Mahabharata · Chapter 1.234

taṃ prayāntaṃ mahābāhuṃ kauravāṇāṃ yaśaskaram /
anujagmurmahātmāno brāhmaṇā vedapāragāḥ //

vedavedāṅgavidvāsastathaivādhyātmacintakāḥ /
bhaikṣāśca bhagavadbhaktāḥ sūtāḥ paurāṇikāśca ye //

kathakāścāpare rājañśramaṇāśca vanaukasaḥ /
divyākhyānāni ye cāpi paṭhanti madhuraṃ dvijāḥ //

etaiścānyaiśca bahubhiḥ sahāyaiḥ pāṇḍunandanaḥ /
vṛtaḥ ślakṣṇakathaiḥ prāyānmarudbhiriva vāsavaḥ //

ramaṇīyāni citrāṇi vanāni ca sarāṃsi ca /
saritaḥ sāgarāṃścaiva deśānapi ca bhārata //

puṇyānyapi ca tīrthāni dadarśa bharatarṣabhaḥ /
sa gaṅgādvāramāśritya niveśamakarotprabhuḥ //

tatra tasyādbhutaṃ karma śṛṇu tvaṃ janamejaya /
kṛtavānyadviśuddhātmā pāṇḍūnāṃ pravaro hi saḥ //

niviṣṭe tatra kaunteye brāhmaṇeṣu ca bhārata /
agnihotrāṇi viprāste prāduścakruranekaśaḥ //

teṣu prabodhyamāneṣu jvaliteṣu huteṣu ca /
kṛtapuṣpopahāreṣu tīrāntaragateṣu ca //

kṛtābhiṣekairvidvadbhirniyataiḥ satpathe sthitaiḥ /
śuśubhe'tīva tadrājangaṅgādvāraṃ mahātmabhiḥ //

tathā paryākule tasminniveśe pāṇḍavarṣabhaḥ /
abhiṣekāya kaunteyo gaṅgāmavatatāra ha //

tatrābhiṣekaṃ kṛtvā sa tarpayitvā pitāmahān /
uttitīrṣurjalādrājannagnikāryacikīrṣayā //

apakṛṣṭo mahābāhurnāgarājasya kanyayā /
antarjale mahārāja ulūpyā kāmayānayā //

dadarśa pāṇḍavastatra pāvakaṃ susamāhitaḥ /
kauravyasyātha nāgasya bhavane paramārcite //

tatrāgnikāryaṃ kṛtavānkuntīputro dhanañjayaḥ /
aśaṅkamānena hutastenātuṣyaddhutāśanaḥ //

agnikāryaṃ sa kṛtvā tu nāgarājasutāṃ tadā /
prasahanniva kaunteya idaṃ vacanamabravīt //

kimidaṃ sāhasaṃ bhīru kṛtavatyasi bhāmini /
kaścāyaṃ subhage deśaḥ kā ca tvaṃ kasya vātmajā //
ulūpyuvāca /

airāvatakule jātaḥ kauravyo nāma pannagaḥ /
tasyāsmi duhitā rājannulūpī nāma pannagī //

sā'haṃ tvāmabhiṣekārthamavatīrṇaṃ samudgām /
dṛṣṭvaiva puruṣavyāghra kandarpeṇābhimūrcchitā //

tāṃ māmanaṅgaglapitāṃ tvatkṛte kurunandana /
ananyāṃ nandayasvādya pradānenātmano'nagha //
arjuna uvāca /

brahmacaryamidaṃ bhadre mama dvādaśamāsikam /
dharmarājena cādiṣṭaṃ nāhamasmi svayaṃ vaśaḥ //

tava cāpi priyaṃ kartumicchāmi jalacāriṇi /
anṛtaṃ noktapūrvaṃ ca mayā kiñcana karhicit //

kathaṃ ca nānṛtaṃ me syāttava cāpi priyaṃ bhavet /
na ca pīḍyeta me dharmastathā kuryā bhujaṅgame //
ulūpyuvāca /

jānāmyahaṃ pāṇḍaveya yathā carasi medinīm /
yathā ca te brahmacaryamidamādiṣṭavānguruḥ //

parasparaṃ vartamānāndrupadasyātmajāṃ prati /
yo no'nupraviśenmohātsa vai dvādaśamāsikam //

vane caredbrahmacaryamiti vaḥ samayaḥ kṛtaḥ /
tadidaṃ daupadīhetoranyonyasya pravāsanam //

kṛtavāṃstatra dharmārthamatra dharmo na duṣyati /
paritrāṇaṃ ca kartavyamārtānāṃ pṛthulocana //

kṛtvā mama paritrāṇaṃ tava dharmo na lupyate /
yadi vāpyasya dharmasya sūkṣmo'pi syādvyatikramaḥ //

sa ca te dharma eva syāddatvā prāṇānmamārjuna /
bhaktāṃ ca bhaja māṃ pārtha satāmetanmataṃ prabho //

na kariṣyasi cedevaṃ mṛtāṃ māmupadhāraya /
prāṇadānānmahābāho cara dharmamanuttamam //

śaraṇaṃ ca prapannāsmi tvāmadya puruṣottama /
dīnānanāthānkaunteya parirakṣasi nityaśaḥ //

sā'haṃ śaṟaṇamabhyemi roravīmi ca duḥkhitā / yāce tvāṃ cābhikāmāhaṃ tasmātkuru mama priyam /
sa tvamātmapradānena sakāmāṃ kartumarhasi //
vaiśampāyana uvāca /

evamuktastu kaunteyaḥ pannageśvarakanyayā /
kṛtavāṃstattathā sarvaṃ dharmamuddiśya kāraṇam //

sa nāgabhavane rātriṃ tāmuṣitvā pratāpavān /
putramutpādayāmāsa sa tasyāṃ sumanoharam //

irāvantaṃ mahābhāgaṃ mahābalaparākramam / udite'bhyutthitaḥ sūrye kauravyasya niveśanāt //

āgatastu punastatra gaṅgādvāraṃ tayā saha /
parityajya gatā sādhvī ulūpī nijamandiraṃ //

dattvā varamajeyatvaṃ jale sarvatra bhārata /
sādhyā jalacarāḥ sarve bhaviṣyanti na saṃśayaḥ //