Mahabharata · Chapter 1.203

yadā nivṛttā rājāno dhanuṣaḥ sajyakarmaṇaḥ /
athodatiṣṭhadviprāṇāṃ madhyājjiṣṇurudāradhīḥ //

udakrośanvipramukhyā vidhunvanto'jināni ca /
dṛṣṭvā samprasthitaṃ pārthamindraketusamaprabham //

kecidāsanvimanasaḥ kecidāsanmudānvitāḥ /
āhuḥ parasparaṃ kecinnipuṇā buddhijīvinaḥ //

yatkarṇaśalyapramukhaiḥ kṣatriyairlokaviśrutaiḥ /
nānataṃ balavadbhirhi dhanurvedaparāyaṇaiḥ //

tatkathaṃ tvakṛtāstreṇa prāṇato durbalīyasā /
vaṭumātreṇa śakyaṃ hi sajyaṃ kartuṃ dhanurdvijāḥ //

avahāsyā bhaviṣyanti brāhmaṇāḥ sarvarājasu /
karmaṇyasminnasaṃsiddhe cāpalādaparīkṣite //

yadyeṣa darpāddharṣādvāpyatha brāhmaṇacāpalāt /
prasthito dhanurāyantuṃ vāryatāṃ sādhu mā gamat //

nāvahāsyā bhaviṣyāmo na ca lāghavamāsthitāḥ /
na ca vidviṣṭatāṃ loke gamiṣyāmo mahīkṣitām //

kecidāhuryuvā śrīmānnāgarājakaropamaḥ /
pīnaskandhorubāhuśca dhairyeṇa himavāniva //

siṃhakhelagatiḥ śrīmānmattanāgendravikramaḥ /
sambhāvyamasminkarmedamutsāhāccānumīyate //

śaktirasya mahotsāhā na hyaśaktaḥ svayaṃ vrajet /
na ca tadvidyate kiñcitkarma lokeṣu yadbhavet //

brāhmaṇānāmasādhyaṃ ca nṛṣu saṃsthānacāriṣu /
abbhakṣā vāyubhakṣāśca phalāhārā dṛḍhavratāḥ //

durbalā api viprā hi balīyāṃsaḥ svetajasā /
brāhmaṇo nāvamantavyaḥ sadasadvā samācaran //

sukhaṃ duḥkhaṃ mahaddhrasvaṃ karma yatsamupāgatam /
jāmadagnyena rāmeṇa nirjitāḥ kṣatriyā yudhi //

pītaḥ samudro'gastyena agādho brahmatejasā /
tasmādbruvantu sarve'tra vaṭureṣa dhanurmahān //

āropayatu śīghraṃ vai tathetyūcurdvijarṣabhāḥ /
vaiśampāyana uvāca /
evaṃ teṣāṃ vilapatāṃ viprāṇāṃ vividhā giraḥ //

arjuno dhanuṣo'bhyāśe tasthau giririvācalaḥ /
arjunaḥ pāṇḍavaśreṣṭho dhṛṣṭadyumnamathābravīt //

etaddhanurbrāhmaṇānāṃ sajyaṃ kartumalaṃ tu kim /
vaiśampāyana uvāca /
tasya tadvacanaṃ śrutvā dhṛṣṭadyumno'bravīdvacaḥ //

brāhmaṇo vātha rājanyo vaiśyo vā śūdra eva vā /
eteṣāṃ yo dhanuḥśreṣṭhaṃ sajyaṃ kuryāddvijottama //

tasmai pradeyā bhaginī satyamuktaṃ mayā vacaḥ //
vaiśampāyana uvāca /

tataḥ paścānmahātejāḥ pāṇḍavo raṇadurjayaḥ / sa taddhanuḥ parikramya pradakṣiṇamathākarot //

praṇamya śirasā devamīnaṃ varadaṃ prabhum /
kṛṣṇaṃ ca manasā kṛtvā jagṛhe cārjuno dhanuḥ //

yatpārthivai rukmasunīthavakrai rādheyaduryodhanaśalyasālvaiḥ /
tadā dhanurvedaparairnṛsiṃhaiḥ kṛtaṃ na sajyaṃ mahato'pi yatnāt //

tadarjuno vīryavatāṃ sadarpa- stadaindririndrāvarajaprabhāvaḥ /
sajyaṃ ca cakre nimiṣāntareṇa śarāṃśca jagrāha daśārdasaṅkhyān //

vivyādha lakṣyaṃ nipapāta tacca chidreṇa bhūmau sahasātividdham /
tato'ntarikṣe ca babhūva nādaḥ samājamadhye ca mahānninādaḥ //

puṣpāṇi divyāni vavarṣa devaḥ pārthasya mūrdhni dviṣatāṃ nihantuḥ //

celāni vivyadhustatra brāhmaṇāśca sahasraśaḥ / vilakṣitāstataścakrurhāhākārāṃśca sarvaśaḥ /
nyapataṃścātra nabhasaḥ samantātpuṣpavṛṣṭayaḥ //

śatāṅgāni ca tūryāṇi vādakāḥ samavādayan /
sūtamāgadhasaṅghāścāpyastuvaṃstatra susvarāḥ //

taṃ dṛṣṭvā drupadaḥ prīto babhūva ripusūdanaḥ /
saha sainyaiśca pārthasya sāhāyyārthamiyeṣa saḥ //

tasmiṃstu śabde mahati pravṛddhe yudhiṣṭhiro dharmabhṛtāṃ variṣṭhaḥ /
āvāsamevopajagāma śīghraṃ sārdhaṃ yamābhyāṃ puruṣottamābhyām //

viddhaṃ tu lakṣyaṃ prasamīkṣya kṛṣṇā pārthaṃ ca śakrapratimaṃ nirīkṣya /
svabhyastarūpāpi naveva nityaṃ vināpi hāsaṃ hasatīva kanyā //

madādṛte'pi skhalatīva bhāvai- rvācā vinā vyāharatīva dṛṣṭyā /
ādāya śuklaṃ varamālyadāma jagāma kuntīsutamutsmayantī //

gatvā ca paścātprasamīkṣya kṛṣṇā pārthasya vakṣasyaviśaṅkamānā /
kṣiptvā srajaṃ pārthivavīramadhye varāya vavre dvijasaṅghamadhye //

śacīva devendramathāgnidevaṃ svāheva lakṣmīśca yathā mukundam /
uṣeva sūryaṃ madanaṃ ratīva maheśvaraṃ parvatarājaputrī //

sa tāmupādāya vijitya raṅge dvijātibhistairabhipūjyamānaḥ /
raṅgānnirakrāmadacintyakarmā patnyā tayā cāpyanugamyamānaḥ //