Mahabharata · Chapter 1.217

tato rājñāṃ cairarāptaiḥ pravṛttirupanīyata /
pāṇḍavairupasampannā draupadī patibhiḥ śubhā //

yena taddhanurādāya lakṣyaṃ viddhaṃ mahātmanā /
so'rjuno jayatāṃ śreṣṭho mahābāṇadhanurdharaḥ //

yaḥ śalyaṃ madrarājaṃ vai protkṣipyāpātayadbalī /
trāsayāmāsa sankruddho vṛkṣeṇa puruṣānraṇe //

na cāsya sambhramaḥ kaścidāsīttatra mahātmanaḥ /
sa bhīmo bhīmasaṃsparśaḥ śatrusenāṅgapātanaḥ //

yo'sāvatyakramīdyudhyanyuddhe duryodhanaṃ tathā /
sa rājā pāṇḍavaśreṣṭhaḥ puṇyabhāgbuddhivardhanaḥ //

duryodhanasyāvarajairyau yudhyetāṃ pratīpavat / tau yamau vṛttasampannau sampannabalavikramau //

brahmarūpadharāñśrutvā praśāntānpāṇḍunandanān /
kaunteyānmanujendrāṇāṃ vismayaḥ samajāyata //

paurā hi sarve rājanyāḥ samapadyanta vismitāḥ / saputrā hi purā kuntī dagdhā jatugṛhe śrutā //

sarvabhūmipatīnāṃ ca rāṣṭrāṇāṃ ca yaśasvinī / punarjātāniva ca tāṃste'manyanta narādhipāḥ //

dhigakurvaṃstadā bhīṣmaṃ dhṛtarāṣṭraṃ ca kauravam /
karmaṇā'tinṛśaṃsena purocanakṛtena vai //

dhārmikānvṛttasampannānmātuḥ priyahite ratān /
yadā tānīdṛśānpārthānutsādayitumicchati //

tataḥ svayaṃvare vṛtte dhārtarāṣṭrāśca bhārata /
mantrayanti tataḥ sarve karṇasaubaladūṣitāḥ //
śakuniruvāca /

kaścicchatruḥ karśanīyaḥ pīḍanīyastathā'paraḥ /
utsādanīyāḥ kaunteyāḥ sarvakṣatrasya me matāḥ //

evaṃ parājitāḥ sarve yadi yūyaṃ gamiṣyatha /
akṛtvā saṃvidaṃ kāñcinmanastapsyatyasaṃśayam //

ayaṃ deśaśca kālaśca pāṇḍavāharaṇāya naḥ /
na cedevaṃ kariṣyadhvaṃ loke hāsyā bhaviṣyatha //

yamete saṃśritā vastuṃ kāmayante ca bhūmipam /
so'lpavīryabalo rājā drupado vai mato mama //

yāvadetānna jānanti jīvato vṛṣṇipuṅgavāḥ /
caidyaśca puruṣavyāghraḥ śiśupālaḥ pratāpavān //

ekībhāvaṃ gato rājñā drupadena mahātmanā /
durādharṣatarā rājanbhaviṣyanti na saṃśayaḥ //

yāvaccañcalatāṃ sarve prāpnuvanti narādhipāḥ /
tāvadeva vyavasyāmaḥ pāṇḍavānāṃ vadhaṃ prati //

muktā jatugṛhādbhīmādāśīviṣamukhādiva /
punaste yadi mucyante mahanno bhayamāgatam //

teṣāmihopayātānāmeṣāṃ tu ciravāsinām /
antare duṣkaraṃ sthātuṃ gajayormahatoriva //

hanadhvaṃ pragṛhītāni balāni balināṃ varāḥ /
yāvannaḥ kurusenāyāṃ patanti patagā iva //

tāvatsarvābhisāreṇa purametadvihanyatām /
etanmama mataṃ caiva prāptakālaṃ nararṣabha //
vaiśampāyana uvāca /

