Mahabharata · Chapter 1.156

dhṛtarāṣṭraprayukteṣu pāṇḍuputreṣu bhārata /
duryodhanaḥ paraṃ harṣamagacchatsa durātmavān //

tataḥ subalaputraśca karṇaduryodhanāvapi / dahane saha putrāyāḥ kuntyā matimakurvata /
mantrayitvā sa taiḥ sārdhaṃ durātmā dhṛtarāṣṭrajaḥ //

sa purocanamekāntamānīya bharatarṣabha /
gṛhītvā dakṣiṇe pāṇau sacivaṃ vākyamabravīt //

mameyaṃ vasusampūrṇā purocana vasundharā /
yathaiva bhavitā tāta tathā tvaṃ draṣṭumarhasi //

na hi me kaścidanyo'sti viśvāsikatarastvayā /
sahāyo yena sandhāya mantrayeyaṃ yathā tvayā //

saṃrakṣa tāta mantraṃ ca sapatnāṃśca mamoddhara /
nipuṇenābhyupāyena yadbravīmi tathā kuru //

pāṇḍavā dhṛtarāṣṭreṇa preṣitā vāraṇāvatam /
utsave vihariṣyanti dhṛtarāṣṭrasya śāsanāt //

sa tvaṃ rāsabhayuktena syandanenāśugāminā /
vāraṇāvatamadyaiva yathā yāsi tayā kuru //

tatra gatvā catuḥśālaṃ gṛhaṃ paramasaṃvṛtam /
nagaropāntamāśritya kārayethā mahādhanam //

śaṇasarjarasādīni yāni dravyāṇi kānicit /
āgneyānyuta santīha tāni tatra pradāpaya //

balvajena ca sammiśraṃ madhūcchiṣṭena caiva hi / sarpistailavasābhiśca lākṣayā cāpyanalpayā /
mṛttikāṃ miśrayitvā tvaṃ lepaṃ kuḍyeṣu dāpaya //

śaṇaṃ tailaṃ ghṛtaṃ caiva jatu dārūṇi caiva hi /
tasminveśmani sarvāṇi nikṣipethāḥ samantataḥ //

lākṣāśamamadhūcchiṣṭaveṣṭitāni mṛdāpi ca / lepayitvā gurūṇyāśu dāruyantrāṇi dāpaya //

yathā ca tanna paśyeranparīkṣanto'pi pāṇḍavāḥ /
āgneyamiti tatkāryamapi cānye'pi mānavāḥ //

veśmanyevaṃ kṛte tatra kṛtvā tānparamārcitān /
vāsayethāḥ pāṇḍaveyānkuntīṃ ca sasuhṛjjanām //

āsanāni ca divyāni yānāni śayanāni na /
nighātavyāni pāṇḍūnāṃ yathā tuṣyecca me pitā //

yathā ca tanna jānanti nagare vāraṇāvate / yathā rameranvisrabdhā nagare vāraṇāvate /
tathā sarvaṃ vidhātavyaṃ yāvatkālasya paryayaḥ //

jñātvā ca tānsuviśvastāñśayānānakutobhayān /
agnistvayā tato deyo dvāratastasya veśmanaḥ //

dagdhānevaṃ svake gehe dāhitāḥ pāṇḍavā iti /
na garhayeyurasmānvai pāṇḍavārthāya karhicit //

sa tatheti pratijñāya kauravāya purocanaḥ /
prāyādrāsabhayuktena syandanenāśugāminā //

sa gatvā tvaritaṃ rājanduryodhanamate sthitaḥ /
yathoktaṃ rājaputreṇa sarvaṃ cakre purocanaḥ //

teṣāṃ tu pāṇḍaveyānāṃ gṛhaṃ raudramakalpayat //