Mahabharata · Chapter 1.179

te tathā puruṣavyāghrā nihatya bakarākṣasam /
ata ūrdhvaṃ tato brahmankimakurvata pāṇḍavāḥ //
vaiśampāyana uvāca /

tatraiva nyavasanrājannihatya bakarākṣasam /
adhīyānāḥ paraṃ brahma brāhmaṇasya niveśane //

tataḥ katipayāhasya brāhmaṇaḥ saṃśitavrataḥ /
pratiśrayārthī tadveśma brāhmaṇasyājagāma ha //

sa myak pūjayitvā taṃ vipraṃ viprarṣabhastadā /
dadau pratiśrayaṃ tasmai sadā sarvātithivrataḥ //

tataste pāṇḍavāḥ sarve saha kuntyā nararṣabhāḥ /
upāsāñcakrire vipraṃ kathayantaṃ kathāḥ śubhāḥ //

kathayāmāsa deśāṃśca tīrthāni saritastathā /
rājñaśca vividhāścaryāndeśāṃścaiva purāṇi ca //

sa tatrākathayadvipraḥ kathānte janamejaya /
pañcāleṣvadbhutākāraṃ yājñasenyāḥ svayaṃvaram //

dhṛṣṭadyumnasya cotpattimutpattiṃ ca śikhaṇḍinaḥ /
ayonijatvaṃ kṛṣṇāyā drupadasya mahāmakhe //

tadadbhutatamaṃ śrutvā loke tasya mahātmanaḥ /
vistareṇaiva papracchuḥ kathāṃ te puruṣarṣabhāḥ //
pāṇḍavā ūcuḥ /

kathaṃ drupadaputrasya dhṛṣṭadyumnasya pāvakāt /
vedīmadhyācca kṛṣṇāyāḥ sambhavaḥ kathamadbhutaḥ //

kathaṃ droṇānmaheṣvāsātsarvāṇyastrāṇyaśikṣata / dhṛṣṭadyumno maheṣvāsaḥ kathaṃ droṇasya mṛtyudaḥ /
kathaṃ vipra sakhāyau tau bhinnau kasya kṛtena vā //
vaiśampāyana uvāca /

evaṃ taiścodito rājansa vipraḥ puruṣarṣabhaiḥ /
kathayāmāsa tatsarvaṃ draupadīsambhavaṃ tadā //