Mahabharata · Chapter 1.15

mātrā hi bhujagāḥ śaptāḥ pūrvaṃ brahmavidāṃ vara /
janamejayasya vo yajñe dhakṣyatyanilasārathiḥ //

tasya śāpasya śāntyarthaṃ pradadau pannagottamaḥ /
svasāramṛṣaye tasmai suvratāya mahātmane //

sa ca tāṃ pratijagrāha vidhidṛṣṭena karmaṇā /
āstīko nāma putraśca tasyāṃ jajñe mahāmanāḥ //

tapasvī ca mahātmā ca vedavedāṅgapāragaḥ /
samaḥ sarvasya lokasya pitṛmātṛbhayāpahaḥ //

atha dīrghasya kālasya pāṇḍaveyo narādhipaḥ /
ājahāra mahāyajñaṃ sarpasatramiti śrutiḥ //

tasminpravṛtte satre tu sarpāṇāmantakāya vai /
mocayāmāsa tāñśāpādāstīkaḥ sumahātapāḥ //

bhrātṝṃśca mātulāṃścaiva tathaivānyānsa pannagān /
pitṝṃśca tārayāmāsa santatyā tapasā tathā //

vrataiśca vividhairbrahmansvādhyāyaiścānṛṇo'bhavat /
devāṃśca tarpayāmāsa yajñairvividhadakṣiṇaiḥ //

ṛṣīṃśca brahmacaryema santatyā ca pitāmahān /
apahṛtya guraṃ bhāraṃ pitṝṇāṃ saṃśitavrataḥ //

jaratkārurgataḥ svargaṃ sahitaḥ svaiḥ pitāmahaiḥ /
āstīkaṃ ca sutaṃ prāpya dharmaṃ cānuttamaṃ muniḥ //

jaratkāruḥ sumahatā kālena svargameyivān / etadākhyānamāstīkaṃ yathāvatkathitaṃ mayā /
prabrūhi bhṛguśārdūla kimanyatkathayāmi te //