Mahabharata · Chapter 1.194

āśramasthā tataḥ putramadṛśyantī vyajāyata /
śakteḥ kulakaraṃ rājan dvitīyamiva śaktinam //

jātakarmādikāstasya kriyāḥ sa munisattamaḥ /
pautrasya bharataśreṣṭha cakāra bhagavānsvayam //

parāsuḥ sa yatastena vasiṣṭhaḥ sthāpito muniḥ /
garbhasthena tato loke parāśara iti smṛtaḥ //

amanyata sa dharmātmā vasiṣṭhaṃ pitaraṃ muniḥ /
janmaprabhṛti tasmiṃstu pitarīvānvavartata //

sa tāta iti viprarṣiṃ vasiṣṭhaṃ pratyabhāṣata /
mātuḥ samakṣaṃ kaunteya adṛśyantyāḥ parantapa //

tāteti paripūrṇārthaṃ tasya tanmadhuraṃ vacaḥ /
adṛśyantyaśrupūrṇākṣī śṛṇvatī tamuvāca ha //

mā tāta tātatāteti brūhyenaṃ pitaraṃ pituḥ /
rakṣasā bhakṣitastāta tava tāto vanāntare //

manyase yaṃ tu tāteti naiṣa tātastavānagha /
ārya eṣa pitā tasya pitustava yaśasvinaḥ //

sa evamukto duḥkhārtaḥ satyavāgṛṣisattamaḥ /
sarvalokavināśāya matiṃ cakre mahāmanāḥ //

taṃ tathā niścitātmānaṃ sa mahātmā mahātapāḥ /
ṛṣirbrahmavidāṃ śraṣṭho maitrāvaruṇirantyadhīḥ //

vasiṣṭho vārayāmāsa hetunā yena tacchṛṇu /
vasiṣṭha uvāca /
kṛtavīrya iti khyāto babhūva pṛthivīpatiḥ //

yājyo vedavidāṃ loke bhṛgūṇāṃ pārthivarṣabhaḥ /
sa tānagrabhujastāta dhānyena ca dhanena ca //

somānte tarpayāmāsa vipulena viśāmpatiḥ /
tasminnṛpatiśārdūle svaryāte'tha kathañcana //

babhūva tatkuleyānāṃ dravyakāryamupasthitam /
bhṛgūṇāṃ tu dhanaṃ jñātvā rājānaḥ sarva eva te //

yāciṣṇavo'bhijagmustāṃstato bhārgavasattamān /
bhūmau tu nidaduḥ kecidbhṛgavo dhanamakṣayam //

daduḥ keciddvijātibhyo jñātvā kṣatriyato bhayam /
bhṛhavastu daduḥ kecitteṣāṃ vittaṃ yathepsitam //

kṣatriyāṇāṃ tadā tāta kāraṇāntaradarśanāt /
tato mahītalaṃ tāta kṣatriyeṇa yadṛcchayā //

khanatā'dhigataṃ vittaṃ kenacciddhṛguveśmani /
tadvittaṃ dadṛśuḥ sarve sametāḥ kṣatriyarṣabhāḥ //

avamanya tataḥ krodhādbhṛgūṃstāñcharaṇagatān /
nijaghnuḥ parameṣvāsāḥ sarvāṃstānniśitaiḥ śaraiḥ //

āgarbhādavakṛntantaśceruḥ sarvāṃ vasundharām /
tata ucchidyamāneṣu bhṛguṣvevaṃ bhayāttadā //

bhṛgupatnyo giriṃ durgaṃ himavantaṃ prapedire /
tāsāmanyatamā garbhaṃ bhayāddadhre mahaujasam //

ūruṇaikena vābhorūrbhartuḥ kulavivṛddhaye /
taṃ garbhamupalabhyāśu brāhmaṇyekā bhayārditā //

gatvā vai kathayāmāsa kṣatriyāṇāmupahvare /
tataste kṣatriyā jagmustaṃ garbhaṃ hantumudyatāḥ //

dadṛśurbrāhmaṇīṃ te'tha dīpyamānāṃ svatejasā /
atha garbhaḥ sa bhittvoruṃ brāhmaṇyā nirjagāma ha //

muṣṇandṛṣṭīḥ kṣatriyāṇāṃ madhyāhna iva bhāskaraḥ /
tataścakṣurvihīnāste giridurgeṣu babhramuḥ //

tataste moghasaṅkalpā bhayārtāḥ kṣatriyāḥ punaḥ /
brāhmaṇīṃ śaramaṃ jagmurdṛṣṭyarthaṃ tāmaninditām //

ūcuścaināṃ mahābhāgāṃ kṣatriyāste vicetasaḥ /
jyotiḥprahīṇā duḥkhārtāḥ śāntārciṣa ivāgnayaḥ //

bhagavatyāḥ prasādena gacchetkṣatramanāmayam /
upāramya ca gacchema sahitāḥ pāpakarmaṇaḥ //

saputrā tvaṃ prasādaṃ naḥ kartumarhasi śobhane /
punardṛṣṭipradānena rājñaḥ santrātumarhasi //