Mahabharata · Chapter 1.230

utsave vṛttamātre tu trailokyākāṅkṣiṇāvubhau /
mantrayitvā tataḥ senāṃ tāvajñāpayatāṃ tadā //

suhṛdbhirapyanujñātau daityairvṛddhaiśca mantribhiḥ /
kṛtvā prāsthānikaṃ rātrau maghāsu yayatustadā //

gadāpiṭṭaśadhāriṇyā śūlamudgarahastayā /
prasthitau saha varmiṇyā mahatyā daityasenayā //

maṅgalaiḥ stutibhiścāpi vijayapratisaṃhitaiḥ /
cāraṇaiḥ stūyamānau tau jagmatuḥ parayā mudā //

tāvantarikṣamutplutya daityau kāmagamāvubhau /
devānāmeva bhavanaṃ jagmaturyuddurmadau //

tayorāgamanaṃ jñātvā varadānaṃ ca tatprabhoḥ /
hitvā triviṣṭapaṃ jagmurbrahmalokaṃ tataḥ surāḥ //

tāvindralokaṃ nirjitya yakṣarakṣogaṇāṃstadā /
khecarāṇyapi bhūtāni jaghnatustīvravikramau //

antarbhūmigatānnāgāñjitvā tau ca mahārathau /
samudravāsinīḥ sarvā mlecchajātīrvijigyatuḥ //

tataḥ sarvāṃ mahīṃ jetumārabdhāvugraśāsanau /
sainikāṃśca samāhūya sutīkṣṇaṃ vākyamūcatuḥ //

rājarṣayo mahāyajñairhavyakavyairdvijātayaḥ /
tejo balaṃ ca devānāṃ vardhanti śriyaṃ tathā //

teṣāmevaṃ pravṛttānāṃ sarveṣāmasuradviṣām /
sambhūya sarvairasmābhiḥ kāryaḥ sarvātmanā vadhaḥ //

evaṃ sarvānsamādiśya pūrvatīre mahodadheḥ /
krūrāṃ matiṃ samāsthāya jagmatuḥ sarvatomukhau //

yajñairyajanti ye kecidyājayanti ca ye dvijāḥ /
tānsarvānprasabhaṃ hatvā balinau jagmatustataḥ //

āśrameṣvagnihotrāṇi munīnāṃ bhāvitātmanām /
gṛhītvā prakṣipantyapsu viśrabdhaṃ sainikāstayoḥ //

tapodhanaiśca ye kruddhaiḥ śāpā uktā mahātmabhiḥ /
nākrāmanta tayoste'pi varadānanirākṛtāḥ //

nākrāmanta yadā śāpā bāṇā muktāḥ śilāsviva /
niyamānsamparityajya vyadravanta dvijātayaḥ //

pṛthivyāṃ ye tapaḥsiddhā dāntāḥ śamaparāyaṇāḥ /
tayorbhayāddudruvuste vainateyādivoragāḥ //

mathitairāśramairbhagnairvikīrṇakalaśasruvaiḥ /
śūnyamāsījjagatsarvaṃ kāleneva hataṃ tadā //

tato rājannadṛśyadbhirṛṣibhiśca mahāsurau /
ubhau viniścayaṃ kṛtvā vikurvāte vadhaiṣiṇau //

prabhinnakaraṭau mattau bhūtvā kuñjararūpiṇau /
saṃlīnamapi durgeṣu ninyaturyamasādanam //

siṃhau bhūtvā punarvyāghrau punaścāntarhitāvubhau /
taistairupāyaistau krūrāvṛṣīndṛṣṭvā nijaghnatuḥ //

nivṛttayajñasvādhyāyā pranaṣṭanṛpatidvijā /
utsannotsavayajñā ca babhūva vasudhā tadā //

hāhābhūtā bhayārtā ca nivṛttavipaṇāpaṇā /
nivṛttadevakāryā ca puṇyodvāhavivarjitā //

nivṛttakṛṣigorakṣā vidhvastanagarāśramā /
asthikaṅkālasankīrṇā bhūrbabhūvogradarśanā //

nivṛttapitṛkāryaṃ ca nirvaṣaṭkāramaṅgalam /
jagatpratibhayākāraṃ duṣprekṣyamabhavattadā //

candrādityau grahāstārā nakṣatrāṇi divaukasaḥ /
jagmurviṣādaṃ tatkarma dṛṣṭvā sundopasundayoḥ //

evaṃ sarvā diśo daityau jitvā krūreṇa karmaṇā /
niḥsapatnau kurukṣetre niveśamabhicakratuḥ //