Mahabharata · Chapter 1.235

kathayitvā ca tatsarvaṃ brāhmaṇebhyaḥ sa bhārata /
prayayau himavatpārśvaṃ tato vajradharātmajaḥ //

agastyavaṭamāsādya vasiṣṭhasya ca parvatam /
bhṛgutuṅge ca kaunteyaḥ kṛtavāñśaucamātmanaḥ //

pradadau gosahasrāṇi subahūni ca bhārata /
niveśāṃśca dvijātibhyaḥ so'dadatkurusattamaḥ //

hiraṇyabindostīrthe ca snātvā puruṣasattamaḥ /
dṛṣṭavānpāṇḍavaśreṣṭhaḥ puṇyānyāyatanāni ca //

avatīrya naraśreṣṭho brāhmaṇaiḥ saha bhārata /
prācīṃ diśamabhiprepsurjagāma bharatarṣabhaḥ //

ānupūrvyeṇa tīrthāni dṛṣṭavānkurusattamaḥ /
nadīṃ cotpalinīṃ ramyāmaraṇyaṃ naimiṣaṃ prati //

nandāmaparanandāṃ ca kauśikīṃ ca yaśasvinīm /
mahānadīṃ gayāṃ caiva gaṅgāmapi ca bhārata //

evaṃ tīrthāni sarvāṇi paśyamānastathāśramān /
ātmanaḥ pāvanaṃ kurvanbrāhmaṇebhyo dadau ca gāḥ //

aṅgavaṅgakaliṅgeṣu yāni tīrthāni kānicit /
jagāma tāni sarvāṇi puṇyānyāyatanāni ca //

dṛṣṭvā ca vidhivattāni dhanaṃ cāpi dadau tataḥ / kaliṅgarāṣṭradvāreṣu brāhmaṇāḥ pāṇḍavānugāḥ /
abhyanujñāya kaunteyamupāvartanta bhārata //

sa tu tairabhyanujñātaḥ kuntīputro dhanañjayaḥ /
sahāyairalpakaiḥ śūraḥ prayayau yatra sāgaraḥ //

sa kaliṅgānatikramya deśānāyatanāni ca /
harmyāṇi ramaṇīyāni prekṣaṇāṇo yayau prabhuḥ //

mahendraparvataṃ dṛṣṭvā tāpasairupaśobhitam /
godāvaryāṃ tataḥ snātvā tāmatītya mahābalaḥ //

kāverīṃ tāṃ samāsādya saṅgame sāgarasya ca /
snātvā sampūjya devāṃśca pitṝṃśca munibhiḥ saha //

samudratīreṇa śanairmaṇalūraṃ jagāma ha //

tatra sarvāṇi tīrthāni puṇyānyāyatanāni ca /
abhigamya mahābāhurabhyagacchanmahīpatim //

maṇalūreśvaraṃ rājandharmajñaṃ citravāhanam /
tasya citrāṅgadā nāma duhitā cārudarśanā //

tāṃ dadarśa pure tasminvicarantīṃ yadṛcchayā /
dṛṣṭvā ca tāṃ varārohāṃ cakame caitravāhanīm //

abhigamya ca rājānamavadatsvaṃ prayojanam /
dehi me khalvimāṃ rājankṣatriyāya mahātmane //

tacchrutvā tvabravīdrājā kasya putro'si nāma kim /
uvāca taṃ pāṇḍavo'haṃ kuntīputro dhanañjayaḥ //

tamuvācātha rājā sa sāntvapūrvamidaṃ vacaḥ /
rājā prabhañjano nāma kule'sminsambabhūva ha //

aputraḥ prasavenārthī tapastepe sa uttamam /
ugreṇa tapasā tena devadevaḥ pinākadhṛk //

īśvarastoṣitaḥ pārtha devadevaḥ umāpatiḥ /
sa tasmai bhaghavānprādādekaikaṃ prasavaṃ kule //

ekaikaḥ prasavastasmādbhavatyasminkule sadā /
teṣāṃ kumārāḥ sarveṣāṃ pūrveṣāṃ mama jajñire //

ekā ca mama kanyeyaṃ kulasyotpādanī bhṛśam /
putro mamāyamiti me bhāvanā puruṣarṣabha //

putrikāhetuvidhinā sañjñitā bharatarṣabha /
tasmādekaḥ suto yo'syāṃ jāyate bhārata tvayā //

etacchulkaṃ bhavatvasyāḥ kulakṛjjāyatāmiha /
etena samayenemāṃ pratigṛhṇīṣva pāṇḍava //

sa tatheti pratijñāya tāṃ kanyāṃ pratigṛhya ca / māse trayodaśe pārthaḥ kṛtvā vaivāhikīṃ kriyām /
uvāsa nagare tasminmāsāṃstrīnsa tayā saha //