મહાભારત · અધ્યાય 1.235

કથયિત્વા ચ તત્સર્વં બ્રાહ્મણેભ્યઃ સ ભારત ।
પ્રયયૌ હિમવત્પાર્શ્વં તતો વજ્રધરાત્મજઃ ॥

અગસ્ત્યવટમાસાદ્ય વસિષ્ઠસ્ય ચ પર્વતમ્ ।
ભૃગુતુઙ્ગે ચ કૌન્તેયઃ કૃતવાઞ્શૌચમાત્મનઃ ॥

પ્રદદૌ ગોસહસ્રાણિ સુબહૂનિ ચ ભારત ।
નિવેશાંશ્ચ દ્વિજાતિભ્યઃ સોઽદદત્કુરુસત્તમઃ ॥

હિરણ્યબિન્દોસ્તીર્થે ચ સ્નાત્વા પુરુષસત્તમઃ ।
દૃષ્ટવાન્પાણ્ડવશ્રેષ્ઠઃ પુણ્યાન્યાયતનાનિ ચ ॥

અવતીર્ય નરશ્રેષ્ઠો બ્રાહ્મણૈઃ સહ ભારત ।
પ્રાચીં દિશમભિપ્રેપ્સુર્જગામ ભરતર્ષભઃ ॥

આનુપૂર્વ્યેણ તીર્થાનિ દૃષ્ટવાન્કુરુસત્તમઃ ।
નદીં ચોત્પલિનીં રમ્યામરણ્યં નૈમિષં પ્રતિ ॥

નન્દામપરનન્દાં ચ કૌશિકીં ચ યશસ્વિનીમ્ ।
મહાનદીં ગયાં ચૈવ ગઙ્ગામપિ ચ ભારત ॥

એવં તીર્થાનિ સર્વાણિ પશ્યમાનસ્તથાશ્રમાન્ ।
આત્મનઃ પાવનં કુર્વન્બ્રાહ્મણેભ્યો દદૌ ચ ગાઃ ॥

અઙ્ગવઙ્ગકલિઙ્ગેષુ યાનિ તીર્થાનિ કાનિચિત્ ।
જગામ તાનિ સર્વાણિ પુણ્યાન્યાયતનાનિ ચ ॥

દૃષ્ટ્વા ચ વિધિવત્તાનિ ધનં ચાપિ દદૌ તતઃ । કલિઙ્ગરાષ્ટ્રદ્વારેષુ બ્રાહ્મણાઃ પાણ્ડવાનુગાઃ ।
અભ્યનુજ્ઞાય કૌન્તેયમુપાવર્તન્ત ભારત ॥

સ તુ તૈરભ્યનુજ્ઞાતઃ કુન્તીપુત્રો ધનઞ્જયઃ ।
સહાયૈરલ્પકૈઃ શૂરઃ પ્રયયૌ યત્ર સાગરઃ ॥

સ કલિઙ્ગાનતિક્રમ્ય દેશાનાયતનાનિ ચ ।
હર્મ્યાણિ રમણીયાનિ પ્રેક્ષણાણો યયૌ પ્રભુઃ ॥

મહેન્દ્રપર્વતં દૃષ્ટ્વા તાપસૈરુપશોભિતમ્ ।
ગોદાવર્યાં તતઃ સ્નાત્વા તામતીત્ય મહાબલઃ ॥

કાવેરીં તાં સમાસાદ્ય સઙ્ગમે સાગરસ્ય ચ ।
સ્નાત્વા સમ્પૂજ્ય દેવાંશ્ચ પિતૄંશ્ચ મુનિભિઃ સહ ॥

સમુદ્રતીરેણ શનૈર્મણલૂરં જગામ હ ॥

તત્ર સર્વાણિ તીર્થાનિ પુણ્યાન્યાયતનાનિ ચ ।
અભિગમ્ય મહાબાહુરભ્યગચ્છન્મહીપતિમ્ ॥

મણલૂરેશ્વરં રાજન્ધર્મજ્ઞં ચિત્રવાહનમ્ ।
તસ્ય ચિત્રાઙ્ગદા નામ દુહિતા ચારુદર્શના ॥

તાં દદર્શ પુરે તસ્મિન્વિચરન્તીં યદૃચ્છયા ।
દૃષ્ટ્વા ચ તાં વરારોહાં ચકમે ચૈત્રવાહનીમ્ ॥

અભિગમ્ય ચ રાજાનમવદત્સ્વં પ્રયોજનમ્ ।
દેહિ મે ખલ્વિમાં રાજન્ક્ષત્રિયાય મહાત્મને ॥

તચ્છ્રુત્વા ત્વબ્રવીદ્રાજા કસ્ય પુત્રોઽસિ નામ કિમ્ ।
ઉવાચ તં પાણ્ડવોઽહં કુન્તીપુત્રો ધનઞ્જયઃ ॥

તમુવાચાથ રાજા સ સાન્ત્વપૂર્વમિદં વચઃ ।
રાજા પ્રભઞ્જનો નામ કુલેઽસ્મિન્સમ્બભૂવ હ ॥

અપુત્રઃ પ્રસવેનાર્થી તપસ્તેપે સ ઉત્તમમ્ ।
ઉગ્રેણ તપસા તેન દેવદેવઃ પિનાકધૃક્ ॥

ઈશ્વરસ્તોષિતઃ પાર્થ દેવદેવઃ ઉમાપતિઃ ।
સ તસ્મૈ ભઘવાન્પ્રાદાદેકૈકં પ્રસવં કુલે ॥

એકૈકઃ પ્રસવસ્તસ્માદ્ભવત્યસ્મિન્કુલે સદા ।
તેષાં કુમારાઃ સર્વેષાં પૂર્વેષાં મમ જજ્ઞિરે ॥

એકા ચ મમ કન્યેયં કુલસ્યોત્પાદની ભૃશમ્ ।
પુત્રો મમાયમિતિ મે ભાવના પુરુષર્ષભ ॥

પુત્રિકાહેતુવિધિના સઞ્જ્ઞિતા ભરતર્ષભ ।
તસ્માદેકઃ સુતો યોઽસ્યાં જાયતે ભારત ત્વયા ॥

એતચ્છુલ્કં ભવત્વસ્યાઃ કુલકૃજ્જાયતામિહ ।
એતેન સમયેનેમાં પ્રતિગૃહ્ણીષ્વ પાણ્ડવ ॥

સ તથેતિ પ્રતિજ્ઞાય તાં કન્યાં પ્રતિગૃહ્ય ચ । માસે ત્રયોદશે પાર્થઃ કૃત્વા વૈવાહિકીં ક્રિયામ્ ।
ઉવાસ નગરે તસ્મિન્માસાંસ્ત્રીન્સ તયા સહ ॥