મહાભારત · અધ્યાય 1.190

સ ગન્ધર્વવચઃ શ્રુત્વા તત્તદા ભરતર્ષભ ।
અર્જુનઃ પરયા ભક્ત્યા પૂર્ણચન્દ્ર ઇવાબભૌ ॥

ઉવાચ ચ મહેષ્વાસો ગન્ધર્વં કુરુસત્તમઃ ।
જાતકૌતૂહલોઽતીવ વસિષ્ઠસ્ય તપોબલાત્ ॥

વસિષ્ઠ ઇતિ તસ્યૈતદૃષેર્નામ ત્વયેરિતમ્ ।
એતદિચ્છામ્યહં શ્રોતું યથાવત્તદ્વદસ્વ મે ॥

ય એષ ગન્ધર્વપતે પૂર્વેષાં નઃ પુરોહિતઃ ।
આસીદેતન્મમાચક્ષ્વ ક એષ ભગવાનૃષિઃ ॥
ગન્ધર્વ ઉવાચ ।

બ્રહ્મણો માનસઃ પુત્રો વસિષ્ઠોઽરુન્ધતીપતિઃ ।
તપસા નિર્જિતૌ શશ્વદજેયાવમરૈરપિ ॥

કામક્રોધાવુભૌ યસ્ય ચરણૌ સમુવાહતુઃ ।
ઇન્દ્રિયાણાં વશકરો વશિષ્ઠ ઇતિ ચોચ્યતે ॥

યથા કામશ્ચ ક્રોધશ્ચ નિર્જિતાવજિતૌ નરૈઃ । જિતારયો જિતા લોકાઃ પન્થાનશ્ચ જિતા દિશઃ ॥

યસ્તુ નોચ્છેદનં ચક્રે કુશિકાનામુદારધીઃ ।
વિશ્વામિત્રાપરાધેન ધારયન્મન્યુમુત્તમમ્ ॥

પુત્રવ્યસનસન્તપ્તઃ શક્તિમાનપ્યશક્તવત્ ।
વિશ્વામિત્રવિનાશાય ન ચક્રે કર્મ દારુણમ્ ॥

મૃતાંશ્ચ પુનરાહર્તું શક્તઃ પુત્રાન્યમક્ષયાત્ ।
કૃતાન્તં નાતિચક્રામ વેલામિવ મહોદધિઃ ॥

યં પ્રાપ્ય વિજિતાત્માનં મહાત્માનં નરાધિપાઃ ।
ઇક્ષ્વાકવો મહીપાલા લેભિરે પૃથિવીમિમામ્ ॥

પુરોહિતમિમં પ્રાપ્ય વસિષ્ઠમૃષિસત્તમમ્ ।
ઈજિરે ક્રતુભિશ્ચૈવ નૃપાસ્તે કુરુનન્દન ॥

સ હિ તાન્યાજયામાસ સર્વાન્નૃપતિસત્તમાન્ ।
બ્રહ્મર્ષિઃ પાણ્ડવશ્રેષ્ઠ બૃહસ્પતિરિવામરાન્ ॥

તસ્માદ્ધર્મપ્રધાનાત્મા વેદધર્મવિદીપ્સિતઃ ।
બ્રાહ્મણો ગુણવાન્કશ્ચિત્પુરોધાઃ પ્રતિદૃશ્યતામ્ ॥

ક્ષત્રિયેણાભિજાતેન પૃથિવીં જેતુમિચ્છતા ।
પૂર્વં પુરોહિતઃ કાર્યઃ પાર્થ રાજ્યાભિવૃદ્ધયે ॥

મહીં જિગીષતા રાજ્ઞા બ્રહ્મ કાર્યં પુરઃસ્કૃતમ્ । તસ્માત્પુરોહિતઃ કશ્ચિદ્ગુણવાન્વિજિતેન્દ્રિયઃ ।
વિદ્વાન્ભવતુ વો વિપ્રો ધર્મકામાર્થતત્ત્વવિત્ ॥