॥
શ્રીકૃષ્ણ ઉવાચ ।

બલવાન્દર્શનીયશ્ચ વાગ્મી શ્રીમાન્બહુશ્રુતઃ ।
કન્યાપુરસમીપે તુ ન યુક્તમિતિ મે મતિઃ ॥

ગુરુઃ શાસ્તા ચ નેતા ચ શાસ્ત્રજ્ઞો ધર્મવિત્તમઃ ।
ત્વયોક્તં ન વિરુધ્યેહં કરિષ્યામિ વચસ્તવ ॥

શુભાશુભસ્ય વિજ્ઞાતા નાન્યોઽસ્મિ ભુવિ કશ્ચન ॥
બલદેવ ઉવાચ ।

અયં દેશાતિથિઃ શ્રીમાન્સર્વધર્મભૃતાં વરઃ ।
ધૃતિમાન્વિનયોપેતઃ સત્યબાદી જિતેન્દ્રિયઃ ॥

યતિલિઙ્ગધરો હ્યેષ કો વિજાનાતિ માનસમ્ ।
ત્વમિમં પુણ્ડરીકાક્ષ નીત્વા કન્યાપુરં શુભમ્ ॥

નિવેદય સુભદ્રાયૈ મદ્વાક્યપરિચોદિતઃ ।
ભક્ષ્યૈર્ભોજ્યૈશ્ચ પાનૈશ્ચ અન્નૈરિષ્ટૈશ્ચ પૂજય ॥