Mahabharata · Chapter 1.210

tata āhūya pāñcālyo rājaputraṃ yudhiṣṭhiram /
parigraheṇa brāhmeṇa parigṛhya mahādyutiḥ //

paryapṛcchadadīnātmā kuntīputraṃ suvarcasam /
kathaṃ jānīma bhavataḥ kṣatriyānbrāhmaṇānuta //

vaiśyānvā guṇasampannānatha vā śūdrayonijān /
māyāmāsthāya vā siddhāṃścarataḥ sarvatodiśam //

kṛṣṇāhetoranuprāptā devāḥ sandarśanārthinaḥ /
bravītu no bhavānsatyaṃ sandeho hyatra no mahān //

api naḥ saṃśayasyānte manaḥ santuṣṭimāvahet /
api no bhāgadheyāni śubhāni syuḥ parantapa //

icchayā brūhi tatsatyaṃ satyaṃ rājasu śobhate /
iṣṭāpūrtena ca tathā vaktavyamanṛtaṃ na tu //

śrutvā hyamarasaṅkāśa tava vākyamarindama /
dhruvaṃ vivāhakaraṇamāsthāsyāmi vidhānataḥ //
yudhiṣṭhira uvāca /

mā rājanvimanā bhūstvaṃ pāñcālya prītirastu te /
īpsitaste dhruvaḥ kāmaḥ saṃvṛtto'yamasaṃśayam //

vayaṃ hi kṣatriyā rājanpāṇḍoḥ putrā mahātmanaḥ /
jyeṣṭhaṃ māṃ viddhi kaunteyaṃ bhīmasenārjunāvimau //

ābhyāṃ tava sutā rājannirjitā rājasaṃsadi /
yamau ca tatra kuntī ca yatra kṛṣmā vyavasthitā //

vyetu te mānasaṃ duḥkhaṃ kṣatriyāḥ smo nararṣabha /
padminīva suteyaṃ te hradādanyahradaṃ gatā //

iti tathyaṃ mahārāja sarvametadbravīmi te /
bhavānhi gururasmākaṃ paramaṃ ca parāyaṇam //
vaiśampāyana uvāca /

tataḥ sa drupado rājā harṣavyākulalocanaḥ /
prativaktuṃ mudā yukto nāśakattaṃ yudhiṣṭiram //

yatnena tu sa taṃ harṣaṃ sannigṛhya parantapaḥ /
anurūpaṃ tadā vācā pratyuvāca yudhiṣṭhiram //

papraccha cainaṃ dharmātmā yathā te pradrutāḥ purāt /
sa tasmai sarvamācakhyāvānupūrvyeṇa pāṇḍavaḥ //

tacchrutvā drupado rājā kuntīputrasya bhāṣitam /
vigarhayāmāsa tadā dhṛtarāṣṭraṃ nareśvaram //

āśvāsayāmāsa ca taṃ kuntīputraṃ yudhiṣṭhiram /
pratijajñe ca rājyāya drupado vadatāṃ varaḥ //

tataḥ kuntī ca kṛṣṇā ca bhīmasenārjunāvapi /
yamau ca rājñā sandiṣṭaṃ viviśurbhavanaṃ mahat //

tatra te nyavasanrājanyajñasenena pūjitāḥ /
pratyāśvastastato rājā saha putrairuvāca tam //

gṛhṇātu vidhivatpāṇimadyāyaṃ kurunandanaḥ /
puṇye'hani mahābāhurarjunaḥ kurutāṃ kṣaṇam //
vaiśampāyana uvāca /

tamabravīttato rājā dharmātmā ca yudhiṣṭhiraḥ /
mamāpi dārasambandhaḥ kāryastāvadviśāmpate //

tasmātpūrvaṃ mayā kāryaṃ tadbhavānanumanyatām /
drupada uvāca /
bhavānvā vidhivatpāṇiṃ gṛhṇātu duhiturmama /
yasya vā manyase vīra tasya kṛṣṇāmupādiśa //
yudhiṣṭhira uvāca /

sarveṣāṃ mahiṣī rājandraupadī no bhaviṣyati /
evaṃ pravyāhṛtaṃ pūrvaṃ mama mātrā viśāmpate //

ahaṃ cāpyaniviṣṭo vai bhīmasenaśca pāṇḍavaḥ /
pārthena vijitā caiṣā ratnabhūtā sutā tava //

eṣa naḥ samayo rājam̐llabdhasya saha bhojanam /
na ca taṃ hātumicchāmaḥ samayaṃ rājasattama //

akrameṇa niveśe ca dharmalopo mahānbhavet / sarveṣāṃ dharmataḥ kṛṣṇā mahiṣī no bhaviṣyati /
ānupūrvyeṇa sarveṣāṃ gṛhṇātu jvalane karān //
drupada uvāca /

ekasya bahvyo vihitā mahiṣyaḥ kurunandana /
naikasyā bahavaḥ puṃsaḥ śrūyante patayaḥ kvacit //

so'yaṃ na loke vede vā jātu dharmaḥ praśaste / lokavedaviruddhaṃ tvaṃ nādharmaṃ dharmavicchuciḥ /
kartumarhasi kaunteya kasmātte buddhirīdṛśī //
yudhiṣṭhira uvāca /

sūkṣmo dharmo mahārāja nāsya vidmo vayaṃ gatim /
pūrveṣāmānupūrvyeṇa yātaṃ vartmā'nuyāmahe //

na me vāganṛtaṃ prāha nādharme dhīyate matiḥ /
evaṃ caiva vadatyambā mama caitanmanogatam //

āśrame rudranirdiṣṭādvyāsādetanmayā śrutam / eṣa dharmo dhruvo rājaṃścarainamavicārayan /
mā ca śaṅkā tatra te syātkathañcidapi pārthiva //
drupada uvāca /

tvaṃ ca kuntī ca kauntaya dhṛṣṭadyumnaśca me sutaḥ /
kathayantviti kartavyaṃ śvaḥ kālye karavāmahe //
vaiśampāyana uvāca /

te sametya tataḥ sarve kathayanti sma bhārata /
atha dvaipāyano rājannabhyāgacchadyadṛcchayā //