Mahabharata · Chapter 1.209

janyārthamannaṃ drupadena rājñā vivāhahetorupasaṃskṛtaṃ ca /
tadāpnuvadhvaṃ kṛtasarvakāryāḥ kṛṣṇā ca tatraitu ciraṃ na kāryam //

ime rathāḥ kāñcanapadmacitrāḥ sadaśvayuktā vasudhādhipārhāḥ /
etānsamāruhya paraita sarve pāñcālarājasya niveśanaṃ tat //
vaiśampāyana uvāca /

tataḥ prayātāḥ kurupungavāste purohitaṃ taṃ pariyāpya sarve /
āsthāya yānāni mahānti tāni kuntī ca kṛṣṇā ca sahaikayāne //

strībhiḥ sugandhāmbaramālyadānai- rvibhūṣitā ābharaṇairvicitraiḥ /
māṅgalyagītadhvanivādyaghoṣai- rmanoharaiḥ puṇyakṛtāṃ variṣṭhaiḥ //

sangīyamānāḥ prayayuḥ prahṛṣṭā dīpairjvaladbhiḥ sahitāśca vipraiḥ //

sa vai tathoktastu yudhiṣṭhireṇa pāñcālarājasya purohito'gryaḥ /
sarvaṃ yathoktaṃ kurunandanena nivedayāmāsa nṛpāya gatvā //

śrutvā tu vākyāni purohitasya yānyuktavānbhārata dharmarājaḥ /
jijñāsayaivātha kurūttamānāṃ dravyāṇyanekānyupasañjahāra //

phalāni mālyāni ca saṃskṛtāni varmāṇi carmāṇi tathā'sanāni /
gāścaiva rājannatha caiva rajjū- rbījāni cānyāni kṛṣīnimittam //

anyeṣu śilpeṣu ca yānyapi syuḥ sarvāṇi kṛtyānyakhilena tatra /
krīḍānimittānyapi yāni tatra sarvāṇi tatropajahāra rājā //

varmāṇi carmāṇi ca bhānumanti khaḍgā mahānto'śvarathāśca citrāḥ /
dhanūṃṣi cāgryāṇi śarāśca citrāḥ śaktyṛṣṭayaḥ kāñcanabhūṣaṇāśca //

prāsā bhuśuṇḍyaśca paraśvadhāśca sāngrāmikaṃ caiva tathaiva sarvam /
śayyāsanānyuttamavastuvanti tathaiva vāso vividhaṃ ca tatra //

kuntī tu kṛṣṇāṃ parigṛhya sādhvī- mantaḥpuraṃ drupadasyāviveśa /
striyaśca tāṃ kauravarājapatnīṃ pratyarcayāmāsuradīnasatvāḥ //

tānsiṃhavikrāntagatīnnirīkṣya maharṣabhākṣānajinottarīyān /
gūḍhottarāṃsānbhujagendrabhoga- pralambabāhūnpuruṣapravīrān //

rājā ca rājñaḥ sacivāśca sarve putrāśca rājñaḥ suhṛdastathaiva /
preṣyāśca sarve nikhilena rāja- nharṣaṃ samāpeturatīva tatra //

te tatra vīrāḥ paramāsaneṣu sapādapīṭheṣvaviśaṅkamānāḥ /
yathānupūrvyādviviśurnarāgryā- stathā mahārheṣu na vismayantaḥ //

uccāvacaṃ pārthivabhojanīyaṃ pātrīṣu jāmbūnadarājatīṣu /
dāsāśca dāsyaśca sumṛṣṭaveṣāḥ sambhojakāścāpyupajahrurannam //

te tatra bhuktvā puruṣapravīrā yathātmakāmaṃ subhṛśaṃ pratītāḥ /
utkramya sarvāṇi vasūni rāja- nsāngrāmikaṃ te viviśurnṛvīrāḥ //

tallakṣayitvā drupadasya putrā rājā ca sarvaiḥ saha mantrimukhyaiḥ /
samarthayāmāsurupetya hṛṣṭāḥ kuntīsutānpārthivarājaputrān //