Mahabharata · Chapter 1.195

nāhaṃ gṛhṇāmi vastātā dṛṣṭīrnāsmi ruṣānvitā /
ayaṃ tu bhārgavo nūnamūrujaḥ kupito'dya vaḥ //

tena cakṣūṃṣi vastātā vyaktaṃ kopānmahātmanā /
smaratā nihatānbandhūnādattāni na saṃśayaḥ //

garbhānapi yadā yūyaṃ bhṛgūṇāṃ ghnata putrakāḥ /
tadāyamūruṇā garbho mayā varṣaśataṃ dhṛtaḥ //

ṣaḍaṅgaścākhilo veda imaṃ garbhasthameva ha /
viveśa bhṛguvaṃśasya bhūyaḥ priyacikīrṣayā //

so'yaṃ pitṛvadhādvyaktaṃ krodhādvo hantumicchati /
tejasā tasya divyena cakṣūṃṣi muṣitāni vaḥ //

tameva yūyaṃ yācadhvamaurvaṃ mama sutottamam /
ayaṃ vaḥ praṇipātena tuṣṭo dṛṣṭīḥ pradāsyati //
vasiṣṭha uvāca /

evamuktāstataḥ sarve rājānaste tamūrujam /
ūcuḥ prasīdeti tadā prasādaṃ ca cakāra saḥ //

anenaiva ca vikhyāto nāmnā lokeṣu sattamaḥ /
sa aurva iti viprarṣirūruṃ bhittvā vyajāyata //

cakṣūṃṣi pratilabhyātha pratijagmustato nṛpāḥ /
bhārgavastu munirmene sarvalokaparābhavam //

sa cakre tāta lokānāṃ vināśāya matiṃ tadā /
sarveṣāmeva kārtsnyena manaḥ pravaṇamātmanaḥ //

icchannapacitiṃ kartuṃ bhṛgūṇāṃ bhṛgunandanaḥ /
sarvalokavināśāya tapasā sahataidhitaḥ //

tāpayāmāsa tām̐llokānsadevāsuramānuṣān /
tapasogreṇa mahatā nandayiṣyanpitāmahān //

tatastaṃ pitarastāta vijñāya kulanandanam /
pitṛlokādupāgamya sarva ūcuridaṃ vacaḥ //

aurva dṛṣṭaḥ prabhāvaste tapasograsya putraka /
prasādaṃ kuru lokānāṃ niyaccha krodhamātmanaḥ //

nānīśairhi tadā tāta bhṛgubhirbhāvitātmabhiḥ /
vadho hyupekṣitaḥ sarvaiḥ kṣatriyāṇāṃ vihiṃsatām //

āyuṣā viprakṛṣṭena yadā naḥ kheda āviśat /
tadā'smābhirvadhastāta kṣatriyairīpsitaḥ svayam //

nikhātaṃ yacca vai vittaṃ kenacidgṛguveśmani /
vairāyaiva tadā nyastaṃ kṣatriyānkopayiṣṇubhiḥ //

kiṃ hi vittena naḥ kāryaṃ svargepsūnāṃ dvijottama /
yadasmākaṃ dhanādhyakṣaḥ prabhūtaṃ dhanamāharat //

yadā tu mṛtyurādātuṃ na naḥ śaknoti sarvaśaḥ /
tadā'smābhirayaṃ dṛṣṭa upāyastāta sammataḥ //

ātmahā ca pumāṃstāta na lokām̐llabhate śubhān /
tato'smābhiḥ samīkṣyaivaṃ nātmanātmā nipātitaḥ //

na caitannaḥ priyaṃ tāta yadidaṃ kartumicchasi /
niyacchedaṃ manaḥ pāpātsarvalokaparābhavāt //

mā vadhīḥ kṣatriyāṃstāta na lokānsapta putraka /
dūṣayantaṃ tapastejaḥ krodhamutpatitaṃ jahi //