Mahabharata · Chapter 1.188

atha tasyāmadṛśyāyāṃ nṛpatiḥ kāmamohitaḥ /
pātanaḥ śatrusaṅghānāṃ papāta dharaṇītale //

tasminnipatite bhūmāvatha sā cāruhāsinī /
punaḥ pīnāyataśroṇī darśayāmāsa taṃ nṛpam //

athābabhāṣe kalyāṇī vācā madhurayā nṛpam /
taṃ kurūṇāṃ kulakaraṃ kāmābhihatacetasam //

uvāca madhuraṃ vākyaṃ tapatī hasatīva sā /
uttiṣṭhottiṣṭha bhadraṃ te na tvamarhasyarindama //

mohaṃ nṛpatiśārdūla gantumāviṣkṛtaḥ kṣitau /
evamukto'tha nṛpatirvācā madhurayā tadā //

dadarśa vipulaśroṇīṃ tāmevābhimukhe sthitām /
atha tāmasitāpāṅgīmābabhāṣe sa pārthivaḥ //

manmathāgniparītātmā sandigdhākṣarayā girā /
sādhu tvamasitāpāṅgi kāmārtaṃ mattakāśini //

bhajasva bhajamānaṃ māṃ prāṇā hi prajahanti mām /
tvadarthaṃ hi viśālākṣi māmayaṃ niśitaiḥ śaraiḥ //

kāmaḥ kamalagarbhābhe pratividhyanna śāmyati /
daṣṭamevamanākrande bhadre kāmamahāhinā //

sā tvaṃ pīnāyataśroṇī māmāpnuhi varānane /
tvadadhīnā hi me prāṇāḥ kinnarodgītabhāṣiṇi //

cārusarvānavadyāṅgi padmendupratimānane /
na hyahaṃ tvadṛte bhīru śakṣyāmi khalu jīvitum //

kāmaḥ kamalapatrākṣi pratividhyati māmayam /
tasmātkuru viśālākṣi mayyanukrośamaṅgane //

bhaktaṃ māmasitāpāṅgi na parityaktumarhasi /
tvaṃ hi māṃ prītiyogena trātumarhasi bhāmini //

tvaddarśanakṛtasnehaṃ manaścalati me bhṛśam /
na tvāṃ dṛṣṭvā punaścānyāṃ draṣṭuṃ kalyāṇi rocate //

prasīda vaśago'haṃ te bhaktaṃ māṃ bhaja bhāmini /
dṛṣṭvaiva tvāṃ varārohe manmatho bhṛśamaṅgane //

antargataṃ viśālākṣi vidhyati sma patattribhiḥ /
manmathāgnisamudbhūtaṃ dāhaṃ kamalalocane //

prītisaṃyogayuktābhiradbhiḥ prahlādayasva me /
puṣpāyudhaṃ durādharṣaṃ pracaṇḍaśarakārmukam //

tvaddarśanasamudbhūtaṃ vidhyantaṃ duḥsahaiḥ śaraiḥ /
upaśāmaya kalyāṇi ātmadānena bhāmini //

gāndharveṇa vivāhena māmupaihi varāṅgane /
vivāhānāṃ hi rambhoru gāndharvaḥ śreṣṭha ucyate //
tapatyuvāca /

nāhamīśā'tmano rājankanyā pitṛmatī hyaham /
mayi cedasti te prītiryācasva pitaraṃ mama //

yathā hi te mayā prāṇāḥ sambhṛtāśca nareśvara /
darśanādeva bhūyastvaṃ tathā prāṇānmamāharaḥ //

na cāhamīśā dehasya tasmānnṛpatisattama /
samīpaṃ nopagacchāmi na svatantrā hi yoṣitaḥ //

kā hi sarveṣu lokeṣu viśrutābhijanaṃ nṛpam /
kanyā nābhilaṣennāthaṃ bhārtāraṃ bhaktavatsalam //

tasmādevaṃ gate kāle yācasva pitaraṃ mama /
ādityaṃ praṇipātena tapasā niyamena ca //

sa cetkāmayate dātuṃ tava māmarisūdana /
bhaviṣyāmyadya te rājansatataṃ vaśavartinī //

ahaṃ hi tapatī nāma sāvitryavarajā sutā /
asya lokapradīpasya savituḥ kṣatriyarṣabha //