Mahabharata · Chapter 1.14

tato niveśāya tadā sa vipraḥ saṃśitavrataḥ /
mahīṃ cacāra dārārthī na ca dārānavindata //

sa kadācidvanaṃ gatvā vipraḥ pitṛvacaḥ smaran /
cukrośa kanyābhikṣārthī tisro vācaḥ śanairiva //

taṃ vāsukiḥ pratyagṛhṇādudyamya bhaginīṃ tadā /
na sa tāṃ pratijagrāha na sanāmnīti cintayan //

sanāmnīṃ codyatāṃ bhāryāṃ gṛhṇīyāmiti tasya hi /
mano niviṣṭamabhavajjaratkārormahātmanaḥ //

tamuvāca mahāprājño jaratkārurmahātapāḥ /
kinnāmnī bhaginīyaṃ te brūhi satyaṃ bhujangama //
vāsukiruvāca /

jaratkāro jaratkāruḥ svaseyamanujā mama / pratigṛhṇīṣva bhāryārthe mayā dattāṃ sumadhyamām /
tvadarthaṃ rakṣitā pūrvaṃ pratīcchemāṃ dvijottama //
sautiruvāca /

evamuktvā tataḥ prādādbhāryārthe varavarṇinīm /
sa ca tāṃ pratijagrāha vidhidṛṣṭena karmaṇā //