Mahabharata · Chapter 1.236

tataḥ samudre tīrthāni dakṣime bharatarṣabhaḥ /
abhyagacchatsupuṇyāni sobhitāni tapasvibhiḥ //

varjayanti sma tīrtāni tatra pañca sama tāpasāḥ /
avakīrṇāni yānyāsanpurastāttu tapasvibhiḥ //

agastyatīrthaṃ saubhadraṃ paulomaṃ ca supāvanam /
kārandhamaṃ prasannaṃ ca mahamedhaphalaṃ ca tat //

bhāradvājasya tīrthaṃ tu pāpapraśamanaṃ mahat /
etāni pañca tīrthāni dadarśa kurusattamaḥ //

viviktānyupalakṣyātha tāni tīrthāni pāṇḍavaḥ /
dṛṣṭvā ca varjyamānāni munibhirdharmabuddhibhiḥ //

tapasvinastato'pṛcchatprāñjaliḥ kurunandanaḥ /
tīrthānīmāni varjyante kimarthaṃ brahmavādibhiḥ //
tāpasā ūcuḥ /

grāhāḥ pañca vasantyeṣu haranti ca tapodhanān /
tata etāni varjyante tīrthāni kurunandana //
vaiśampāyana uvāca /

teṣāṃ śrutvā mahābāhurvāryamāṇastapodhanaiḥ /
jagāma tāni tīrthāni draṣṭuṃ puruṣasattamaḥ //

tataḥ saubhadramāsādya maharṣestīrthamuttamam /
vigāhya sahasā śūraḥ snānaṃ cakre parantapaḥ //

atha taṃ puruṣavyāghramantarjalacaro mahān /
jagrāha caraṇe grāhaḥ kuntīputraṃ dhanañjayam //

sa tamādāya kaunteyo visphurantaṃ jalecaram /
udatiṣṭhanmahābāhurbalena balināṃ varaḥ //

utkṛṣṭa eva grāhastu so'rjunena yaśasvinā /
babhūva nārī kalyāṇī sarvābharaṇabhūṣaitā //

dīpyamānā śriyā rājandivyarūpā manoramā /
tadadbhutaṃ mahaddṛṣṭvā kuntīputro dhanañjayaḥ //

tāṃ striyaṃ paramaprīta idaṃ vacanamabravīt /
kā vai tvamasi kalyāṇikuto vā'si jalecarī //

kimarthaṃ ca mahatpāpamidaṃ kṛtavatī purā /
vargovāca /
apsarā'smi mahābāho devāraṇyavihāriṇī //

iṣṭā dhanapaternityaṃ vargā nāma mahābala /
mama sakhyaścatasro'nyāḥ sarvāḥ kāmagamāḥ śubhāḥ //

tābhiḥ sārdhaṃ prayātā'smi lokapālaniveśanam /
tataḥ paśyāmahe sarvā brāhmaṇaṃ saṃśitavratam //

rūpavantamadhīyānamekamekāntacāriṇam /
tasyaiva tapasā rājaṃstadvayaṃ tejasā vṛtam //

āditya iva taṃ deśaṃ itvaṃ sarva vyakāśayat /
tasya dṛṣṭvā tapastādṛgrūpacādbhutamuttamam //

avatīrṇāḥ sma taṃ deśaṃ tapovighnacikīrṣayā /
ahaṃ ca saurabheyī ca samīcī budbudā latā //

yaugapadyena taṃ vipramabhyagacchāma bhārata /
gāyantyo'thahasantyaśca lobhayitvā ca taṃ dvijaṃ //

sa ca nāsmāsu kṛtavānmano vīra kathañcana /
nākampata mahātejāḥ sthitastapasi nirmale //

so'śapatkupito'smāṃstu brāhmaṇaḥ kṣatriyarṣabha /
grāhabhūtā jale yūyaṃ cariṣyatha śataṃ samāḥ //