મહાભારત · અધ્યાય 1.184

વસત્સુ તેષુ પ્રચ્છન્નં પાણ્ડવેષુ મહાત્મસુ ।
આજગામાથ તાન્દ્રષ્ટું વ્યાસઃ સત્યવતીસુતઃ ॥

તમાગતમભિપ્રેક્ષ્ય પ્રત્યુદ્ગમ્ય પરન્તપાઃ ।
પ્રણિપત્યાભિવાદ્યૈનં તસ્થુઃ પ્રાઞ્જલયસ્તદા ॥

સમનુજ્ઞાપ્ય તાન્સર્વાનાસીનાન્મુનિરબ્રવીત્ ।
પ્રચ્છન્નં પૂજિતઃ પાર્થૈઃ પ્રીતિપૂર્વમિદં વચઃ ॥

અપિ ધર્મેણ વર્તધ્વં શાસ્ત્રેણ ચ પરન્તપાઃ ।
અપિ વિપ્રેષુ પૂજા વઃ પૂજાર્હેષુ ન હીયતે ॥

અથ ધર્માર્થવદ્વાક્યમુક્ત્વા સ ભગવાનૃષિઃ ।
વિચિત્રાશ્ચ કથાસ્તાસ્તાઃ પુનરેવેદમબ્રવીત્ ॥

આસીત્તપોવને કાચિદૃષેઃ કન્યા મહાત્મનઃ ।
વિલગ્નમધ્યા સુશ્રોણી સુભ્રૂઃ સર્વગુણાન્વિતા ॥

કર્મભિઃ સ્વકૃતૈઃ સા તુ દુર્ભગા સમપદ્યત ।
નાધ્યગચ્છત્પતિં સા તુ કન્યા રૂપવતી સતી ॥

તપસ્તપ્તુમથારેભે પત્યર્થમસુખા તતઃ ।
તોષયામાસ તપસા સા કિલોગ્રેણ શઙ્કરમ્ ॥

તસ્યાઃ સ ભગવાંસ્તુષ્ટસ્તામુવાચ યશસ્વિનીમ્ ।
વરં વરય ભદ્રં તે વરદોઽસ્મીતિ શઙ્કરઃ ॥

અથેશ્વરમુવાચેદમાત્મનઃ સા વચો હિતમ્ ।
પતિં સર્વગુણોપેતમિચ્છામીતિ પુનઃપુનઃ ॥

તામથ પ્રત્યુવાચેદમીશાનો વદતાં વરઃ ।
પઞ્ચ તે પતયો ભદ્રે ભવિષ્યન્તીતિ ભારતાઃ ॥

એવમુક્તા તતઃ કન્યા દેવં વરદમબ્રવીત્ ।
એકમિચ્છામ્યહં દેવ ત્વત્પ્રસાદાત્પતિં પ્રભો ॥

પુનરેવાબ્રવીદ્દેવ ઇદં વચનમુત્તમમ્ ।
પઞ્ચકૃત્વસ્ત્વયા હ્યુક્તઃ પતિં દેહીત્યહં પુનઃ ॥

દેહમન્યં ગતાયાસ્તે યથોક્તં તદ્ભવિષ્યતિ ।
વ્યાસ ઉવાચ ।
દ્રુપદસ્ય કુલે જજ્ઞે સા કન્યા દેવરૂપિણી ॥

નિર્દિષ્ટા ભવતાં પત્ની કૃષ્ણા પાર્ષત્યનિન્દિતા । પાઞ્ચાલનગરે તસ્માન્નિવસધ્વં મહાબલાઃ ।
સુખિનસ્તામનુપ્રાપ્ય ભવિષ્યથ ન સંશયઃ ॥

એવમુક્ત્વા મહાભાગઃ પાણ્ડવાન્સ પિતામહઃ ।
પાર્થાનામન્ત્ર્ય કુન્તીં ચ પ્રાતિષ્ઠત મહાતપાઃ ॥