Mahabharata · Chapter 1.182

śrutvā jatugṛhe vṛttaṃ brāhmaṇāḥ saṃśitavratāḥ /
pāñcālarājaṃ drupadamidaṃ vacanamabruvan //

dhārtarāṣṭrāḥ sahāmātyā mantrayitvā parasparam /
pāṇḍavānāṃ vināśāya matiṃ cakruḥ suduṣkarām //

duryodhanena prahitaḥ purocana iti śrutaḥ /
vāraṇāvatamāsādya kṛtvā jatugṛhaṃ mahat //

tasmingṛhe suvisrabdhānpāṇḍavānpṛthayā saha /
ardharātre mahārāja dagdhavānatidurmatiḥ //

tenāgninā svayaṃ cāpi dagdhaḥ kṣudro nṛśaṃsavat /
etacchrutvā susaṃhṛṣṭo dhṛtarāṣṭraḥ sabāndhavaḥ //

alpaśokaḥ prahṛṣṭātmā śaśāsa viduraṃ tadā /
pāṇḍavānāṃ mahāprājña kuru piṇḍodakakriyām //

aho vidhivaśādeva gatāste yamasādanam /
ityuktvā prāradattatra dhṛtarāṣṭraḥ sabāndhavaḥ //

śrutvā bhīṣmeṇa viduraḥ kṛtavānaurdhvadehikam /
pāṇḍavānāṃ vināśāya kṛtaṃ karma durātmanā //

etatkāryasya kartā tu na dṛṣṭo na śrutaḥ purā /
etadvṛttaṃ mahābhāga pāṇḍavānprati naḥ śrutam //
brāhmaṇa uvāca /

śrutvā tu vacanaṃ teṣāṃ yajñaseno mahāmatiḥ /
yathā tajjanakaḥ śocedaurasasya vināśe //

tathā'tapyata vai rājā pāṇḍavānāṃ vināśane /
samāhūya prakṛtayaḥ sahitāḥ sarvanāgaraiḥ //

kāruṇyādeva pāñcālaḥ provācedaṃ vacastadā /
drupada uvāca /
aho rūpamaho dhairyamaho vīryamaho balam //

cintayāmi divārātramarjunaṃ prati bāndhavāḥ /
bhrātṛbhiḥ sahito mātrā so'dahyata hutāśane //

kimāścaryamito loke kālo hi duratikramaḥ /
mithyāpratijño lokeṣu kiṃ kariṣyāmi sāmprataṃ //

antargatena duḥkhena dahyamāno divāniśam /
yājopayājau satkṛtya yācitau tau mayā'naghau //

bhāradvājasya hantāraṃ devīṃ cāpyarjunasya vai /
lokastadveda yaccāpi tathā yājena me śrutam //

yājena putrakāmīyaṃ hutvā cotpāditāvimau /
dhṛṣṭadyumnaśca kṛṣṇā ca mama tuṣṭikarāvubhau //

kiṃ kariṣyāmi te naṣṭāḥ pāṇḍavāḥ pṛthayā saha /
brāhmaṇa uvāca /
ityevamuktvā pāñcālaḥ śuśoca paramāturaḥ //

dṛṣṭvā śocantamatyarthaṃ pāñcālamidamabravīt /
purodhāḥ satvasampannaḥ samyagvidyāviśeṣavit //

vṛddhānuśāsane saktāḥ pāṇḍavā dharmacāriṇaḥ /
tādṛśā na vinaśyanti naiva yānti parābhavam //

mayā dṛṣṭamidaṃ satyaṃ śṛṇu tvaṃ manujādhipa /
brāhmaṇaiḥ kathitaṃ satyaṃ vedeṣu ca mayā śrutam //

bṛhaspatimatenātha paulomyā ca purā śrutam /
naṣṭa handro bisagranthyāmupaśrutyā hi darśitaḥ //

upaśrutirmahārāja pāṇḍavārthe mayā śrutā /
yatrakutrāpi jīvanti pāṇḍavāste na saṃśayaḥ //

mayā dṛṣṭāni liṅgāni ihaivaiṣyanti pāṇḍavāḥ /
yannimittamihāyānti tacchṛṇuṣva narādhipa //

svayaṃvaraḥ kṣatriyāṇāṃ kanyādāne pradarśitaḥ /
svayaṃvarastu nagare ghuṣyatāṃ rājasattama //

yatra vā nivasantaste pāṇḍavāḥ pṛthayā saha /
dūrasthā vā samīpasthā svargasthā vā'pi pāṇḍavāḥ //

śrutvā svayaṃvaraṃ rājansameṣyanti na saṃśayaḥ /
tasmātsvayaṃvaro rājanghuṣyatāṃ mā ciraṃ kṛthāḥ //
brāhmaṇa uvāca /

śrutvā purohitenoktaṃ pāñcālaḥ prītimāṃstadā /
ghoṣayāmāsa nagare draupadyāstu svayaṃvaram //

puṣyamāse tu rohiṇyāṃ śuklapakṣe śubhe tithau /
divasaiḥ pañcasaptatyā bhaviṣyati na saṃśayaḥ //

devagandharvayakṣāśca ṛṣayaśca tapodhanāḥ /
svayaṃvaraṃ draṣṭukāmā gacchantyeva na saṃśayaḥ //

tava putrā mahātmāno darśanīyo viśeṣataḥ /
yadṛcchayā sā pāñcālī gacchedvānyatamaṃ patim //

ko hi jānāti lokeṣu prajāpatimataṃ śubhaṇ /
tasmātsaputrā gacchethā yadi brāhmaṇi rocate //

nityakālaṃ subhikṣāste pāñcālāstu tapodhane /
yajñasenastu rājā sa brahmaṇyaḥ satyasaṅgaraḥ //

brahmaṇyā nāgarāḥ sarve brāhmaṇāścātithipriyāḥ /
nityakālaṃ pradāsyanti āmantraṇamayācitam //

ahaṃ ca tatra gacchāmi mamaibhiḥ saha śiṣyakaiḥ /
ekasārthāḥ prayātāḥ smo brāhmaṇyā yadi rocate //
etāvaduktvā vacanaṃ brāhmaṇo virarāma ha //