Mahabharata · Chapter 1.190

sa gandharvavacaḥ śrutvā tattadā bharatarṣabha /
arjunaḥ parayā bhaktyā pūrṇacandra ivābabhau //

uvāca ca maheṣvāso gandharvaṃ kurusattamaḥ /
jātakautūhalo'tīva vasiṣṭhasya tapobalāt //

vasiṣṭha iti tasyaitadṛṣernāma tvayeritam /
etadicchāmyahaṃ śrotuṃ yathāvattadvadasva me //

ya eṣa gandharvapate pūrveṣāṃ naḥ purohitaḥ /
āsīdetanmamācakṣva ka eṣa bhagavānṛṣiḥ //
gandharva uvāca /

brahmaṇo mānasaḥ putro vasiṣṭho'rundhatīpatiḥ /
tapasā nirjitau śaśvadajeyāvamarairapi //

kāmakrodhāvubhau yasya caraṇau samuvāhatuḥ /
indriyāṇāṃ vaśakaro vaśiṣṭha iti cocyate //

yathā kāmaśca krodhaśca nirjitāvajitau naraiḥ / jitārayo jitā lokāḥ panthānaśca jitā diśaḥ //

yastu nocchedanaṃ cakre kuśikānāmudāradhīḥ /
viśvāmitrāparādhena dhārayanmanyumuttamam //

putravyasanasantaptaḥ śaktimānapyaśaktavat /
viśvāmitravināśāya na cakre karma dāruṇam //

mṛtāṃśca punarāhartuṃ śaktaḥ putrānyamakṣayāt /
kṛtāntaṃ nāticakrāma velāmiva mahodadhiḥ //

yaṃ prāpya vijitātmānaṃ mahātmānaṃ narādhipāḥ /
ikṣvākavo mahīpālā lebhire pṛthivīmimām //

purohitamimaṃ prāpya vasiṣṭhamṛṣisattamam /
ījire kratubhiścaiva nṛpāste kurunandana //

sa hi tānyājayāmāsa sarvānnṛpatisattamān /
brahmarṣiḥ pāṇḍavaśreṣṭha bṛhaspatirivāmarān //

tasmāddharmapradhānātmā vedadharmavidīpsitaḥ /
brāhmaṇo guṇavānkaścitpurodhāḥ pratidṛśyatām //

kṣatriyeṇābhijātena pṛthivīṃ jetumicchatā /
pūrvaṃ purohitaḥ kāryaḥ pārtha rājyābhivṛddhaye //

mahīṃ jigīṣatā rājñā brahma kāryaṃ puraḥskṛtam / tasmātpurohitaḥ kaścidguṇavānvijitendriyaḥ /
vidvānbhavatu vo vipro dharmakāmārthatattvavit //