Mahabharata · Chapter 1.232

jitvā tu pṛthivīṃ daityau niḥsapatnau gatavyathau /
kṛtvā trailokyamavyagraṃ kṛtakṛtyau babhūvatuḥ //

devagandharvayakṣāṇāṃ nāgapārthivarakṣasām /
ādāya sarvaratnāni parāṃ tuṣṭimupāgatau //

yadā na pratiṣeddhārastayoḥ santīha kecana //
nirudyogau tadā bhūtvā vijahrāte'marāviva //

strībhirmālyaiśca gandhaiśca bhakṣyabhojyaiḥ supuṣkalaiḥ /
pānaiśca vividhairhṛdyaiḥ parāṃ prītimavāpatuḥ //

antaḥpuravanodyāne parvateṣu vaneṣu ca /
yathepsiteṣu deśeṣu vijahrāte'marāviva //

tataḥ kadācidvindhyasya prasthe samaśilātale /
puṣpitāgreṣu sāleṣu vihāramabhijagmatuḥ //

divyeṣu sarvakāmeṣu samānīteṣu tāvubhau /
varāsaneṣu saṃhṛṣṭau saha strībhirniṣīdatuḥ //

tato vāditranṛttābhyāmupātiṣṭhanta tau striyaḥ /
gītaiśca stutisaṃyuktaiḥ prītyā samupajagmire //

tatastilottamā tatra vane puṣpāṇi cinvatī /
veṣaṃ sā kṣiptamādhāya raktenaikena vāsasā //

nadītīreṣu jātānsā karṇikārānpracinvatī /
śanairjagāma taṃ deśaṃ yatrāstāṃ tau mahāsurau //

tau tu pītvā varaṃ pānaṃ madaraktāntalocanau /
dṛṣṭvaiva tāṃ varārohāṃ vyathitau sambabhūvatuḥ //

tāvutthāyāsanaṃ hitvā jagmaturyatra sā sthitā /
ubhau ca kāmasammattāvubhau prārthayataśca tām //

dakṣiṇe tāṃ kare subhrūṃ sundo jagrāha pāṇinā /
upasundopi jagrāha vāme pāṇau tilottamām //

varapradānamattau tāvaurasena balena ca /
dhanaratnamadābhyāṃ ca surāpānamadena ca //

sarvairetairmadairmattāvanyonyaṃ bhrukuṭīkṛtau /
madakāmasamāviṣṭau parasparamathocatuḥ //

mama bhāryā tava gururiti sundo'bhyabhāṣata /
mama bhāryā tava vadhūrupasundo'bhyabhāṣata //

naiṣā tava mamaiṣeti tatastau manyurāviśat /
tasyā rūpeṇa sammattau vigatasnehasauhṛdau //

tasyā hetorgade bhīme sangṛhṇītāmubhau tadā /
pragṛhya ca gade bhīme tasyāṃ tau kāmamohitau //

ahampūrvamahampūrvamityanyonyaṃ nijaghnatuḥ /
tau gadābhihatau bhīmau petaturdharaṇītale //

rudhireṇāvasiktāṅgau dvāvivārkau nabhaścyutau /
tatastā vidrutā nāryaḥ sa ca daityagaṇastathā //

pātālamagamatsarvo viṣādabhayakampitaḥ /
tataḥ pitāmahastatra sahadevairmaharṣibhiḥ //

ājagāma viśuddhātmā pūjayaṃśca tilottamām /
vareṇa cchandayāmāsa bhagavānprapitāmahaḥ //

varaṃ ditsuḥ sa tatraināṃ prītaḥ prāha pitāmahaḥ /
ādityacaritām̐llokānvicariṣyasi bhāmini //

tejasā ca sudṛṣṭāṃ tvāṃ na kariṣyati kaścana /
evaṃ tasyai varaṃ datvā sarvalokapitāmahaḥ //

indre trailokyamādhāya brahmalokaṃ gataḥ prabhuḥ /
evaṃ tau sahitau bhaūtvā sarvārtheṣvekaniścayau //

tilottamārthaṃ sankruddhāvanyonyamabhijaghnatuḥ /
tasmādbravīmi vaḥ snehātsarvābharatasattamāḥ //

yathā vo nātra bhedaḥ syātsarveṣāṃ draupadīkṛte /
tathā kuruta bhadraṃ vo mama cetpriyamicchatha //
vaiśampāyana uvāca /

evamuktā mahātmāno nāradena maharṣiṇā / samayaṃ cakrire rājaṃste'nyonyavaśamāgatāḥ /
samakṣaṃ tasya devarṣernāradasyāmitaujasaḥ //

ekaikasya gṛhe kṛṣṇā vasedvarṣamakalmaṣā draupadyā naḥ sahāsīnānanyonyaṃ yo'bhidarśayet /
sa no dvādaśa māsāni brahmacārī vane vaset //

kṛte tu samaye tasminpāṇḍavairdharmacāribhiḥ /
nārado'pyagamatprīta iṣṭaṃ deśaṃ mahāmuniḥ //

evaṃ taiḥ samayaḥ pūrvaṃ kṛto nāradacoditaiḥ /
na cābhidyanta te sarve tadānyonyena bhārata //

abhyanandanta te sarve tadānyonyaṃ ca pāṇḍavāḥ /
etadvistaraśaḥ sarvamākhyātaṃ te narādhipa //

kāle ca tasminsampanne yathāvajjanamejaya //