Mahabharata · Chapter 1.17

etasminneva kāle tu bhaginyau te tapodhana /
apaśyatāṃ samāyāntamuccaiḥ śravasamantikāt //

yaṃ tu devagaṇāḥ sarve hṛṣṭarūpamapūjayan /
mathyamāne'mṛte jātamaśvaratnamanuttamam //

amoghabalamaśvānāmuttamaṃ javināṃ varam /
śrīmantamajaraṃ divyaṃ sarvalakṣaṇapūjitam //
śaunaka uvāca /

kathaṃ tadamṛtaṃ devairmathitaṃ kva ca śaṃsa me / kāraṇaṃ cātra mathane sañjātamamṛtātparam //
yatra jajñe mahāvīryaḥ so'śvarājo mahādyutiḥ //
sautiruvāca /

jvalantamacalaṃ meruṃ tejorāśimanuttamam /
ākṣipantaṃ prabhāṃ bhānoḥ svaśṛṅgaiḥ kāñcanojjvalaiḥ //

kanakābharaṇaṃ citraṃ devagandharvasevitam /
aprameyamanādhṛṣyamadharmabahulairjanaiḥ //

vyālairāvāritaṃ ghorairdivyauṣadhividīpitam /
nākamāvṛtya tiṣṭhantamucchrayeṇa mahāgirim //

agamyaṃ manasāpyanyairnadīvṛkṣasamanvitam /
nānāpatagasaṅghaiśca nāditaṃ sumanoharaiḥ //

tasya śṛṅgamupāruhya bahuratnācitaṃ śubham /
anantakalpamadvandvaṃ surāḥ sarve mahaujasaḥ //

te mantrayitumārabdhāstatrāsīnā divaukasaḥ /
amṛtāya samāgamya taponiyamasaṃyutāḥ //

tatra nārāyaṇo devo brahmāṇamidamabravīt /
cintayatsu sureṣvevaṃ mantrayatsu ca sarvaśaḥ //

devairasurasaṅghaiśca mathyatāṃ kalaśodadhiḥ /
bhaviṣyatyamṛtaṃ tatra mathyamāne mahodadhau //

sarvauṣadhīḥ samāvāpya sarvaratnāni caiva ha /
manthadhvayudadhiṃ devā vetsyadhvamamṛtaṃ tataḥ //