Mahabharata · Chapter 1.202

te'laṅkṛtāḥ kuṇḍalino yuvānaḥ parasparaṃ spardhamānā narendrāḥ /
astraṃ balaṃ cātmani manyamānāḥ sarveṃ samutpeturudāyudhāste //

rūpeṇa vīryeṇa kule caiva śīlena vittena ca yauvanena /
samiddhadarpā madavegabhinnā mattā yathā haimavatā gajendrāḥ //

parasparaṃ spardhayā prekṣamāṇāḥ saṅkalpajenābhipariplutāṅgāḥ /
kṛṣṇā mamaivetyabhibhāṣamāṇā nṛpāḥ samutpeturathāsanebhyaḥ //

te kṣatriyā raṅgagatāḥ sametā jigīṣamāṇā drupadātmajāṃ tām /
cakāśire parvatarājakanyā- mumāṃ yathā devagaṇāḥ sametāḥ //

kandarpabāṇābhinipīḍitāṅgāṃ kṛṣṇāgataiste hṛdayairnarendrāḥ /
raṅgāvatīrṇā drupadātmajārthaṃ dveṣaṃ pracakruḥ suhṛdo'pi tatra //

athāyayurdevagaṇā vimānai rudrādityā vasavo'thāśvinau ca /
sādhyāśca sarve marutastathaiva yamaṃ puraskṛtya dhaneśvaraṃ ca //

daityāḥ suparṇāśca mahoragāśca devarṣayo guhyakāścāraṇāśca /
viśvāvasurnāradaparvatau ca gandharvamukhyāḥ sahasā'psarobhiḥ //

halāyudhastatra janārdanaśca vṛṣṇyandhakāścaiva yatāpradhānam /
prekṣāṃ sma cakruryadupuṅgavāste sthitāśca kṛṣṇasya mate mahāntaḥ //

dṛṣṭvā tu tānmattagajendrarūpā- npañcābhipadmāniva vāraṇendrān /
bhasmāvṛtāṅgāniva havyavāhān kṛṣṇaḥ pradadhyau yaduvīramukhyaḥ //

śaśaṃsa rāmāya yudhiṣṭhiraṃ sa bhīmaṃ sajiṣṇuṃ ca yamau ca vīrau /
śanaiḥśanaistānprasamīkṣya rāmo janārdanaṃ prītamanā dadarśa ha //

anye tu vīrā nṛpaputrapautrāḥ kṛṣṇāgatairnatramanaḥsvabhāvaiḥ /
vyāyacchamānā dadṛśurna tānvai sandaṣṭadantacchadatāmranetrāḥ //

tathaiva pārthāḥ pṛthubāhavaste vīrau yamau caiva mahānubhāvau /
tāṃ draupadīṃ prekṣya tadā sma sarve kandarpabāṇābhihatā babhūvuḥ //

devarṣigandharvasamākulaṃ ta- tsuparṇanāgāsurasiddhajuṣṭam /
divyena gandhena samākulaṃ ca divyaiśca puṣpairavakīryamāṇam //

mahāsvanairdundubhināditaiśca babhūva tatsaṅkulamantarikṣam /
vimānasambādhamabhūtsamantā- tsaveṇuvīṇāpaṇavānunādam //

samājavāṭopari saṃsthitānāṃ meghaiḥ samantādiva garjamānaiḥ /
tatastu te rājagaṇāḥ krameṇa kṛṣṇānimittaṃ kṛtavikramāśca / sakarṇaduryodhanaśālvaśalya- drauṇāyanikrāthasunīthavakrāḥ //

kaliṅgavaṅgādhipapāṇḍyapauṇḍrā videharājo yavanādhipaśca /
anye ca nānānṛpaputrapautrā rāṣṭrādhipāḥ paṅkajapatranetrāḥ //

kirīṭahārāṅgadacakravālai- rvibhūṣitāṅgāḥ pṛthubāhavaste /
anukramaṃ vikramasatvayuktā balena vīryeṇa ca nardamānāḥ //

tatkārmukaṃ saṃhananopapannaṃ sajyaṃ na śekurmanasā'pi kartum /
te vikramantaḥ sphuratā dṛḍhena vikṣipyamāṇā dhanuṣā narendrāḥ //

