Mahabharata · Chapter 1.16

saute tvaṃ kathayasvemāṃ vistareṇa kathāṃ punaḥ /
āstīkasya kaveḥsādhoḥ śuśrūṣā paramā hinaḥ //

madhuraṃ kathyate saumya ślakṣṇākṣarapadaṃ tvayā /
prīyāmahe bhṛśaṃ tāta pitevedaṃ prabhāṣase //

asmacchuśrūṣaṇe nityaṃ pitā hi niratastava /
ācaṣṭaitadyathā'kyānaṃ pitā tetvaṃ tathā vada //
sautiruvāca /

āyuṣmannidamākhyānamāstīkaṃ kathayāmi te /
yathāśrutaṃ kathayataḥ sakāśādvai piturmayā //

purā devayuge brahmanprajāpatisute śubhe /
āstāṃ bhaginyau rūpeṇa samupete'dbhute'nagha //

te bhārye kaśyapasyāstāṃ kadrūśca vinatā ca ha /
prādāttābhyāṃ varaṃ prītaḥ prajāpatisamaḥ patiḥ //

kaśyapo dharmapatnībhyāṃ mudā paramayā yutaḥ /
varātisargaṃ śrutvaivaṃ kaśyapāduttamaṃ ca te //

harṣādapratimāṃ prītiṃ prāpatuḥ sma varastriyau /
vavre kadrūḥ sutānnāgānsahasraṃ tulyavarcasaḥ //

dvau putrau vinatā vavre kadrūputrādhikau bale /
tejasā vapuṣā caiva vikrameṇādhikau ca tau //

tasyai bhartā varaṃ prādādīdṛsau te bhaviṣyataḥ /
evamastviti taṃ cāha kaśyapaṃ vinatā tadā //

yathāvatprārthitaṃ labdhvā varaṃ tuṣṭābhavattadā /
kṛtakṛtyā tu vinatā labdhvā vīryādhikau sutau //

kadrūśca labdhvā putrāṇāṃ sahasraṃ tulyavarcasām /
dhāryau prayatnato garbhāvityuktvā sa mahātapāḥ //

te bhārye varasantuṣṭe kaśyapo vanamāviśat /
sauturivāca /
kālena mahatā kadrūraṇḍānāṃ daśatīrdaśa //

janayāmāsa viprendra dve cāṇḍe vinatā tadā /
tayoraṇḍāni nidadhuḥ prahṛṣṭāḥ paricārikāḥ //

sopasvedeṣu bhāṇḍeṣu pañcavarṣaśatāni ca /
tataḥ pañcaśate kāle kadrūputrā viniḥsṛtāḥ //

aṇḍābhyāṃ vinatāyāstu mithunaṃ na vyadṛśyata /
tataḥ putrārthinī devī vrīḍitā ca tapasvinī //

aṇḍaṃ bibheda vinatā tatra putramapaśyata /
pūrvārdhakāyasampannamitareṇāprakāśatā //

sa putraḥ krodhasaṃrabdhaḥ śaśāpaināmiti śrutiḥ /
yo'hamevaṃ kṛto mātastvayā lobhaparītayā //

śarīreṇāsamagreṇa tasmāddāsī bhaviṣyasi /
pañca varṣaśatānyasyā yayā vispardhase saha //

eṣa ca tvāṃ suto mātardāsītvānmocayiṣyati /
yadyenamapi mātastvaṃ māmivāṇḍavibhedanāt //

na kariṣyasyanaṅgaṃ vā vyaṅgaṃ vāpi tapasvinam /
pratipālayitavyaste janmakālo'sya dhīrayā //

viśiṣṭaṃ balamīpsantyā pañcavarṣaśatātparaḥ /
evaṃ śaptvā tataḥ putro vinatāmantarikṣagaḥ //

aruṇo'dṛśyata brahmanprabhātasamaye tadā /
udyannatha sahasrāṃśurdṛṣṭvā tamaruṇaṃ prabhuḥ //

svatejasā prajvalantamātmanaḥ samatejasam /
sārathye kalpayāmāsa prīyamāṇastamonudaḥ //

so'pi taṃ rathamāruhya bhānoramitatejasaḥ / sarvalokapradīpasya hyamaro'pyaruṇo'bhavat //

garuḍo'pi yathākālaṃ jajñe pannagabhojanaḥ /
sa jātamātro vinatāṃ parityajya khamāviśat //

ādāsyannātmano bhojyamannaṃ vihitamasya yat /
vidhātrā bhṛguśārdūla kṣudhitaḥ patageśvaraḥ //