Mahabharata · Chapter 1.180

gaṅgādvāraṃ prati mahānbabhūvarṣirmahātapāḥ /
bharadvājo mahāprājñaḥ satataṃ saṃśitavrataḥ //

so'bhiṣektuṃ gato gaṅgāṃ pūrvamevāgatāṃ satīm /
dadarśāpsarasaṃ tatra ghṛtācīmāplutāmṛṣiḥ //

tasyā vāyurnadītīre vasanaṃ vyaharattadā /
apakṛṣṭāmbarāṃ dṛṣṭvā tāmṛṣiścakame tadā //

tasyāṃ saṃsaktamanasaḥ kaumārabrahmacāriṇaḥ /
cirasya retaścaskanda tadṛṣirdroṇa ādadhe //

tataḥ samabhavaddroṇaḥ kumārastasya dhīmataḥ /
adhyagīṣṭa sa vedāṃśca vedāṅgāni ca sarvaśaḥ //

bharadvājasya tu sakhā pṛṣato nāma pārthivaḥ /
tasyāpi drupado nāma tadā samabhavatsutaḥ //

sa nityamāśramaṃ gatvā droṇena saha pārṣataḥ /
cikrīḍādhyayanaṃ caiva cakāra kṣatriyarṣabhaḥ //

tatastu pṛṣate'tīte sa rājā drupado'bhavat /
droṇo'pi rāmaṃ śuśrāva ditsantaṃ vasu sarvaśaḥ //

vanaṃ tu prasthitaṃ rāmaṃ bharadvājasuto'bravīt /
āgataṃ vittakāmaṃ māṃ viddhi droṇaṃ dvijottama //
rāma uvāca /

śarīramātramevādya mayā samavaśeṣitam /
astrāṇi vā śarīraṃ vā brahmannekatamaṃ vṛṇu //
droṇa uvāca /

astrāṇi caiva sarvāṇi teṣāṃ saṃhārameva ca /
prayogaṃ caiva sarveṣāṃ dātumarhati me bhavān //
brāhmaṇa uvāca /

tathetyuktvā tatastasmai pradadau bhṛgunandanaḥ /
pratigṛhya tadā droṇaḥ kṛtakṛtyo'bhavattadā //

samprahṛṣṭamanā droṇo rāmātparamasammatam /
brahmāstraṃ samanujñāpya nareṣvabhyadhiko'bhavat //

tato drupadamāsādya bhāradvājaḥ pratāpavān /
abravītpuruṣavyāghraḥ sakhāyaṃ viddhi māmiti //
drupada uvāca /

nāśrotriyaḥ śrotriyasya nārathī rathinaḥ sakhā /
nārājā pārthivasyāpi sakhipūrvaṃ kimiṣyate //
brāhmaṇa uvāca /

sa viniścitya manasā pāñcālyaṃ prati buddhimān /
jagāma kurumukhyānāṃ nagaraṃ nāgasāhvayam //

tasmai pautrānsamādāya vasūni vividhāni ca /
prāptāya pradadau bhīṣmaḥ śiṣyāndroṇāya dhīmate //

droṇaḥ śiṣyāṃstataḥ pārthānidaṃ vacanamabravīt /
samānīya tu tāñśiṣyāndrupadasyāsukhāya vai //

ācāryavetanaṃ kiñciddhṛdi yadvartate mama / kṛtāstraistatpradeyaṃ syāttadṛtaṃ vadatānaghāḥ /
so'rjunapramukhairuktastathā'stviti gurustadā //

yadā ca pāṇḍavāḥ sarve kṛtāstrāḥ kṛtaniścayāḥ /
tato droṇo'bravīdbhūyo vetanārthamidaṃ vacaḥ //

pārṣato drupado nāma chatravatyāṃ nareśvaraḥ /
tasmādākṛṣya tadrājyaṃ mama śīghraṃ pradīyatām //

dhārtarāṣṭrāśca te bhītāḥ pāñcālānpāṇḍavādayaḥ /
dhārtarāṣṭraiśca sahitāḥ punardroṇena coditāḥ //

yajñasenena sangamya karṇaduryodhanādayaḥ / nirjitāḥ sannyavartanta tathā te kṣatriyarṣabhāḥ //

tataḥ pāṇḍusutāḥ pañca nirjitya drupadaṃ yudhi /
droṇāya darśayāmāsurbaddhvā sasacivaṃ tadā //

mahendra iva durdharṣo mahendra iva dānavam /
mahendraputraḥ pāñcālaṃ jitavānarjunastadā //

taddṛṣṭvā tu mahāvīryaṃ phalgunasya mahaujasaḥ / vyasmayanta janāḥ sarve yajñasenasya bāndhavāḥ /
droṇa uvāca /

prārthayāmi tvayā sakhyaṃ punareva narādhipa /
arājā kila no rājñaḥ sakhā bhavitumarhati //

ataḥ prayatitaṃ rājye yajñasena tvayā saha /
rājā'si dakṣiṇe kūle bhāgīrathyāhamuttare //
brāhmaṇa uvāca /

evamukto hi pāñcālyo bhāradvājena dhīmatā /
uvācāstravidāṃ śreṣṭhaṃ droṇaṃ brāhmaṇasattamam //

evaṃ bhavatu bhadraṃ te bhāradvāja mahāmate /
sakhyaṃ tadeva bhavatu śaśvadyadabhimanyase //

evamanyonyamuktvā tau kṛtvā sakhyamanuttamam /
jagmaturdroṇapāñcālyau yathāgatamarindamau //

asatkāraḥ sa tu mahānmuhūrtamapi tasya tu /
nāpaiti hṛdayādrājño durmanāḥ sa kṛśo'bhavat //