Mahabharata · Chapter 1.204

tasmai ditsati kanyāṃ tu brāhmaṇāya tadā nṛpe /
kopa āsīnmahīpānāmālokyānyonyamantikāt //

ūcuḥ sarve samāgamya parasparahitaiṣiṇaḥ / vayaṃ sarve samāhūtā drupadena durātmanā /
saṃhatya cābhyagacchāma svayaṃvaradidṛkṣayā //

asmānayamatikramya tṛṇīkṛtya ca sangatān /
dātumicchati viprāya draupadīṃ yoṣitāṃ varām //

avaropyeha vṛkṣastu phalakāle nipātyate /
nihanmainaṃ durātmānaṃ yoyamasmānna manyate //

na hyarhatyeṣa sammānaṃ nāpi vṛddhakramaṃ guṇaiḥ /
hanmainaṃ saha putreṇa durācāraṃ nṛpadviṣam //

ayaṃ hi sarvānāhūya satkṛtya ca narādhipān /
guṇavadbhojayitvānnaṃ tataḥ paścānna manyate //

asminrājasamavāye devānāmiva sannaye /
kimayaṃ sadṛśaṃ kañcinnṛpatiṃ naiva dṛṣṭavān //

na ca vipreṣvadhīkāro vidyate varaṇaṃ prati /
svayaṃvaraḥ kṣatriyāṇāmitīyaṃ prathitā śrutiḥ //

athavā yadi kanyeyaṃ na ca kañcidbubhūṣati /
agnāvenāṃ parikṣipya yāma rāṣṭrāṇi pārthivāḥ //

brāhmaṇo yadi cāpalyāllobhādvā kṛtavānidam /
vipriyaṃ pārthivendrāṇāṃ naiṣa vadhyaḥ kathañcana //

brāhmaṇārthaṃ hi no rājyaṃ jīvitaṃ hi vasūni ca /
putrapautraṃ ca yaccānyadasmākaṃ vidyate dhanam //

avamānabhayāccaiva svadharmasya ca rakṣaṇāt /
svayaṃvarāṇāmanyeṣāṃ mā bhūdevaṃvidhā gatiḥ //

ityuktvā rājaśārdūlā ruṣṭāḥ parighabāhavaḥ /
drupadaṃ tu jighāṃsantaḥ sāyudhāḥ samupādravan //

tāngṛhītaśarāvāpānkruddhānāpatato bahūn /
drupado vīkṣya sangrāsādbrāhmaṇāñcharaṇaṃ gataḥ //

na bhayānnāpi kārpaṇyānna prāṇaparirakṣaṇāt / jagāma drupado viprāñśamārthī pratyapadyata //

vegenāpatatastāṃstu prabhinnāniva vāraṇān /
pāṇḍuputrau maheṣvāsau pratiyātāvarindamau //

tataḥ samutpeturudāyudhāste mahīkṣito baddhagodhāṅgulitrāḥ /
jighāṃsamānāḥ kururājaputrā- vamarṣayanto'rjunabhīmasenau //

tatastu bhīmo'dbhutabhīmakarmā mahābalo vajrasamānasāraḥ /
utpāṭya dorbhyāṃ drumamekavīro niṣpatrayāmāsa yathā gajendraḥ //

taṃ vṛkṣamādāya ripupramāthī daṇḍīva daṇḍaṃ pitṛrāja ugram /
tasthau samīpe puruṣarṣabhasya pārthasya pārthaḥ pṛthudīrghabāhuḥ //

tatprekṣya karmātimanuṣyabuddhi- rjiṣṇuḥ sa hi bhrāturacintyakarmā /
visiṣmiye cāpi bhayaṃ vihāya tasthau dhanurgṛhya mahendrakarmā //

tatprekṣya karmātimanuṣyabuddhi- rjiṣṇoḥ sahabhrāturacintyakarmā /
dāmodaro bhrātaramugravīryaṃ halāyudhaṃ vākyamidaṃ babhāṣe //

ya eṣa siṃharṣabhakhelagāmī madaddhanuḥ karṣati tālamātram /
eṣo'rjuno nātra vicāryamasti yadyasmi sankarṣaṇa vāsudevaḥ //

yastveṣa vṛkṣaṃ tarasā'vabhajya rājñāṃ nikāre sahasā pravṛttaḥ /
vṛkodarānnānya ihaitadadya kartuṃ samarthaḥ samare pṛthivyām //

yo'sau purastātkamalāyatākṣo mahātanuḥ siṃhagatirvinītaḥ /
gauraḥ pralambojjvalacārughoṇo viniḥsṛtaḥ so'pyuta dharmaputraḥ //

yau tau kumārāviva kārtikeyau dvāvāśvineyāviti me vitarkaḥ /
muktā hi tasmājjatuveśmadāhā- nmayā śrutāḥ pāṇḍusutāḥ pṛthā ca //
vaiśampāyana uvāca /

tamabravīnnirjalatoyadābho halāyudho'nantarajaṃ pratītaḥ /
prīto'smi dṛṣṭvā hi pitṛṣvasāraṃ pṛthāṃ vimuktāṃ saha kauravāgryaiḥ //