Mahabharata · Chapter 1.173

tayorduḥkhitayorvākyamatimātraṃ niśamya tu /
tato duḥkhaparītāṅgī kanyā tāvabhyabhāṣata //

kimevaṃ bhṛśaduḥkhārtau rorūyetāmanāthavat /
mamāpi śrūyatāṃ vākyaṃ śrutvā ca kriyatāṃ kṣamam //

dharmato'haṃ parityājyā yuvayornātra saṃśayaḥ /
tyaktavyāṃ māṃ parityajya trāhi sarvaṃ mayaikayā //

ityarthamiṣyate'patyaṃ tārayiṣyati māmiti /
asminnupasthite kāle taradhvaṃ plavavanmayā //

iha vā tārayeddurgāduta vā pretya bhārata /
sarvathā tārayetputraḥ putra ityucyate budhaiḥ //

ākāṅkṣante ca dauhitrānmayi nityaṃ pitāmahāḥ /
tatsvayaṃ vai paritrāsye rakṣantī jīvitaṃ pituḥ //

bhrātā ca mama bālo'yaṃ gate lokamamuṃ tvayi /
acireṇaiva kālena vinaśyeta na saṃśayaḥ //

tātepi hi gate svargaṃ vinaṣṭe ca mamānuje /
piṇḍaḥ pitṝṇāṃ vyucchidyettatteṣāṃ vipriyaṃ bhavet //

pitrā tyaktā tathā mātrā bhrātrā cāhamasaṃśayam /
duḥkhādduḥkhataraṃ prāpya mriyeyamatathocitām //

tvayi tvaroge nirmukto mātā bhrātā ca me śiśuḥ /
santānaścaiva piṇḍaśca pratiṣṭhāsyatyasaṃśayam //

ātmā putraḥ sakhī bhāryā kṛcchraṃ tu duhitā kila /
sa kṛcchrānmocayātmānaṃ māṃ ca dharme niyojayā //

anāthā kṛpaṇā bālā yatra kvacana gāminī /
bhaviṣyāmi tvayā tāta vihīnā kṛpaṇā sadā //

athavāhaṃ kariṣyāmi kulasyāsya vimocanam /
phalasaṃsthā bhaviṣyāmi kṛtvā karma suduṣkaram //

athavā yāsyase tatra tyaktvā māṃ dvijasattama /
pīḍitā'haṃ bhaviṣyāmi tadavekṣasva māmapi //

tadasmadarthaṃ dharmārthaṃ prasavārthaṃ ca sattama /
ātmānaṃ parirakṣasva tyaktavyāṃ māṃ ca santyaja //

avaśyakaraṇīye ca mā tvāṃ kālotyagādayam /
kiṃ tvataḥ paramaṃ duḥkhaṃ yadvayaṃ svargate tvayi //

yācamānāḥ parādannaṃ paridhāvemahi śvavat / tvayi tvaroge nirmukte kleśādasmātsabāndhave /
amṛteva satī loke bhaviṣyāmi sukhānvitā //

itaḥ pradāne devāśca pitaraśceti naḥ śrutam /
tvayā dattena toyena bhaviṣyati hitāya vai //

ityetadubhayaṃ tāta niśāmya tava yaddhitam /
tadvyavasya tathāmbāyā hitaṃ svasya sutasya ca //

mātāpitrośca putrāstu bhavitāro guṇānvitāḥ / na tu putrasya pitaro punarjātu bhaviṣyataḥ //
vaiśampāyana uvāca /

evaṃ bahuvidhaṃ tasyā niśamya paridevitam /
pitā mātā ca sā caiva kanyā prarurudustrayaḥ //

tataḥ praruditānsarvānniśamyātha sutastadā /
utphullanayano bālaḥ kalamavyaktamabravīt //

mā pitā ruda mā mātarmā svasastviti cābravīt /
prahasanniva sarvāṃstānekaikamanusarpati //

tataḥ sa tṛṇamādāya prahṛṣṭaḥ punarabravīt /
anenāhaṃ haniṣyāmi rākṣasaṃ puruṣādakam //
vaiśampāyana uvāca /

tathāpi teṣāṃ duḥkhena parītānāṃ niśamya tat /
bālasya vākyamavyaktaṃ harṣaḥ samabhavanmahān //

ayaṃ kāla iti jñātvā kuntī samupasṛtya tān /
gatāsūnamṛteneva jīvayantīdamabravīt //