મહાભારત · અધ્યાય 1.209

જન્યાર્થમન્નં દ્રુપદેન રાજ્ઞા વિવાહહેતોરુપસંસ્કૃતં ચ ।
તદાપ્નુવધ્વં કૃતસર્વકાર્યાઃ કૃષ્ણા ચ તત્રૈતુ ચિરં ન કાર્યમ્ ॥

ઇમે રથાઃ કાઞ્ચનપદ્મચિત્રાઃ સદશ્વયુક્તા વસુધાધિપાર્હાઃ ।
એતાન્સમારુહ્ય પરૈત સર્વે પાઞ્ચાલરાજસ્ય નિવેશનં તત્ ॥
વૈશમ્પાયન ઉવાચ ।

તતઃ પ્રયાતાઃ કુરુપુન્ગવાસ્તે પુરોહિતં તં પરિયાપ્ય સર્વે ।
આસ્થાય યાનાનિ મહાન્તિ તાનિ કુન્તી ચ કૃષ્ણા ચ સહૈકયાને ॥

સ્ત્રીભિઃ સુગન્ધામ્બરમાલ્યદાનૈ- ર્વિભૂષિતા આભરણૈર્વિચિત્રૈઃ ।
માઙ્ગલ્યગીતધ્વનિવાદ્યઘોષૈ- ર્મનોહરૈઃ પુણ્યકૃતાં વરિષ્ઠૈઃ ॥

સન્ગીયમાનાઃ પ્રયયુઃ પ્રહૃષ્ટા દીપૈર્જ્વલદ્ભિઃ સહિતાશ્ચ વિપ્રૈઃ ॥

સ વૈ તથોક્તસ્તુ યુધિષ્ઠિરેણ પાઞ્ચાલરાજસ્ય પુરોહિતોઽગ્ર્યઃ ।
સર્વં યથોક્તં કુરુનન્દનેન નિવેદયામાસ નૃપાય ગત્વા ॥

શ્રુત્વા તુ વાક્યાનિ પુરોહિતસ્ય યાન્યુક્તવાન્ભારત ધર્મરાજઃ ।
જિજ્ઞાસયૈવાથ કુરૂત્તમાનાં દ્રવ્યાણ્યનેકાન્યુપસઞ્જહાર ॥

ફલાનિ માલ્યાનિ ચ સંસ્કૃતાનિ વર્માણિ ચર્માણિ તથાઽસનાનિ ।
ગાશ્ચૈવ રાજન્નથ ચૈવ રજ્જૂ- ર્બીજાનિ ચાન્યાનિ કૃષીનિમિત્તમ્ ॥

અન્યેષુ શિલ્પેષુ ચ યાન્યપિ સ્યુઃ સર્વાણિ કૃત્યાન્યખિલેન તત્ર ।
ક્રીડાનિમિત્તાન્યપિ યાનિ તત્ર સર્વાણિ તત્રોપજહાર રાજા ॥

વર્માણિ ચર્માણિ ચ ભાનુમન્તિ ખડ્ગા મહાન્તોઽશ્વરથાશ્ચ ચિત્રાઃ ।
ધનૂંષિ ચાગ્ર્યાણિ શરાશ્ચ ચિત્રાઃ શક્ત્યૃષ્ટયઃ કાઞ્ચનભૂષણાશ્ચ ॥

પ્રાસા ભુશુણ્ડ્યશ્ચ પરશ્વધાશ્ચ સાન્ગ્રામિકં ચૈવ તથૈવ સર્વમ્ ।
શય્યાસનાન્યુત્તમવસ્તુવન્તિ તથૈવ વાસો વિવિધં ચ તત્ર ॥

કુન્તી તુ કૃષ્ણાં પરિગૃહ્ય સાધ્વી- મન્તઃપુરં દ્રુપદસ્યાવિવેશ ।
સ્ત્રિયશ્ચ તાં કૌરવરાજપત્નીં પ્રત્યર્ચયામાસુરદીનસત્વાઃ ॥

તાન્સિંહવિક્રાન્તગતીન્નિરીક્ષ્ય મહર્ષભાક્ષાનજિનોત્તરીયાન્ ।
ગૂઢોત્તરાંસાન્ભુજગેન્દ્રભોગ- પ્રલમ્બબાહૂન્પુરુષપ્રવીરાન્ ॥

રાજા ચ રાજ્ઞઃ સચિવાશ્ચ સર્વે પુત્રાશ્ચ રાજ્ઞઃ સુહૃદસ્તથૈવ ।
પ્રેષ્યાશ્ચ સર્વે નિખિલેન રાજ- ન્હર્ષં સમાપેતુરતીવ તત્ર ॥

તે તત્ર વીરાઃ પરમાસનેષુ સપાદપીઠેષ્વવિશઙ્કમાનાઃ ।
યથાનુપૂર્વ્યાદ્વિવિશુર્નરાગ્ર્યા- સ્તથા મહાર્હેષુ ન વિસ્મયન્તઃ ॥

ઉચ્ચાવચં પાર્થિવભોજનીયં પાત્રીષુ જામ્બૂનદરાજતીષુ ।
દાસાશ્ચ દાસ્યશ્ચ સુમૃષ્ટવેષાઃ સમ્ભોજકાશ્ચાપ્યુપજહ્રુરન્નમ્ ॥

તે તત્ર ભુક્ત્વા પુરુષપ્રવીરા યથાત્મકામં સુભૃશં પ્રતીતાઃ ।
ઉત્ક્રમ્ય સર્વાણિ વસૂનિ રાજ- ન્સાન્ગ્રામિકં તે વિવિશુર્નૃવીરાઃ ॥

તલ્લક્ષયિત્વા દ્રુપદસ્ય પુત્રા રાજા ચ સર્વૈઃ સહ મન્ત્રિમુખ્યૈઃ ।
સમર્થયામાસુરુપેત્ય હૃષ્ટાઃ કુન્તીસુતાન્પાર્થિવરાજપુત્રાન્ ॥