Mahabharata · Chapter 1.21

tato rajanyāṃ vyuṣṭāyāṃ prabhāte'bhyudite ravau /
kadrūśca vinatā caiva bhaginyau te tapodhana //

amarṣite susaṃrabdhe dāsye kṛtapaṇe tadā / smagarasya paraṃ pāraṃ velāvanavibhūṣitam /
jagmatusturagaṃ draṣṭumuccaiḥśravasamantikāt //

dadṛśāte'tha te tatra samudraṃ nidhimambhasām /
mahāntamudakāgādhaṃ kṣobhyamāṇaṃ mahāsvanam //

timingilajhaṣākīrṇaṃ makarairāvṛtaṃ tathā /
satvaiśca bahusāhasrairnānārūpaiḥ samāvṛtam //

bhīṣaṇairvikṛtairanyairghorairjalacaraistathā /
ugrairnityamanādhṛṣyaṃ kūrmagrāhasamākulam //

ākaraṃ sarvaratnānāmālayaṃ varuṇasya ca /
nāgānāmālayaṃ ramyamuttamaṃ saritāṃ patim //

pātālajvalanāvāsamasurāṇāṃ ca bāndhavam /
bhayankaraṃ ca sattvānāṃ payasāṃ nidhimarṇavam //

śubhaṃ divyamamartyānāmamṛtasyākaraṃ param /
aprameyamacintyaṃ ca supuṇyajalamadbhutam //

ghoraṃ jalacarārāvaraudraṃ bhairavaniḥsvanam /
gambhīrāvartakalilaṃ sarvabhūtabhayankaram //

velādolānilacalaṃ kṣobhodvegasamucchritam /
vīcīhastaiḥ pracalitairnṛtyantamiva sarvataḥ //

candravṛddhikṣayavaśādudvṛttormisamākulam /
pāñcajanyasya jananaṃ ratnākaramanuttamam //

gāṃ vindatā bhagavatā govindenāmitaujasā /
varāharūpiṇā cāntarvikṣobhitajalāvilam //

brahmarṣiṇā vratavatā varṣāṇāṃ śatamatriṇā /
anāsāditagādhaṃ ca pātālatalamavyayam //

adhyātmayoganidrāṃ ca padmanābhasya sevataḥ /
yugādikālaśayanaṃ viṣṇoramitatejasaḥ //

vajrapātanasantrastamainākasyābhayapradam /
ḍimbāhavārditānāṃ ca asurāṇāṃ parāyaṇam //

baḍavāmukhadīptāgnestoyahavyapradaṃ śivam /
agādhapāraṃ vistīrṇamaprameyaṃ saritpatim //

mahānadībhirbahvībhiḥ spardhayeva sahasraśaḥ / abhisāryamāṇamaniśaṃ dadṛśāte mahārṇavam /
āpūryamāṇamatyarthaṃ nṛtyamānamivormibhiḥ //

gambhīraṃ timimakarograsankulaṃ taṃ garjantaṃ jalacararāvaraudranādaiḥ /
vistīrṇaṃ dadṛśaturambaraprakāśaṃ te'gādhaṃ nidhimurumambhasāmanantam //