śakunervacanaṃ śrutvā bhāṣamāṇasya durmateḥ /
somadattiridaṃ vākyaṃ jagāda paramaṃ tataḥ //

prakṛtīḥ sapta vai jñātvā ātmanaśca parasya ca /
tathā deśaṃ ca kālaṃ ca ṣaḍvidhānsa nayodguṇān //

sthānaṃ vṛddhiṃ kṣayaṃ caiva bhūmiṃ mitrāṇi vikramam /
prasamīkṣyābhiyuñjīta paraṃ vyasanapīḍitam //

tato'haṃ pāṇḍavānmanye mitrakośasamanvitān /
balasthānvikramasthāṃśca svakṛtaiḥ prakṛtipriyān //

vapuṣā hi tu bhūtānāṃ netrāṇi hṛdayāni ca /
śrotraṃ madhurayā vācā ramayatyarjuno nṛṇām //

na tu kevaladaivena prajā bhāvena bhejire /
yadbabhūva manaḥkāntaṃ karmaṇā sa cakāra tat //

na hyayuktaṃ na cāsaktaṃ nānṛtaṃ na ca vipriyam /
bhāṣitaṃ cārubhāṣasya jajñe pārthasya bhāratī //

tānevanguṇasampannānsampannānrājalakṣaṇaiḥ /
na tānpaśyāmi ye śaktāḥ samucchettuṃ yathā balāt //

prabhāvaśaktirvipulā mantraśaktiśca puṣkalā /
tathaivotsāhaśaktiśca pārtheṣvapyadhitiṣṭhati //

maulamitrabalānāṃ ca kālajño vai yudhiṣṭiraḥ /
sāmnā dānena bhedena daṇḍeneti yudhiṣṭhiraḥ //

amitrāṃśca tato jetunaṃ na roṣeṇeti me matiḥ /
parikrīya dhanaiḥ śatruṃ mitrāṇi ca balāni ca //

mūlaṃ ca sukṛtaṃ kṛtvā bhuṅkte bhūmiṃ ca pāṇḍavaḥ /
aśakyānpāṇḍavānmanye devairapi savāsavaiḥ //

yeṣāmarthe sadā yuktau kṛṣṇasankarṣaṇāvubhau /
śreyaśca yadi manyadvaṃ manmataṃ yadi vā matam //

saṃvidaṃ pāṇḍavaiḥ sarvaiḥ kṛtvā yāma yathāgatam /
gopurāṭṭālakairuccairupatalpaśatairapi //

guptaṃ puravaraśreṣṭhametadadbhiśca saṃvṛtam /
tṛṇadhānyendharasaistathā yantrāyudhauṣadhaiḥ //

yuktaṃ bahukavāṭaiśca dravyāgārasuvedikaiḥ /
bhīmocchritamahācakraṃ bṛhadaṭṭālasaṃvṛtam //

dṛḍhaprākāraniryūhaṃ śataghnīśatasankulam /
aiṣṭako dāravo vapro mānuṣaśceti yaḥ smṛtaḥ //

prākārakartṛbhirvīrairnṛgarbhastatra pūjitaḥ /
tadetannaragarbheṇa pāṇḍareṇa virājate //

sālenānekatālena sarvataḥ saṃvṛtaṃ puram /
anuraktāḥ prakṛtayo drupadasya mahātmanaḥ //

dānamānārjitāḥ sarve bāhyābhyantaragāśca ye /
pratiruddhānimāñjñātvā rājabhirbhīmavikramaiḥ //

upayāsyanti dāśārhāḥ samudagrocchritāyudhāḥ /
tasmātsanndhiṃ vayaṃ kṛtvā dhārtarāṣṭrasya pāṇḍavaiḥ //

svarāṣṭrameva gacchāmo yadyāptaṃ vacanaṃ mama / etanmama mataṃ sarvaiḥ kriyatāṃ yadi rocate /
etaddhi sukṛtaṃ manye kṣemaṃ cāpi mahībhitām //