Mahabharata · Chapter 1.183

etacchrutvā tataḥ sarve pāṇḍavā bharatarṣabha / manasā draupadīṃ jagmuranaṅgaśarapīḍitāḥ //

tatastāṃ rajanīṃ rājañchalyaviddhā ivābhavan /
sarve cāsvasthamanaso babhūvuste mahābalāḥ //

tataḥ kuntī sutāndṛṣṭvā sarvāṃstadgatacetasaḥ /
yudhiṣṭhiramuvācedaṃ vacanaṃ satyavādinī //

cirarātroṣitāḥ smeha brāhmaṇasya niveśane /
ramamāṇāḥ pure ramye labdhabhaikṣā mahātmanaḥ //

yānīha ramaṇīyāni vanānyupavanāni ca /
sarvāṇi tāni dṛṣṭāni punaḥpunararindama //

punardṛṣṭāni tānīha prīṇayanti na nastathā /
bhaikṣaṃ ca na tathā vīra labhyate kurunandana //

te vayaṃ sādhu pañcālāngacchāma yadi manyase /
apūrvadarśanaṃ vīra ramaṇīyaṃ bhaviṣyati //

subhikṣāścaiva pañcālāḥ śrūyante śatrukarśana /
yajñasenaśca rājā'sau brahmaṇya iti suśruma //

ekatra ciravāsaśca kṣamo na ca mato mama /
te tatra sādhu gacchāmo yadi tvaṃ putra manyase //
yudhiṣṭhira uvāca /

bhavatyā yanmataṃ kāryaṃ tadasmākaṃ paraṃ hitam /
anujāṃstu na jānāmi gaccheyurneti vā punaḥ //
vaiśampāyana uvāca /

tataḥ kuntī bhīmasenamarjunaṃ yamajau tathā /
uvāca gamanaṃ te ca tathetyevābruvaṃstadā //

tata āmantrya taṃ vipraṃ kuntī rājasutaiḥ saha /
pratasthe nagarīṃ ramyāṃ drupadasya mahātmanaḥ //