Mahabharata · Chapter 1.233

evaṃ te samayaṃ kṛtvā nyavasaṃstatra pāṇḍavāḥ /
vaśe śastrapratāpena kurvanto'nyānmahīkṣitaḥ //

teṣāṃ manujasiṃhānāṃ pañcānāmamitaujasām /
babhūva kṛṣṇā sarveṣāṃ pārthānāṃ vaśavartinī //

te tayā taiśca sā vīraiḥ patibhiḥ saha pañcabhiḥ /
babhūva paramaprītā nāgairiva sarasvatī //

vartamāneṣu dharmeṇa pāṇḍaveṣu mahātmasu /
vyavardhankuravaḥ sarve hīnadoṣāḥ sukhānvitāḥ //

atha dīrgheṇa kālena brāhmaṇasya viśāmpate /
kasyacittaskarā jahruḥ kecidgā nṛpasattama //

hriyamāṇe dhane tasminbrāhmaṇaḥ krodhamūrcchitaḥ /
āgamya khāṇḍavaprasthamudakrośatsa pāṇḍavān //

hriyate godhanaṃ kṣudrairnṛśaṃsairakṛtātmabhiḥ /
prasahya cāsmadviṣayādabhyadhāvata pāṇḍavāḥ //

brāhmaṇasya praśāntasya havirdhvāṅkṣaiḥ pralupyate /
śārdūlasya guhāṃ śūnyāṃ nīcaḥ kroṣṭābhimardati //

arakṣitāraṃ rājānaṃ baliṣadbhāgahāriṇam /
tamāhuḥ sarvalokasya samagraṃ pāpacāriṇam //

brāhmaṇasve hṛte corairdharmārthe ca vilopite /
rorūyamāṇe ca mayi kriyatāṃ hastadhāraṇā //
vaiśampāyana uvāca /

rorūyamāṇasyābhyāśe bhṛśaṃ viprasya pāṇḍavaḥ /
tāni vākyāni śuśrāva kuntīputro dhanañjayaḥ //

śrutvaiva ca mahābāhurmā bhairityāha taṃ dvijam /
āyudhāni ca yatrāsanpāṇḍavānāṃ mahātmanāṃ //

kṛṣṇayā saha tatrāste dharmarājo yudhiṣṭhiraḥ /
sampraveśāya cāśakto gamanāya ca pāṇḍavaḥ //

tasya cārtasya tairvākyaiścodyamānaḥ punaḥpunaḥ /
ākrande tatra kaunteyaścintayāmāsa duḥkhitaḥ //

hriyamāṇe dhane tasminbrāhmaṇasya tapasvinaḥ /
aśrupramārjanaṃ tasya kartavyamiti niścayaḥ //

uparrekṣaṇajo'dharmaḥ sumahānsyānmahīpateḥ /
yadyasya rudato dvāri na karomyadya rakṣaṇam //

anāstikyaṃ ca sarveṣāmasmākamapi rakṣaṇe /
pratitiṣṭheta loke'sminnadharmaścaiva no bhavet //

anāpṛcchaya tu rājānaṃ gate mayi na saṃśayaḥ /
ajātaśatrornṛpatermayi caivānṛtaṃ bhavet //

anupraveśe rājñastu vanavāso bhavenmama /
sarvamanyatparihṛtaṃ dharṣaṇāttu mahīpateḥ //

adharmo vai mahānastu vane vā maraṇaṃ mama /
śarīrasya vināśena dharma eva viśiṣyate //

evaṃ viniścitya tataḥ kuntīputro dhanañjayaḥ /
anupraviśya rājānamāpṛcchaya ca viśāmpate //

mukhamācchādya nibiḍamuttarīyeṇa vāsasā / agrajaṃ cārjuno gehādabhivādyāśu niḥsṛtaḥ //

dhanurādāya saṃhṛṣṭo brāhmaṇaṃ pratyabhāṣata /
brāhmaṇā gamyatāṃ śīghraṃ yāvatparadhanairṣiṇaḥ //

na dūre te gatāḥ kṣudrāstāvadgacchāvahe saha /
yāvannivartayāmyadya corahastāddhanaṃ tava //

so'nusṛtya mahābāhurdhanvī varmī rathī dhvajī /
śarairvidhvasya tāṃścorānavajitya ca taddhanam //

brāhmaṇaṃ samupākṛtya yaśaḥ prāpya ca pāṇḍavaḥ /
tatastadgedhanaṃ pārtho dattvā tasmai dvijātaye //

ājagāma puraṃ vīraḥ savyasācī dhanañjayaḥ /
so'bhivādya gurūnsarvānsarvaiścāpyabhinanditaḥ //

dharmarājamuvācedaṃ vratamādiśa me prabho /
samayaḥ samatikrānto bhavatsandarśane mayā //

vanavāsaṃ gamiṣyāmi samayo hyeṣa naḥ kṛtaḥ /
ityukto dharmarāstu sahasā vākyamapriyam //

kathamityabravīdvācā śokārtaḥ sajjamānayā /
yudhiṣṭhiro guḍākeśaṃ bhrātā bhrātaramacyutam //

uvāca dīno rājā ca dhanañjayamidaṃ vacaḥ /
pramāṇamasmi yadi te mattaḥ śṛṇu vaco'nagha //

anupraveśe yadvīra kṛtavāṃstvaṃ mamāpriyam /
sarvaṃ tadanujānāmi vyalīkaṃ na ca me hṛdi //

guroranupraveśo hi nopaghāto yavīyasaḥ /
yavīyaso'nupraveśo jyeṣṭhasya vidhilopakaḥ //

nivartasva mahābāho kuruṣva vacanaṃ mama /
na hi te dharmalopo'sti na ca te dharpaṇā kṛtā //
arjuna uvāca /

na vyājena careddharmamiti me bhavataḥ śrutam /
na satyādvicaliṣyāmi satyenāyudhamālabhe //
vaiśampāyana uvāca /

so'bhyanujñāya rājānaṃ vanacaryāya dīkṣitaḥ /
vane dvādaśa māsāṃstu vāsāyānujagāma ha //