Mahabharata · Chapter 1.155

tato duryodhano rājā sarvāstu prakṛtīḥ śanaiḥ / arthamānapradānābhyāṃ sañjahāra sahānujaḥ /
yuyutsumapanīyaikaṃ dhārtarāṣṭraṃ sahodaram //

dhṛtarāṣṭraprayuktāstu kecitkuśalamantriṇaḥ /
kathayāñcakrire ramyaṃ nagaraṃ vāraṇāvatam //

ayaṃ samājaḥ sumahānramaṇīyatamo bhuvi /
upasthitaḥ paśupaternagare vāraṇāvate //

sarvaratnasamākīrṇe puṇyadeśe manorame /
ityevaṃ dhṛtarāṣṭrasya vacanāccakrire kathāḥ //

kathyamāne tathā ramye nagare vāraṇāvate /
gamane pāṇḍuputrāṇāṃ jajñe tatra matirnṛpa //

yadā tvamanyata nṛpo jātakautūhalā iti /
uvācaitānetya tadā pāṇḍavānambikāsutaḥ //

adhītāni ca śāstrāṇi yuṣmābhiriha kṛtsnaśaḥ /
astrāṇi ca tathā droṇādgautamācca śaradvataḥ //

kṛtakṛtyā bhavantastu sarvavidyāviśāradāḥ / so'hamevaṃ gate tātāścintayāmi samantataḥ /
rakṣaṇe vyavahāre ca rājyasya satataṃ hite //

mamaite puruṣā nityaṃ kathayanti punaḥpunaḥ /
ramaṇīyatamaṃ loke nagaraṃ vāraṇāvatam //

te tātā yadi manyadhvamutsavaṃ vāraṇāvate /
sagaṇāḥ sānvayāścaiva viharadhvaṃ yathā'marāḥ //

brāhmaṇebhyaśca ratnāni gāyanebhyaśca sarvaśaḥ /
prayacchadhvaṃ yathākāmaṃ devā iva suvarcasaḥ //

kañcitkālaṃ vihṛtyaivamanubhūya parāṃ mudam /
idaṃ vai hāstinapuraṃ sukhinaḥ punareṣyatha //

nivasadhvaṃ ca tatraiva saṃrakṣaṇaparāyaṇāḥ / vailakṣaṇyaṃ na vai tatra bhaviṣyati parantapāḥ //
vaiśampāyana uvāca /

dhṛtarāṣṭrasya taṃ kāmamanubudhya yudhiṣṭhiraḥ /
ātmanaścāsahāyatvaṃ tatheti pratyuvāca tam //

tato bhīṣmaṃ śāntanavaṃ viduraṃ ca mahāmatim /
droṇaṃ ca bāhlikaṃ caiva somadattaṃ ca kauravam //

kṛpamācāryaputraṃ ca bhūriśravasameva ca /
mānyānanyānamātyāṃśca brāhmaṇāṃśca tapodhanān //

purohitāṃśca pautrāṃśca gāndhārīṃ ca yaśasvinīm / sarvā mātṝrupaspṛṣṭvā vidurasya ca yoṣitaḥ /
yudhiṣṭhiraḥ śanairdīna uvācedaṃ vacastadā //

ramaṇīye janākīrṇe nagare vāraṇāvate /
sagaṇāstatra yāsyāmo dhṛtarāṣṭrasya śāsanāt //

prasannamanasaḥ sarve puṇyā vāco vimuñcata /
āśīrbhirbṛhitānasmānna pāpaṃ prasahiṣyate //
vaiśampāyana uvāca /

evamuktāstu te sarve pāṇḍuputreṇa kauravāḥ /
prasannavadanā bhūtvā te'nvavartanta pāṇḍavān //

svastyastu vaḥ pathi sadā bhūtebhyaścaiva sarvaśaḥ /
mā ca vostvaśubhaṃ kiñcitsarvaśaḥ pāṇḍunandanāḥ //

tataḥ kṛtasvastyayanā rājyalābhāya pārthivāḥ /
kṛtvā sarvāṇi kāryāṇi prayayurvāraṇāvatam //