મહાભારત · અધ્યાય 1.15

માત્રા હિ ભુજગાઃ શપ્તાઃ પૂર્વં બ્રહ્મવિદાં વર ।
જનમેજયસ્ય વો યજ્ઞે ધક્ષ્યત્યનિલસારથિઃ ॥

તસ્ય શાપસ્ય શાન્ત્યર્થં પ્રદદૌ પન્નગોત્તમઃ ।
સ્વસારમૃષયે તસ્મૈ સુવ્રતાય મહાત્મને ॥

સ ચ તાં પ્રતિજગ્રાહ વિધિદૃષ્ટેન કર્મણા ।
આસ્તીકો નામ પુત્રશ્ચ તસ્યાં જજ્ઞે મહામનાઃ ॥

તપસ્વી ચ મહાત્મા ચ વેદવેદાઙ્ગપારગઃ ।
સમઃ સર્વસ્ય લોકસ્ય પિતૃમાતૃભયાપહઃ ॥

અથ દીર્ઘસ્ય કાલસ્ય પાણ્ડવેયો નરાધિપઃ ।
આજહાર મહાયજ્ઞં સર્પસત્રમિતિ શ્રુતિઃ ॥

તસ્મિન્પ્રવૃત્તે સત્રે તુ સર્પાણામન્તકાય વૈ ।
મોચયામાસ તાઞ્શાપાદાસ્તીકઃ સુમહાતપાઃ ॥

ભ્રાતૄંશ્ચ માતુલાંશ્ચૈવ તથૈવાન્યાન્સ પન્નગાન્ ।
પિતૄંશ્ચ તારયામાસ સન્તત્યા તપસા તથા ॥

વ્રતૈશ્ચ વિવિધૈર્બ્રહ્મન્સ્વાધ્યાયૈશ્ચાનૃણોઽભવત્ ।
દેવાંશ્ચ તર્પયામાસ યજ્ઞૈર્વિવિધદક્ષિણૈઃ ॥

ઋષીંશ્ચ બ્રહ્મચર્યેમ સન્તત્યા ચ પિતામહાન્ ।
અપહૃત્ય ગુરં ભારં પિતૄણાં સંશિતવ્રતઃ ॥

જરત્કારુર્ગતઃ સ્વર્ગં સહિતઃ સ્વૈઃ પિતામહૈઃ ।
આસ્તીકં ચ સુતં પ્રાપ્ય ધર્મં ચાનુત્તમં મુનિઃ ॥

જરત્કારુઃ સુમહતા કાલેન સ્વર્ગમેયિવાન્ । એતદાખ્યાનમાસ્તીકં યથાવત્કથિતં મયા ।
પ્રબ્રૂહિ ભૃગુશાર્દૂલ કિમન્યત્કથયામિ તે ॥