viceṣṭamānā dharaṇītalasthā yathābalaṃ śaikṣyaguṇakramāśca /
gataujasaḥ snastakirīṭahārā viniḥśvasantaḥ śamayāmbabhūvuḥ //

hahākṛtaṃ taddhanuṣā dṛḍhena visrastahārāṅgadacakravālam /
kṛṣṇānimittaṃ vinivṛttakāmaṃ rājñāṃ tadā maṇḍalamārtamāsīt //

evaṃ teṣu nivṛtteṣu kṣatriyeṣu samantataḥ /
cedīnāmadhipo vīro balavānantakopamaḥ //

damaghoṣātmajo dhīmāñśiśupālo mahādyutiḥ /
dhanuṣo'bhyāśamāgamya tasthau rājñāṃ samakṣataḥ //

tadapyāropyamāṇaṃ tu māṣamātre'bhyatāḍayat /
dhanuṣā pīḍyamānastu jānubhyāmagamanmahīm //

tata utthāya rājā sa svarāṣṭrāṇyabhijagmivān /
tato rājā jarāsandho mahāvīryo mahābalaḥ //

kambugrīvaḥ pṛthuvyaṃso mattavāraṇavikramaḥ /
mattavāraṇatāmrākṣo mattavāraṇavegavān //

dhanuṣo'bhyāśamāgatya tasthau giririvācalaḥ /
dhanurāropyamāṇaṃ tu sarṣamātre'bhyatāḍayat //

tataḥ śalyo mahāvīryo madrarājo mahābalaḥ /
dhanurāropyamāṇaṃ tu mudgamātre'bhyatāḍayat //

tadaivāgātsvayaṃ rājyaṃ paścādanavalokayan /
idaṃ dhanurvaraṃ ko'dya sajyaṃ kurvīta pārthivaḥ //

iti niścitya manasā bhūya eva sthitastadā /
tato duryodhano rājā dhārtarāṣṭraḥ parantapaḥ //

mānī dṛḍhāstrasampannaḥ sarvaiśca nṛpalakṣaṇaiḥ /
utthitaḥ sahasā tatra bhrātṛmadhye mahābalaḥ //

vilokya draupadīṃ hṛṣṭo dhanuṣo'bhyāśamāgamat /
sa babhau dhanurādāya śakraścāpadharo yathā //

dhanurāropayāmāsa tilamātre'bhyatāḍayat /
āropyamāṇaṃ tadrājā dhanuṣā balinā tadā //

uttānaśayyamapatadaṅgulyantaratāḍitaḥ /
sa yayau tāḍitastena vrīḍanniva narādhipaḥ //

tato vaikartanaḥ karṇo vṛṣā vai sūtanandanaḥ /
dhanurabhyāśamāgamya tolayāmāsa taddhanuḥ //

taṃ cāpyāropyamāṇaṃ tadromamātre'bhyatāḍayat /
trailokyavijayī karṇaḥ satve trailokyaviśrutaḥ //

dhanuṣā so'pi nirdhūta iti sarve bhayākulāḥ /
evaṃ karṇe vinirdhūte dhanuṣā ca nṛpottamāḥ //

cakṣurbhirapi nāpaśyanvinamramukhapaṅkajāḥ /
dṛṣṭvā karṇaṃ vinirdhūtaṃ loke vīrā nṛpottamāḥ //

nirāśā dhanuruddhāre draupadīsangame'pi ca //

tasmiṃstu sambhrāntajane samāje nikṣiptavādeṣu janādhipeṣu /
kuntīsuto jiṣṇuriyeṣa kartuṃ sajyaṃ dhanustatsaśaraṃ ca vīraḥ //

tato variṣṭhaḥ suradānavānā- mudaradhīrvṛṣṇikulapravīraḥ /
jaharṣa rāmeṇa sa pīḍya hastaṃ hastangatāṃ pāṇḍusutasya matvā //

na jajñire'nye nṛpavipramukhyāḥ sañchannarūpānatha pāṇḍuputrān /
vinā hi loke ca yadupravīrau dhaumyaṃ hi dharmaṃ saha sodarāṃśca //