મહાભારત · અધ્યાય 1.21

તતો રજન્યાં વ્યુષ્ટાયાં પ્રભાતેઽભ્યુદિતે રવૌ ।
કદ્રૂશ્ચ વિનતા ચૈવ ભગિન્યૌ તે તપોધન ॥

અમર્ષિતે સુસંરબ્ધે દાસ્યે કૃતપણે તદા । સ્મગરસ્ય પરં પારં વેલાવનવિભૂષિતમ્ ।
જગ્મતુસ્તુરગં દ્રષ્ટુમુચ્ચૈઃશ્રવસમન્તિકાત્ ॥

દદૃશાતેઽથ તે તત્ર સમુદ્રં નિધિમમ્ભસામ્ ।
મહાન્તમુદકાગાધં ક્ષોભ્યમાણં મહાસ્વનમ્ ॥

તિમિન્ગિલઝષાકીર્ણં મકરૈરાવૃતં તથા ।
સત્વૈશ્ચ બહુસાહસ્રૈર્નાનારૂપૈઃ સમાવૃતમ્ ॥

ભીષણૈર્વિકૃતૈરન્યૈર્ઘોરૈર્જલચરૈસ્તથા ।
ઉગ્રૈર્નિત્યમનાધૃષ્યં કૂર્મગ્રાહસમાકુલમ્ ॥

આકરં સર્વરત્નાનામાલયં વરુણસ્ય ચ ।
નાગાનામાલયં રમ્યમુત્તમં સરિતાં પતિમ્ ॥

પાતાલજ્વલનાવાસમસુરાણાં ચ બાન્ધવમ્ ।
ભયન્કરં ચ સત્ત્વાનાં પયસાં નિધિમર્ણવમ્ ॥

શુભં દિવ્યમમર્ત્યાનામમૃતસ્યાકરં પરમ્ ।
અપ્રમેયમચિન્ત્યં ચ સુપુણ્યજલમદ્ભુતમ્ ॥

ઘોરં જલચરારાવરૌદ્રં ભૈરવનિઃસ્વનમ્ ।
ગમ્ભીરાવર્તકલિલં સર્વભૂતભયન્કરમ્ ॥

વેલાદોલાનિલચલં ક્ષોભોદ્વેગસમુચ્છ્રિતમ્ ।
વીચીહસ્તૈઃ પ્રચલિતૈર્નૃત્યન્તમિવ સર્વતઃ ॥

ચન્દ્રવૃદ્ધિક્ષયવશાદુદ્વૃત્તોર્મિસમાકુલમ્ ।
પાઞ્ચજન્યસ્ય જનનં રત્નાકરમનુત્તમમ્ ॥

ગાં વિન્દતા ભગવતા ગોવિન્દેનામિતૌજસા ।
વરાહરૂપિણા ચાન્તર્વિક્ષોભિતજલાવિલમ્ ॥

બ્રહ્મર્ષિણા વ્રતવતા વર્ષાણાં શતમત્રિણા ।
અનાસાદિતગાધં ચ પાતાલતલમવ્યયમ્ ॥

અધ્યાત્મયોગનિદ્રાં ચ પદ્મનાભસ્ય સેવતઃ ।
યુગાદિકાલશયનં વિષ્ણોરમિતતેજસઃ ॥

વજ્રપાતનસન્ત્રસ્તમૈનાકસ્યાભયપ્રદમ્ ।
ડિમ્બાહવાર્દિતાનાં ચ અસુરાણાં પરાયણમ્ ॥

બડવામુખદીપ્તાગ્નેસ્તોયહવ્યપ્રદં શિવમ્ ।
અગાધપારં વિસ્તીર્ણમપ્રમેયં સરિત્પતિમ્ ॥

મહાનદીભિર્બહ્વીભિઃ સ્પર્ધયેવ સહસ્રશઃ । અભિસાર્યમાણમનિશં દદૃશાતે મહાર્ણવમ્ ।
આપૂર્યમાણમત્યર્થં નૃત્યમાનમિવોર્મિભિઃ ॥

ગમ્ભીરં તિમિમકરોગ્રસન્કુલં તં ગર્જન્તં જલચરરાવરૌદ્રનાદૈઃ ।
વિસ્તીર્ણં દદૃશતુરમ્બરપ્રકાશં તેઽગાધં નિધિમુરુમમ્ભસામનન્તમ્ ॥